《我的MK妹同桌》第二季: 110

「好啦，我衰啦，知你生日想要個浪漫嘅時刻啊嘛。」我溫柔咁講，廢是一陣呀詩跳曬制，到時候真係收唔返。
 
我哋個身仲濕緊，係呢半個森林入面行，直到乾得差唔多，我哋就去返頭先嗰個未玩嘅機動設施度玩埋佢。
 
個天開始慢慢暗落嚟，依家差唔多到黃昏時候，天氣都無咁熱，開始有啲涼。
 
「無乜人啦喎，我哋直接入去都仲得喎。」我同呀詩講。
 
然後我哋好順咁行到入去，前面都仲有人排緊，但呢種少人嘅情況，好爽。
 




我哋拎起支搶，射嗰啲箭靶，哈！同我玩呢個，真係乜得輸。
 
「輕鬆啦玩呢個。」我彈咗呢句出嚟。
 
「好招積喎！輸俾我咁點先？」呀詩信心爆棚咁講。
 
「輸俾你嘅話，我扮一日米奇老鼠又點話。」我搞笑咁講。
 
「哈哈！嗱，你話㗎，你成日咁口響，下巴輕輕咁，你咪撚走數啊仆街仔。」呀詩火辣辣嘅脾性又顯露曬出嚟。
 




佢好認真。
 
無出過聲，架車開始郁動，我俾佢個氣場嚇親，佢好認真咁瞄準，架機前面嘅數字係咁升、係咁升。
 
而我就因為怯一怯，有啲位失咗手，影響自信。
 
我竟然由一開波就無追趕過呀詩嘅分數⋯⋯我仲諗住呢關可以輕鬆啲，搞笑啲，扮下以前玩嗰啲槍game角色咁。
 
點估到會咁認真嘅姐。
 




搞到我好有嗰種追分嘅壓力係度。
 
我真係輸咗，然後呀詩對無我戚戚眉⋯⋯我好尷尬。
 
「記得啦喎，一日米奇老鼠。」佢好瀟灑咁落車，留我自己一個係原地⋯⋯