《我的MK妹同桌》第二季: 126

我嚟到糖水鋪，佢仲未到，呢間糖水鋪係我哋中學出去玩完，食完飯之後嘅下場嚟。
 
之後嚟呢度食糖水嘅次數越嚟越少。
 
入面啲位full曬，得返出面位可以坐，出面熱辣辣，都唔易頂㗎。
 
我坐低無耐，就見到熟悉嘅身形行緊過嚟。
 
「喂！好耐無見喎。」又重複頭先喺電話嘅說話。
 




「又嚟？」我笑說，「你睇下有咩食啦。」
 
係昏暗嘅街燈下，子晴依舊咁靚，清純嘅氣質都係咁強勁，但好明顯佢成個人睇落滄桑咗好多，佢換咗個成熟嘅髮型，著住件白色連身長裙，飄下飄下咁過嚟，同埋佢臉容憔悴咗好多。
 
「我諗好啦。」子晴講，「你諗好未啊？」
 
「一早諗好啦。」
 
「咁嗌嘢先？」
 




「好啊。」
 
「唔該！寫嘢！」
 
嗌完嘢食嘅空窗期，就係入戲肉嘅時候。
 
「點啊？又話好多嘢傾嘅？」我估到係呢句開場白。
 
「依家又唔知由邊度講起好，哈哈。」的確係好多嘢想講，但去到真係要講嘅moment，又因為選擇困難症搞到唔知由邊度講起好。
 




「啊⋯⋯你係咪放咗榜啦？」我忽然醒起，就好順勢咁問咗出嚟。
 
「係啊，放咗好耐啦，Jupas都放埋啦喎。」佢笑笑口同我講，似乎係笑緊我無知？
 
「我知，只係點解你都放咗榜但又唔同我哋講姐！」我睥住佢。
 
「Jupas放完無耐就搵你哋啦！只不過我呢排仲要搞掂埋其他嘢先咋嘛。」子晴佢撥一撥啲頭髮，呢一下係幾迷人。無見咁耐，子晴好似有啲唔同咗，但又好似一樣，唔識講⋯⋯
 
「咁你同蕃薯仔點啊？」我都想約下呀蕃薯仔出嚟。
 
「我⋯⋯我諗住同佢講分手。」子晴語出驚人，嚇親我啊。