《我的MK妹同桌》第二季: 108

重拾童真嘅呀詩，洋溢住幸福嘅神情離場，出嚟無耐，就已經嗌肚餓。
 
迪士尼啲嘢真係貴到癲，而且今次嚟係慶祝呀詩生日，呢筆錢，自然係入我數，荷包就嚟流血不止啦。
 
不過其實呀詩好體貼，佢嗌咗個最平嘅餐，一碗河粉就算，雖然佢無明講，話夠飽㗎啦，但作為男仔，呢一下真係暖入心。
 
對仲係學生嘅我嚟講，今日嘅洗費已經用咗好多，呀詩嘅體貼，更令我覺得今日嚟係值得。
 
我深知，呀詩食完其實係未飽，但佢會扮出個已經好飽嘅表情，然後講：「食到好飽啊，去散下步啦～～」
 




一出嚟，我哋發現咗個之前漏咗嘅遊戲，巴斯光年嗰個。
 
「喂喂！我哋好似未玩過喎。」呀詩拉住我，食完飯出嚟佢又精力充沛。
 
我任由佢拉住我，點知去到嗰陣，先發現條隊長到乜咁，打曬蛇餅。
 
「哇，咁多人嘅？」呀詩露出失望嘅樣，扁曬嘴咁。
 
「一係我哋玩住其他先？轉頭再過返嚟玩？」我哋仲有其他區未去。
 




「咁⋯⋯好啊！」呀詩好快收拾好心情，又開開心心走開咗。
 
轉個彎就嚟呢個森林，最先映入眼簾嘅，就係湖中間嗰間木屋，好似係泰山住嘅？我都唔係好清楚。
 
佢見住嗰艘船，就嚷著話要去搭！
 
「快快快，啲人好似上緊船啦。」我哋遠處望去，見到條隊唔算好長，但呢個大熱天時仲要跑過去，真係好攞命。
 
我哋最後趕到上船，我哋坐係前排嘅位，呀詩坐係我後面，話要我用嚟擋住啲會嚇人嘅怪物。
 




我但笑而不語。
 
一路上前面有個導遊係度講解，好似每艘船都有一個，我哋嗰個解說導遊幾靚仔，連身為男仔嘅我都覺得靚仔，就真係信得過嘅。
 
無幾耐，坐我後面嘅呀詩就講：「前面嗰個哥哥仔幾靚仔喎。」
 
我擰轉面，見到呀詩眼甘甘咁望住佢，個樣色迷迷咁。
 
我頓時心生醋意，用我個頭擋住佢，然後酸酸地講：「唔準望！」