《我的MK妹同桌》第二季: 120

呢一個學期，我哋都好忙，已經有前一個學期嘅經驗，我哋都習慣曬呢種模式，忙功課、忙上堂、忙返part time。
 
我哋漸漸少咗聯絡，而Gigi最近都好似搵到男朋友，佢係ig上面都成日曬佢同男朋友嘅合照。
 
「你呢排成日遲到喎，掛住拍拖啊？」我不經意咁問起，其實Gigi都無同我講佢出pool，慢慢啲fd都係喺ig上面見到啲最新狀態。
 
好似去旅行啊，就po啲飛機相、旅行相、機票相之類，會打好長嘅嘢，啲合照會一個個咁tag，但係其實好多都唔算識。
 
「邊有姐。」Gigi佢笑到開曬花咁，口是心非到。
 




心入面不禁牽起羨慕嘅漣漪，並唔係因為之前Gigi好似鍾意我，依家就拍咗拖嗰種失落，而係羨慕佢啱啱拍拖，仲好熱戀好sweet嘅階段。
 
依家我同呀詩唔係無，但隨著拍得越耐，就會變得越嚟越少。
 
當見到人哋啱啱投入一段感情，好甜蜜嘅時候，就會不禁諗起自己依家感情生活好平淡，並唔係話咁樣唔好，點樣嘅感情最後都難以避免步入呢個階段。
 
上一次嘅經驗，已經話過俾我聽，所以我今次無論如何都唔會再好似以前咁。
 
網絡上流傳一句嘢：新鮮感唔係同唔同人去做同一樣嘅事，而係同自己以前鍾意嘅人去做唔一樣嘅事。
 




呢句嘢一開始好新，後來俾人用到爛。
 
但講得啱嘅，所以我會想用心去經營，去維繫我同呀詩嘅感情。
 
只要佢打嚟，我就一定會接，要約嘅話，點都會抽時間同佢出街，睇佢想睇嘅Marvel電影，食佢想試嘅餐廳。
 
「不如遲下暑假去澳門玩返兩日啊？」我都想有錢帶佢去日本玩，但以返part time儲返落嚟嘅錢，連買我哋兩個嘅機票都唔夠。
 
「可以啊，但係⋯⋯我有啲想去長隆玩水上樂園。」佢食飯嘅時候同我講，然後佢兜話：「去澳門都得嘅，我無所謂啊。」
 




佢講完嗰個無所謂之後，空氣突然安靜。你估佢真係無所謂？答案一早話咗俾你知啦。
 
喺香港仲未發生大事件之前，返大陸玩，係其中一個唔錯嘅選擇，嗰陣時喜茶同海底撈仲未咁流行，但返去長隆水上樂園玩，反而仲興添。
 
「長隆囉！澳門幾時都有得去啦，咁方便，但暑假唔係咁易抽時間。」我委協。