《我的MK妹同桌》第二季: 128

「老實講，係有諗過嘅。」我覺得喺子晴面前唔需要隱瞞啲咩，佢連呢啲事都同得我講，就無咩好唔老實了。
 
人如果唔同人分享下自己嘅話，會屈住屈住，好苦悶㗎。
 
「所以我哋都係諗下，我覺得會諗過係好正常，證明真係認真思考過你哋兩個係咪真係啱繼續係埋一齊，而唔係盲目地因為一齊得耐，而勉強自己繼續係埋一齊。」
 
「但係我想像唔到有一日同蕃薯仔分手後，會變成點。」子晴講完後，無望住我，低頭食糖水。
 
突然個話題變得沉重。
 




「我之前同呀詩分開過，嗰段日子生不如死，我同佢好難得先再係返埋一齊，但呢排⋯⋯我覺得我哋慢慢越行越遠咁，就好似我哋兩個本來喺同一個星球，卻慢慢分裂成兩個星球咁。」
 
「呀詩都好愛你㗎。」子晴抬起頭，望住我意味不明咁笑。
 
屌⋯⋯我load咗兩秒先明，然後同佢相視而笑，子晴抄我講嗰句嘢，佢講得無錯，但就係咁矛盾同埋無奈。
 
「就係因為對方係咁愛自己，所以搞到我哋有分手呢個念頭嘅自己，覺得自己好撚賤⋯⋯係咪？」子晴一語中的，我苦笑咁點頭，認同佢所講嘅嘢。
 
「咁你真係諗住同蕃薯仔分手？」我認真問。
 




「唔知啊⋯⋯」
 
「你有無同佢講過啊？」
 
「無，我都唔知點講好，就連同你講，我都係唔知點開口講。」
 
「最後你咪又係忍唔住講咗？」我笑住串返佢。
 
「頂你啊！」子晴伸手過嚟打我。
 




咁樣嘅對話好似去返中學咁，坐佢隔離間唔時係度打打鬧鬧，呢啲光景日後買少見少。
 
「我覺得你哋真係傾下好啲喎，有心行落去就好好地傾下啦。」我講。
 
「其實道理我哋都明，但做起上嚟唔係咁易，而且仲好受心情影響⋯…」
 
子晴接住講：「你同呀詩都可以好好傾下㗎，係咪？我哋兩個啲問題都好似，好似同緊自己個影子對話咁，都幾搞笑。」
 
「點估唔到一年後嘅我哋，會傾呢啲嘢。」我答子晴。