《我的MK妹同桌》第二季: 111

我出到嚟，面如死灰。
 
「依家扮啊？」我問道。
 
「梗係唔係啦，等我話要你扮嘅時候，你先要扮！」我已經打算做好變身成米奇老鼠嘅準備了。
 
「咁姐係幾時？我要啲時間準備㗎喎。」
 
「我以為你會走數添。」呀詩無望住我講。
 




「我喎，點會走數啊，應承過你嘅嘢我幾時走過數啊？」真男人就係應該要願賭服輸。
 
「係咩？」呀詩思考中，「諗諗下，又好似係喎，哈哈！」
 
「咁我要你扮嘅時候，再同你講啦，我會記住㗎啦。」呀詩講完之後，就真係無再提起過⋯⋯
 
「啊！！！前面嗰個，嗰個旋轉木馬，我之前見啲人係度影得好靚。」呀詩咁樣講，好似又係，呢排ig都有出現過啲人係度影相。
 
「幫我影啊，幫我影。」呀詩一蹦一跳咁走埋去。
 




「唔準影得我咁衰㗎！」呀詩叮嚀我。
 
好多張相之後，呀詩先滿意，收工。我諗再繼續咁樣影落去，我真係就嚟變成一個攝影師啦。
 
「你睇下啊，隔離嗰個影得幾專業！」呀詩望住隔離嗰個男仔，拎住部相機幫個女仔影相，隔離條女幾索，露曬膊咁，擺出個誘人嘅姿態。
 
「我叫你睇個攝影師啊，唔係叫你睇條女啊！！」呀詩捉住我隻手，然後就咬落嚟。
 
之前佢通常都係搣咋嘛，點估到佢今次會咬落嚟，痛楚好快遍佈全身。
 




「喂喂⋯⋯痛痛痛。」
 
「仲望唔望？」呀詩死都唔鬆口，抬起頭望住我。
 
「我、我研究緊點樣影女仔影得靚咋，你估我真係𥄫女咩？」我狡辯，但合理㗎嘛，係咪先？
 
「咁你試下再影我，睇下靚唔靚！」佢半信半疑咁睥住我。
 
一望住鏡頭嗰陣，就瞬間變臉。
 
後來啲影，佢都滿意，先肯放過我，然後就係叫我嚟影合照。
 
我哋心生一意，將部手機擺係一個唔知咩箱度，個角度啱啱好可以影到我哋連埋個背景。
 
我哋影咗好多個姿勢，我哋有一張係對望，唔知幾耐，好似無咁樣貼住額頭咁望到對方雙眸。




 
呢一刻，我都會有些少怕醜，呢個動作，曖昧到羞澀。可以清楚望到呀詩雙眸入面眼中嘅自己，好似俾佢吸咗入去咁。