《我的MK妹同桌》第二季: 92

估唔到第一日返學俾我嘅感受係咁巨大，大家各自分開坐，除咗Gigi坐我隔離，就算係前面位都好，都唔會講唔講到半句嘢。
 
諗返起以前中學，開學第一日大家都會齊哇哇咁傾吓偈，當然唔會個個都咁熟，但呢刻呢個環境，會好明顯睇到大家各自各都有個隔膜係度。
 
第一堂個老師講解下嚟緊呢堂會上啲咩，大約會有報告啊，考試啊之類，需要我哋分組啊，每組要有四個人，但無咁快分，下一堂先，我哋聽到嗰下即刻四圍望下，前面有幾個已經係度竊竊私語，而我同Gigi你眼望我眼。
 
我以為會見返Ocamp嘅人啦，點知咁多生面孔，有幾個識嘅，但已經係前面連群結黨，我亦都唔想厚面皮咁上去攀談。
 
我見周圍嘅人都無乜動靜，其實大家都係等緊一個人做主動問，只要肯問，大家都會say yes，由佢哋四周飄動嘅眼神睇得出，發出緊「搵我啦、搵我啦」嘅訊號。
 




「依家點啊？老師話可以下個禮拜先交個分組名單，但係下個禮拜先搵好似已經太遲，其他人都已經搵好曬組。」
 
上Asso第一門學問就係「分組」。
 
「一係一陣問我後面嗰兩個？」我望一望坐我哋斜後面嘅一男一女，佢哋個look望落去似啲高材生，個男仔戴住個厚身嘅眼睛，睇得去好笨重，再著住件格仔襯衫。
 
毒撚高材生同埋另一個普普通通嘅女仔，兩個人存在感都明顯唔高，但我就係想要呢啲。
 
「好喎，應該幾好。」Gigi都同意。
 




糾結咗一輪，我觀察下其他人嘅動靜先，我見有幾個都擅自出位去問人同唔同佢一組，我都諗住過去問下佢哋。
 
呢啲時候做Gigi呢個女仔去問，真係好瘀㗎嘛，我做唔出叫個女仔去做其他嘢，仲要呢啲自己可以做到嘅嘢。
 
我儲定啲勇氣，上去問佢哋，好撚尷尬咁問：「嗨～～」我有禮貌咁同佢哋打聲招呼。
 
「你哋有無興趣同我哋一組啊？我同另外一個女仔，仲差兩個人⋯⋯」
 
「啊⋯⋯唔好意思啊，我哋已經有組啦。」男仔出奇地有禮貌咁答返我，但我估唔到有此一著，以為佢哋會無人搵，點知食咗閉門羹。