《我的MK妹同桌》第二季: 124

「係啊，唉⋯⋯依家後悔都唔得啦，Sorry啊！」呀詩又再一次道歉，睇得出佢對我係內疚嘅，但我唔想佢有呢一種感受。
 
「傻豬嚟嘅，有咩好Sorry姐？你快啲忙埋啲嘢先啦。」我用平穩嘅聲線同呀詩講。
 
「有你真好。」隔住個電話，我都好似見到呀詩放心嘅笑容。
 
收線之後，我就如一個洩咗氣嘅氣球，爛泥咁坐係度。
 
我好努力壓制住自己嘅失落，唔想俾自己咁玻璃心，唔想自己嘅世界成日因為呀詩而起起伏伏。
 




我去打波，打機。
 
無去到旅行，嗰段時間呀詩係度忙緊，而我就搵其他事嚟做，返工啦，打波，打機。
 
我想用咁樣嘅方法嚟分散自己嘅注意力，等自己唔好諗起呀詩。
 
呀詩每日都會打電話嚟，同我講下佢準備Ocamp嗰陣有咩嘢發生啊，又會問下我點啊。
 
係咪兩個人一齊耐咗，就會變得枯燥？
 




我好似有段時間無見過呀詩⋯⋯我都想同呀詩出嚟拍下拖，但我又唔想煩到佢，一齊咁耐，其實又唔洗下下都見。
 
想見佢嘅衝動因為自己壓抑落嚟，變得更加想見呀詩。
 
無論我做緊啲咩，打波又好，打機又好，當我拎起手機嗰一下，我就不自然咁期待呀詩嘅訊息同埋miss call。
 
夜晚我又無聊去打波，打到攰嗰陣，有少少空檔就會諗起佢，諗起佢同啲組員應該玩得好開心，因為呢一日係佢入camp日，佢琴日都係匆匆咁同我講完個電話，就又要準備其他嘢。
 
「洗唔洗我過嚟幫下你手啊？」我問。
 




「唔洗啦，我執完啲嘢又要聯絡下啲組員，原來組媽唔易做⋯⋯」
 
「哇——」都未講完，電話裡頭就傳嚟佢嘅尖叫聲。
 
「你做咩啊？」我緊張咁問。
 
「啊⋯⋯無事！」呀詩嘅聲音拉返近，「頭先掉咗舊布丁，唉⋯⋯曬咗。」
 
「哈哈，你估老母易做啊？」我笑笑口咁講。
 
「屌你！咪叫老曬啊，話曬我以前都係風華絕代嘅MK妹。」我聽到佢食嘢嘅聲音。
 
「你終於肯認你自己係MK妹啦？」呢個MK妹已經唔再MK啦。
 
「超，有咩好唔敢認姐。」呀詩好自豪。




 
「喂⋯⋯我唔同你講住啦，我嗰組嘅組爸打俾我，我遲啲打返俾你啊。」呀詩急急腳咁同我講。
 
「好啦。」我都未覆得切，就已經收咗線。
 
之後呀詩就無再打返過嚟俾我⋯⋯
 
佢有同我講過佢今日入camp，我諗佢真係忙到傻掛？但心入面又有啲⋯⋯
 
不安。
 
唔知佢會唔會同其他男仔玩得好開心，唔知有無咩狗公溝佢，但係之後有試過，亦都證明呀詩唔係呢啲咁隨便嘅女仔，我應該放心先係。
 
唉，好煩。
 




我打完波，拎起個電話，我見到有個miss call，我歡喜咗一秒，下一秒見到打俾我嘅人唔係呀詩。
 
但望真啲，又令我幾驚喜。
 
係子晴打嚟。