《我的MK妹同桌》第二季: 93

聽到咁樣，我只好返返埋位，跟住Gigi同我講，話前面有兩個人邀請我哋，問一唔一組喎。
 
選擇唔多嘅我哋，加上識嘅人唔多，就應承咗，點知⋯⋯呢個先係惡夢嘅開始。
 
下晏嗰堂都係咁樣過，好似脫離咗中學嘅功課就係需要同其他人一組完成咁，當然有啲係自己一個嘅功課，但多數都係又有分組又有自己嘅功課要做，真係忙到仆街。
 
呀詩同我講，佢上完堂之後就去打工，香港人讀大學好多都係一邊讀一邊返part time，就連Gigi都話佢最近搵到份part time。
 
我暑假嗰份臨時工已經收咗皮，睇嚟我都要搵返份part time先得，但苦無頭緒，唔知點搵好。
 




基本上，開咗學之後，我同呀詩嘅生活就慢慢變得單調。
 
香港地拍拖好似都係咁，嚟嚟去去都係行街睇戲食飯，我哋都會成日去行下朗豪坊，畢竟中學嗰陣，呢度對我哋嚟講，好有意義。
 
但我依家對於行朗豪坊，已經無乜感覺，行嘅鋪頭，都係嗰啲。
 
我同呀詩一齊買手繩嗰間店，已經換咗一間女裝店，有啲回憶只可以留係心入面。
 
「我哋買手繩嗰間店已經無咗啦，原來時間過得咁快。」我拖住呀詩，忽然感慨咁講。
 




「係啊，呢度都好似少咗MK仔MK妹啦。」呀詩講。
 
「你以前都係MK妹嚟喎！」我反諷。
 
「唔準你咁講啊！」呀詩笑住咁惡我，呢啲事佢似乎都唔想再提起，但拎起舊年事嘅嘢笑佢都係一大樂事嚟。
 
「你大學有無人知你以前都係個MK妹啊？」我依舊唔識死。
 
「我封曬fb啲嘢唔俾人睇㗎啦！所以，無！人！會！知！」佢用力咁扭我手臂。
 




「得啦得啦，呢啲嘢我哋知咪好囉。」我氹返佢。
 
「算你啦！」我有啲好奇，我同呀詩嘅拍拖節目成日都係咁，佢唔會覺得悶㗎咩？
 
其實，呀詩嘅轉變係慢慢一步一步咁變緊，只係我當時仲未察覺。我哋係慢慢由一個階段，行到去另一個階段，人係每個階段，都會變。
 
係開咗學無幾耐，香港發生咗一件大事。
 
呢一場運動嘅爆發，我哋好多都仲懵懵地咁，唔太清楚發生緊咩事，但幾年後香港再爆發一件大事，之後可以話係影響我哋呢一代一世人。
 
雨傘運動開始嗰陣，我哋班有啲同學都有上去幫手，因為係媒體到見到場面係好震撼，好難想像呢啲畫面會係香港呢個俾人印象治安好好嘅地方發生。
 
係大眾嘅宣染下，我都有上去幫手派下水咁，呀詩亦都有同佢啲同學去幫手，但大家都係唔同場地，我哋都覺得無必要咁樣都要一齊，始終呢場運動唔係拍拖。
 
老實講一句，嗰陣時我唔係好知發生咗啲咩事，但知道我哋係想爭取一路以嚟香港都實現唔到嘅自由。




 
嗰一排，我哋生活嘅聚焦都係呢一場運動度，而見識到香港嘅警察係幾咁仆街，本來身邊仲有啲朋友係受以前皇家警察電影嘅熏陶，話之後大家想做警察，都已經紛紛話唔做。
 
「哇，原來催淚彈陣味咁難頂㗎？」呀詩嗰晚打俾我訴苦。