《我的MK妹同桌》第二季: 121

我自己其實期待呢次旅行，因為呢次係我哋第一次屬於我哋單獨嘅旅行。
 
我係想我哋會好似去迪士尼咁，甜甜蜜蜜，但呢個學期，忙碌搞到我哋嘅感情生活變得好平淡。
 
呀詩同我出街，唔會再精心打扮，反而出席一啲朋友重要嘅場合，先會見到佢精心打扮嘅樣。
 
其實呢一種心情，係好矛盾嘅一樣嘢嚟。兩個人一齊係需要舒適自在，如果無咗呢一樣嘢，只會係兩個人用愛嚟係度互相折磨；所以呀詩無乜打扮，舒適自在咁出嚟，係件好事嚟，係我面前做返自己。只不過⋯⋯
 
只不過有陣時會覺得⋯⋯
 




頹。
 
係由一個百變有趣嘅事，變得沉悶單一，甚至覺得同我出嚟好似hea緊我咁，但係最攞命嘅係，我知佢無，佢會因為咁樣而覺得開心，咁樣先係最矛盾嘅嘢。
 
我諗，摧毀一段感情，通常都係日積月累嘅小事，因為反而大事會拎出嚟溝通，會商量，但呢啲小事唔會，講出嚟又覺得自己好似好小家咁，又無傷大雅。
 
但當累積到一個點，我哋唔係儲緊積分啊，察覺到嗰陣先發覺自己無辦法接受，甚至係估唔到原來影響咁大㗎？
 
已經好難收得返。
 




不安、疲勞、忙碌已經足以令一對情侶分手，其實唔洗發生啲咩大件事，例如對方偷食啊、long D之類，可以唔洗有呢啲嘢都分手。
 
所以話，拍拖幾難？
 
唔知由幾時開始，我哋會經常抱怨，唔係呻對方，而係呻佢室友，呻佢嘅gpmate，呻啲成績，呻返工。
 
今次，我好有耐性，好小心咁避免好似上一次分手咁，到頭來，原來未放開嘅，係我自己。
 
「不如你唔好次次都專登咁樣過嚟陪我啦？」呀詩睇穿我嘅辛勞。