《我的MK妹同桌》第二季: 114

跑到一半，呀詩已經喘曬氣嗌唔得，佢似乎無頭先咁凍。
 
「多謝你。」佢跑完之後氣來氣喘咁講。
 
「咩多謝啊？」講完之後，再諗幾秒，先明佢講嘅多謝係指啲咩。
 
「多謝你今日帶我嚟，我自從開咗學之後，就無再試過咁開心。」聽完呀詩咁講，我有啲愕然。
 
因為我以為佢開始咗新嘅階段，試到新嘅人、新嘅生活，會有新嘅快樂，點知原來佢唔係咁睇。
 




「你返學返得唔開心咩？」
 
「只係覺得好多人讀，要讀得好唔係咁易，而且最煩係啲人事，啲groupmate都好難搞，如果我自己一個做嘅反而無咁麻煩。」
 
「邊撚個講話上大學之後易讀，就可以脫離中學狂讀書嘅苦海？」呀詩抱怨起上嚟，至少佢係我面前，願意講出真心話。
 
「所以呢一日係我呢段日子最期待嘅一日，果然，我好開心。」呀詩俾迎面吹嚟風搞到個頭有啲凌亂，佢整一整理自己嘅頭髮，有種凌亂美。
 
「你生日，你開心就得。」佢突然咁認真，搞到我有啲唔好意思添。
 




「生日快樂。」我覺得最後都要講返句嘅。
 
「淨係生日快樂咋？禮物都無份啊？你句生日快樂又講得出口喎。」呀詩調皮地調侃我。
 
「哇！帶你嚟迪士尼呢份禮物仲唔夠大禮啊？你條友貪得無厭喎。」我用兩隻手指輕輕夾佢個鼻。
 
「我已經好滿足，不過頭先以為你會拎份禮物出嚟添，搞到我空歡喜一場，如果你頭先拎份禮物，就完美啦。」
 
「你話㗎！」俾佢咁樣講一講，激起我男人要面嘅心。
 




男人係唔激得㗎。
 
我即刻係背囊度，拎出個包裝好嘅禮物出嚟。
 
「嗱！唔好話我唔夠完美啊？依家完美未啊？」我大大聲咁串佢。
 
而呀詩呆咗咁望住我，似乎覺得不可思議，然後又驚訝又笑住咁望住我，我哋無視係度離開緊嘅人，呀詩笑到見牙唔見眼。
 
「屌你咩真係，哈哈哈哈哈哈哈哈哈哈！」
 
「點解你可以頭先唔拎出嚟？」佢一直好奇怪呢個位。
 
「咁易俾你估到咩？你呢個貪得無厭嘅女人，哈哈。」我都俾佢惹笑。
 
「俾返你囉！我先唔稀罕！」呀詩扁扁嘴，又扭計。




 
「你唔想知點解我會有禮物咩？下？」我引誘佢，喺旁人眼中嘅我哋，就係喺度耍緊花槍。
 
「唔想要份禮物啦？」呀詩背住我。
 
我拎出份禮物，拎埋個盒出嚟，不慌不忙咁拎條頸鏈，從背後吊係佢面前。
 
呀詩想伸手搶，我即刻抽起佢，佢搶唔到之後，就擰轉身，好惡咁望住我。
 
「要唔要啊？」我再次擺係佢面前。
 
呀詩又伸手去搶，我今次俾佢拎走。
 
「點解你會知我想要呢條米奇老鼠頸鏈嘅？」佢對眼充滿住好奇，見到佢咁恨想知嘅樣，我就好有成就感。
 




「仲唔簡單？因為見你facebook有like過呢條鏈囉。」我沾沾自喜，續道：「而且我仲係頭先買嘅。」
 
「趁、你、去、咗、廁、所、嗰、陣。」我憋不住笑意。
 
「哦！！唔怪之我出到嚟唔見咗人影啦！」呀詩晃然大悟。
 
「你臨急抱佛腳喎！」呀詩甜蜜地抱怨著。
 
「最後結果Ok咪得囉。」我跟住笑。
 
呀詩遞條鏈過嚟，繼而柔聲說：「幫我帶。」
 
我接過後，溫柔咁企係呀詩背後，將頸鏈繞過呀詩性感嘅鎖骨位，幫呀詩扣起條頸鏈。
 
呀詩珍而重之把玩條頸鏈，條頸鏈好纖幼，戴係佢身上啱啱好，更顯佢鎖骨位嘅性感。




 
「完美啦！」呀詩轉過嚟講，然後問一句個個女仔都會問嘅問題：「我靚唔靚啊？」