《我的MK妹同桌》第二季: 113

煙花好短暫，係我哋仲可以享受埋甜蜜嘅悸動嘅時候，就咁無聲無息咁落幕，黑夜中仲漂浮緊殘留嘅煙霧。
 
「走囉。」呀詩依依不捨咁講。
 
我哋跟住人群慢慢咁離開迪士尼，美國小鎮大街啲鋪頭都開始關店。
 
「哎呀，今日無行到呢啲鋪頭添。」呀詩講完之後繼續自言自語，「不過就算行都無錢買，窮啊！等我哋遲下有錢，出嚟做嘢之後再嚟多次好無啊？」
 
雖然呢條唔係咩選舉題，無得你答唔好，但係我卻發自內心咁答佢：「好啊。」
 




因為我都想再同呀詩嚟多次，喺看似委屈妥協嘅背後，其實係真心、心甘情願咁付出。
 
「你又應承我多樣嘢啦。」希望佢今年嘅生日，可以令佢難忘啦。
 
呀詩撓住我手臂，捱住我行成條小鎮大街。
 
入夜之後，天氣開始轉涼，呀詩挂住我取暖，今日著得好清涼嘅佢，係抵受唔到寒冷。
 
我頭先件嬲都俾埋佢，但都好似好凍咁。
 




我唯有攬住佢，就算作用不大，都好過無。
 
「有無暖返啲啊？」我不停咁摩擦佢手臂，唔係抽水，而係希望咁樣可以暖返啲。
 
「有，暖返啲。」呀詩笑住咁講，但佢手臂依舊冰冷，好明顯佢講呢句都係想安慰我，我卻覺得呢啲小事已經凸顯出呀詩嗰份善解人意，係深深咁刻入骨子裡。
 
「咪扮啦，明明就凍到震。」我有啲心痛咁講。
 
「一係我哋跑去地鐵站？跑過去就暖曬。」呀詩成個人好跳脫，猜不透。
 




「下？你認真？」
 
「係啊，慢慢跑過去。」呀詩做出個小學生跑步嘅動作，不過佢不嬲都唔怕旁人嘅眼光，我知佢係認真嘅。
 
「今日你生日，你大曬！」我拖住呀詩，慎重咁問佢，「咁跑啦喎？」
 
「你真係好多嗲！」呀詩已經跑起上嚟，不過我好快已經超前咗佢。
 
由頭先跑過嚟睇煙花，依家呀詩又繼續跑，出咗迪士尼嗰條長路跑起上嚟，都唔易。
 
鳩下鳩下嘅佢，臉上總係掛住歡樂，我真係好愛好愛咁樣嘅佢。