《我的MK妹同桌》第二季: 129

嗰晚我哋傾到好夜，糖水就食得好快，但我哋斷唔到個話題，就係街上面周圍行下。
 
子晴佢順利入返U，佢呢一年捱得都好辛苦，無人陪你，每日起身靠嘅就係自己嘅意志力起身，然後溫書做卷，為嘅就係想提升短短嘅一至兩個level，做到攰嗰陣就睇下中文小說放鬆下，呢個就係佢唯一嘅娛樂啦，係屋企嗰陣。
 
其次就係同蕃薯仔去圖書館溫書，佢溫緊書嗰陣，蕃薯仔就咁坐係佢隔離睇下書玩下手機，或者睇佢。
 
「咁你有無去玩Ocamp啊？」同時我都想知蕃薯仔俾唔俾子晴去Ocamp。
 
「無啊，我對呢啲無乜興趣，可能我呢一年太摺，無乜朋友，我都好習慣呢種模式，有幾個真心嘅朋友係度，對我嚟講就夠啦。」
 




「你諗嘢理性得好成熟。」我忍唔住講。
 
「個人選擇嚟姐，都唔關成唔成熟事。」
 
「好成熟啊！！」我派下膠。
 
「哈！」子晴搞嘢咁一拳打埋嚟，佢都陪我膠埋一份。
 
「你話你咪成日都搏大啊？都唔知呀詩點忍你⋯⋯」
 




「我同佢都少咗見，平時都少咗嘢傾，不過佢唔洗點忍我，因為佢份人都膠下膠下。」係人哋面對提起自己女朋友，原來係會掛住佢。
 
就喺呢個當下，我好掛住呀詩，好想依家拖住嘅就係佢。
 
「都係嘅，我都想見下佢，可惜佢呢排都唔得閒，連佢男朋友都唔得閒見。」邪惡咁對住我笑，條仆街。
 
呢一晚我哋傾到好夜，傾到夠皮先走，我哋正處於青春嘅中央，我哋仲有好多時間可以揮霍，所以幾夜都好，都可以慢慢暢談。
 
當第二日嘅時候，一切瞬間回復正常，嗰種心入面嘅空虛感，籠罩得更加犀利。
 




我諗返起子晴嗰段說話，亦接受唔到依家呢種感覺，決定等呀詩完咗Ocamp之後，好好地傾下，溝通下。