《我的MK妹同桌》第二季: 131

「可唔可以唔好講呢個話題住？」呀詩收起頭先嘅笑容，亦都認真咁同我講。

我嗰下呆咗，我原以為我股起勇氣去傾嘅時候，應該可以好好地溝通，點知會咁樣俾呀詩一句就收皮。

我呆到唔知俾咩反應佢好，佢亦都知嘅。

「我唔想啱啱完咗Ocamp，難得開心嘅心情就咁樣毀咗。」但係佢心情同埋語氣好明顯已經影響咗，開始加重。

「我知個問題，但可唔可以遲下先傾？」呀詩佢呢個認真而目無表情嘅樣，好耐無出現係我面前，平時佢都係開開心心嘅樣。





「嗯⋯⋯好啦，我知。」聽完之後，我明白嘅，我揀咗個唔啱嘅時機講呢個問題。

「雖然呢次Ocamp都幾成功，其他人都好滿意，因為有啲幾爆嘅位，但係真係好攰，開心還開心，依家就真係攰到仆街，瞓得唔夠仲要每日都用盡奶力咁，真係攰死。」

「所以我依家無咁樣嘅心情同埋力氣同你去傾呢啲嘢，但我知嘅，真係。」喺最後，呀詩都放返軟個態度。

我之後就問佢啲Ocamp嘅嘢，就無再提過我想傾下嘅嘢，將佢暫時收埋係心底。

心入面諗，咁就由佢先啦，目前都解決唔到啲咩，就咁先囉。





佢講好多Ocamp嘅嘢，亦都唔難睇得出佢疲倦嘅臉容，眼神有啲飄。

「你真係好攰咁喎。」我問。

「係啊，我依家隨時都可以瞓著，你聽日搵唔搵到我都唔知啊。」佢一隻手托住個頭，無精神食飯咁。

「咁你可以唔洗嚟食飯，直接返去瞓啊嘛，傻豬！」我心疼佢，見到佢攰成咁，返去補補眠仲好啦。

「因為我知好耐無搵你，除咗一放出嚟，第一時間就想見你之外，我都怕你會因為耐無搵你而唔開心，果然⋯⋯女人嘅直覺真係好準，哈哈哈！」





「所以幾攰都出一出嚟。」呀詩用疲倦嘅樣，溫柔地望住我講。