《我的MK妹同桌》第二季: 130

呀詩出camp嗰陣好開心咁打俾我。
 
「我出camp啦！」我收咗工之後接到佢嘅電話。
 
「有無掛住我？」佢喺電話入面好興奮咁講，只不過我聽到無辦法有咩同感，我知道呀詩帶個組係新嘅體驗，實會有好多感受，但我無經歷過，無辦法身同感受，只能夠聽佢分享。
 
「我頭先仲期望話你會嚟接我添，點知出到嚟人影都無個⋯⋯」呀詩似係抱怨，但其實係撒嬌。
 
「我頭先返緊工啊嘛。」我有啲冷冷咁講。
 




「咁你出唔出嚟食啲嘢啊？」佢難得好有興致咁講。
 
「我食咗嘢啦喎。」我講完之後，電話裡頭靜咗幾秒，我即刻補返句：「陪你食啲嘢都ok嘅！」
 
如果唔係呀詩落唔到台，不過我諗係時候趁呢個機會好好地溝通下。
 
「咁你想食咩啊？」
 
「你食咗嘢啊嘛！你頭先食咗咩咪食咩囉！」佢小氣到，平時嘅佢就係咁。
 




反而咁樣令我猶豫係咪應該講？係咪最近我諗多？係度杞人憂天？
 
「我頭先食空氣啊。」
 
「你！李建強！你要我食空氣啊？」呀詩難以置信。
 
「唔係，係我食姐，你想食咩就食咩㗎啦！」又要費力氹佢，先前嘅擔憂暫時得以一掃而空。
 
佢揀咗間餐廳食，一路話好肚餓，要食返啲人食嘅嘢，而且佢嗌得都有啲多。
 




呀詩，其實仲係我熟悉嘅呀詩。
 
「我哋係咪好耐無見啦？」我嘗試性地問下。
 
「係咩？可能無啦啦接咗Ocamp，太忙啦。」細心嘅佢，察覺到我嘅別有用意。
 
「係咪怪我太耐無陪你啊？」
 
「咁又無怪，只係覺得我哋見面嘅次數越嚟越少姐。」
 
「掛住我？」呀詩古精靈怪咁問，換轉以前，我會俾佢逗笑。
 
但今次，我想認真咁傾一傾呢個問題先，難得開咗個頭。
 
「當然會掛住啦，但呢一年，我哋都好忙，見面慢慢越嚟越少，我好驚我哋會越行越遠。」