《我的MK妹同桌》第二季: 107

排隊我哋各自攬住，然後玩下手機，嗰陣ig仲未咁普及，無咁多嘢睇，反而facebook仲多嘢睇。
 
去到後面頂唔順，咁多人逼埋一齊，明明都入秋，就嚟冬天啦，但今日就好鬼死熱，我拖住呀詩都拖到出曬汗。
 
忍咗成半個鐘，我哋就咁怨咗半個鐘，攞埋個3D眼鏡，佢開門嗰一刻，入面啲冷氣吹埋嚟，好撚爽啊！！
 
呀詩前面嘅已經因為出汗而裂曬，佢最緊張嘅就係佢嘅嘅陰，裂少少就已經係咁整。
 
呀詩滿頭大汗咁入去，係等緊嗰陣，呀詩嗰個頂唔順咁熱嘅樣，嗯⋯⋯的確無咁好睇，但佢嘅言行舉止實在太過可愛，係好有喜感嗰隻。
 




係排緊隊嗰陣，唔止呀詩一個叫囂，後面有個極品港女，係咁喺度呻熱啊，佢著住件白色小背心，加條長嘅藍色牛仔褲，究竟佢係熱定係點呢？
 
「都叫咗你帶定個風扇仔㗎啦！你睇下，依家熱到好似焗桑拿咁啦！」港女控訴嘅，正是佢身邊嘅港男。
 
側邊嘅人個個都望過去食花生，因為真係講得都幾大聲。
 
「咁背囊裝唔落啊嘛。」
 
然後就嘈起上嚟，其實由呢啲事度睇得出，唔⋯唔係，應該係話，因為呢種反面教材，映襯出呀詩嘅好。
 




好彩呀詩唔係咁咋！雖然佢都會怨、會呻，但至少無好似頭先個港女咁蠻不講理。
 
「如果我好似嗰個男仔咁，你會點啊？都會咁樣發爛渣啊？」我哋係隔離食花生。
 
「我先唔會好似佢咁樣，好肉酸，呢度個個都熱㗎啦，佢好似當咗佢條仔係佢隻狗咁。」我表示深有同感。
 
「依家啲港女仲惡過啲MK妹㗎！」我望一望呀詩呢個改良咗嘅MK妹，續道：「好彩我女朋友呢係咁姐！」我伸手想去攬住呀詩條腰，點知俾佢一下拒絕。
 
「咁熱，唔好掂我啊。」就咁食完個花生，但都唔夠過癮⋯⋯
 




「快！快啲入去涼冷氣。」呀詩第一件事諗嘅，唔係想霸個靚位，而係想涼冷氣。
 
我哋真係求其搵咗個位，就坐底抖，明明排個隊，無乜點出到力，但就好鬼攰⋯⋯
 
呢套嘢我一早睇過，但呀詩好雀躍咁，好似個細路女咁坐定定，我都廢事阻佢嘅興致。
 
一開場，啲卡通人物出場，佢就露出天真爛漫嘅笑容，而我望住個表演舞台，只感到無聊，反而係呀詩令我覺得有趣。
 
呀詩捉實我隻手，然後湊過嚟，講：「哇！戴咗呢幅眼鏡，啲嘢睇落真係好逼真喎。」
 
佢仲好似個傻仔，真係走去伸隻手出去捉，想捉住個係天上面飛緊嘅阿拉丁。
 
呀詩個樣好鬼滑稽。
 
「係啊，你差少少就捉到㗎啦，哈哈哈。」我仲要係正佢耳邊同佢講。




 
又係一陣暴打。
 
佢之後又俾突如其來嘅噴水嚇親，驚訝而又突然咁發出咗一聲：「啊～～啊～」
 
極似女優最後俾人喺臉上發射嗰一刻嘅叫聲，當然啦，呢句我無講出口，我擺係心姐。
 
最後仲要俾後面嘅唐老鴨搞到興奮到係個位度彈下彈下，我相信佢下次再嚟睇就唔會有嘅反應。
 
「佢真係飛咗去後面喎。」呀詩低能咁講。