《我的MK妹同桌》第二季: 125

我撥返個輪過去，係等待嘅過程入面，諗起都成年無同子晴聯絡。
 
自從佢話要斷曬社交之後，真係喺ig啊、facebook、whatsapp上面都見唔到佢⋯⋯
 
佢whatsapp上面嘅last seen竟然可以仲停留係上年嘅10月，就無再online過。
 
呢一年發生咗好多事，前半年香港亦發生咗雨傘運動，我都過咗好忙碌嘅一年，著緊啲成績到不得了，早知自己都做到嘅話，就DSE再努力啲啦屌！
 
我同呀詩，都好似因為忙碌而拉遠咗距離咁，我知子晴同呀詩都無聯絡，我諗仲keep住有聯絡子晴嘅，得蕃薯仔掛？
 




不過奇就奇在，連蕃薯仔都失蹤埋，搵極都唔出嚟，成日話要陪子晴溫書，久而久之就無乜點約蕃薯仔。
 
「喂？」呢把熟悉嘅聲令我生活有返一絲絲興奮。
 
「喂！好耐無見喎！」同返老朋友聯絡原來係件咁開心嘅事，係咪證明自己開始老啦？
 
「真係好耐無見啦。」子晴把聲聽落都好似蒼老⋯⋯唔係，係成熟咗好多，嗯⋯⋯點講呢，俾人感覺係老練咗，經歷多咗。
 
「你呢排點啊？」子晴率先問候下我。
 




「我？都係咁，呢年好忙啊，淨係追成績都煩死人，平時又要返part time，都就嚟攰死我。」坐係籃球場嘅我，忽然有種衝動想約佢出嚟食個嘢，傾下偈。
 
「係呢！」
「係呢！」
 
我哋咁啱異口同聲一齊講，我俾我哋呢下默契整笑咗，細心諗下，我都好似唔知幾耐無咁樣真係開懷咁笑下，對上一次我諗係同呀詩去迪士尼掛？但係都大半年前嘅事啦⋯⋯
 
「點啊？你講先啦。」我無咁好氣咁同子晴講。
 
「我想問呀詩佢點姐，我頭先打俾佢又無人聽。」唔怪得啦，所以先打俾我。




 
「佢入ocamp做組媽啊，佢依家應該係camp度忙緊掛。」我好輕鬆咁講。
 
「哦⋯⋯唔怪得啦，咁⋯咁你唔驚㗎？」
 
「驚咩啊？」其實我知子晴想問啲咩。
 
「驚呀詩俾其他男仔溝走咗囉！聽聞ocamp好易有火花㗎嘛，啊⋯⋯你頭先想問啊？」又跳得咁快嘅喂？搞到我都唔知答佢邊樣好⋯⋯算！約咗出嚟傾仲快。
 
「無，不如我哋依家出嚟食個嘢啊？咁耐無見，應該好多嘢講，哈哈！」
 
「嗯⋯嗯嗯⋯⋯都好喎！出嚟食個糖水啊。」我比較鍾意呢種即興嘅活動，夠爽快，而即興意味住大家咁啱都有呢個時間，係難得嘅緣份。
 
「好啊！」