《我的MK妹同桌》第二季: 109

「做咩姐？你𥄫女就得，我望下靚仔就唔得啦？」呀詩忽然講起，我明明今日都無𥄫女啊⋯⋯
 
諗多諗，呀詩咁樣，其實係佢平時都有留意我𥄫女，但從來都無同我講過，重點係，佢原來記係心。
 
⋯⋯
 
女人真係好記仇，你唔知邊日會俾佢審判。
 
「我⋯⋯」我講唔出啲咩，硬生生吞返落肚。
 




呯！！！！！！呯呯呯呯！！！！！！！！！
 
一陣涼透嘅感覺侵襲全身，無啦啦水面上炸咗一下，遠處又炸多下，我哋兩個仲有要近距離咁食到應一應。
 
我頭先俾呀詩講嘅嘢佔據曬個思緒，我依家咁樣嚇一嚇，仲未load到咩事，就已經濕曬。
 
呀詩坐我後面，我原以為我係前面幫佢食曬啦，點知佢都濕曬。
 
今日著白色連身裙嘅佢，好易透⋯⋯佢嘅食衣都透緊出嚟，係件淺粉紅色嘅內衣，佢好似前排買咗無幾耐。
 




一齊耐咗，連呢啲咁私密嘅嘢都知道得一清二楚，佢仲一連串買咗呢款唔同嘅顏色，因為減價，然後走嚟問我邊件好，所以好有印象。
 
因為我揀嘅。
 
後面啲男仔嘅眼光有意無意咁飄過嚟呢度，我對呢啲眼光好敏感，見佢哋扮曬不經意咁望過嚟，但個個不其然咁係呀詩身上停留數秒。
 
對男仔嚟講，幾秒已經好多。
 
「我月你調一調位啊。」我平靜咁同呀詩講。
 




「下？一陣再嚟多獲，我係前面咪食曬？」呀詩擔憂地道。
 
「唔會㗎啦，都就嚟一圈啦，後面無乜嘢㗎啦。」我勸說。
 
呀詩就同我調位，我將我自己花襯衫除落嚟，短袖嘅，呢排男仔好興呢類襯衫。
 
我都唔執輸咁入咗件，點知依家就大派用場，幫呀詩遮曬佢透嘅位。
 
呀詩先係愕然，望一望我，好快就會意過嚟，怕醜咁係度低頭竊笑。
 
估唔到我仲可以見到呀詩怕醜嘅一面，女仔羞澀嘅樣係好可愛，當然，肥婆另計，嗰啲叫可怕。
 
可怕同可愛係體重上係可以有天壤之別。
 
我哋無講啲咩，就咁靜靜咁遊埋最後嘅船河。




 
落船嗰陣，呀詩打咗個哈痴，我就揶揄佢：「乜你咁潺㗎？」
 
「你囉！擋啲唔擋啲咁，牛高馬大坐係我前面都幫唔到擋水，你話邊個問題啦？」我唔明點解佢仲可以聲大大。
 
「頭先明明好好氣氛，俾你一句搞衰曬！」呀詩扁曬嘴，手上緊緊咁扯住我件襯衫。