《我的MK妹同桌》第二季: 115

「靚！點會唔靚啊？我送㗎喎。」我笑得無奈但甜蜜。
 
呀詩滿意地笑，今次，佢講唔出有啲咩不滿啦。
 
「仲有無咩唔滿意啊？」
 
「你想嘅話，實可以有㗎！」呀詩拖住我，行出呢個迪士尼樂園，佢表情係掛住心滿意足咁離開。
 
係忙碌過後，可以開開心心咁過一日已經好難得，因為呢一日過後，我哋又回復返忙碌嘅日子。
 




呀詩之後忙住返工，本來佢返學嗰陣已經有返工，但呢段期間佢返得仲多。
 
接佢收工，去食下嘢，有時間嘅話仲可以睇下戲添，呢啲已經係我哋平時拍拖嘅節目。
 
並唔會下下都會好似去迪士尼咁，有套期待好耐嘅電影可以一齊去睇，都已經好開心。
 
雖然放假我哋都會要返下part time，但係盡量有時間都會抽空出嚟，不過同之前有啲唔同嘅係⋯⋯
 
呀詩想去嘅地方，需要靚，同埋要影相。
 




我見佢ig度都好多人影靚相啊，食好西，係呢種社交媒體嘅渲染下，都會受到影響。
 
唔好話呀詩啦，我ig都會見到，其他同學時不時又會po下啲旅行下，由一大班人嘅聚會相，變成啲個人相或者係拍拖相；由近鏡嘅合照，變成影到成個人連埋背景嘅照片。
 
呀詩呢種原本就企係潮流尖端嘅MK妹，對呢種事可以話係極為敏感。
 
嗰陣去完迪士尼之後，呀詩返去就係ig上面開post，都係啲靚相，當然我同呀詩嘅合照都係入面，下面啲留言都係好sweet之類，我估唔到呀詩ig多咗咁多我唔識嘅人。
 
因為一睇就知唔會中學嘅熟人。
 




呀詩啲post閒閒地都過100like，嗰個仲好似成200幾300like添，我唔專登去睇返都唔知，我㩒like嗰陣仲係30幾40。
 
佢ig follower嘅人已經過千⋯⋯
 
雖然唔係較公開，只係估唔到上咗U之後會識到咁多人？相反我係asso呢邊都無乜幾可話識到朋友。
 
「我哋過幾日去西環碼頭囉？」呀詩放工之後同我講。