《我的MK妹同桌》第二季: 91

好快就已經開學，呢個暑假就係匆匆忙忙咁同人告別，然後趕住開始新嘅階段。
 
已經無咗以前開學嘅興奮，擔憂同埋迷茫感多咗。
 
我搭車嘅途中收到Gigi嘅Whatsapp，我同佢都有keep住聯絡吓嘅，但就隔幾日覆一次咁。
 
「今日一唔一齊返學啊？我有啲驚。」Gigi嘅whatsapp就係咁。
 
「我已經返緊啦喎。」我見到即刻覆。
 




「吓？咁快？你依家到邊啊？」佢好似有啲焦急，我明佢嘅憂慮嘅，事關自己都係咁，覺得踏入去學校嗰一步開始，就會有種唔安全嘅感覺，但如果有個人陪係自己隔離，心理上會安心好多。
 
就算自己都做好呢種心理準備，自己一個咪自己一個囉，但見到Gigi咁，又於心不忍。
 
我講咗自己係邊，佢話等埋喎，我就出咗地鐵站等佢，通常呢啲第一日嘅時候，都係會揀一個穩陣嘅方法嚟返學，提早啲時間啊，就算轉兩程都好，起碼穩陣去到先，唔會盪失路。
 
地鐵門一打開，Gigi就係我隔離無幾遠嘅地鐵門行出嚟，佢好飄逸咁行過嚟，白色輕飄飄嘅長裙，臉上化咗個淡妝。
 
「嗨！」Gigi見到面之後好尷尬咁打招呼。
 




「點啊？一開學你驚啊？」我收起同呀詩whatsapp緊嘅電話，係電話嘅另一頭，呀詩都係開學。
 
頭先佢問我開學點樣，我如實同佢講話Gigi突然約我一齊返學，佢就即刻send幾個好嬲好嬲嘅表情符號俾我。
 
「睇嚟你開學都好精彩喎。」對於呢種互相揶揄嘅方式我哋早已習慣。
 
「唔算啦，可能一陣仲精彩呢。」我回敬佢。
 
「咁你呢？嗰邊點啊？」我都想知呀詩嗰邊開學點樣。
 




「無啊⋯⋯都係咁，自己一個囉。」佢後面個音落得好重，我點會唔明呢？
 
「你無識啲新朋友仔咩？」
 
「唔會一齊返囉好無？」我頂，呢句嘢別有所指咁喎，「返到嚟都有幾個啱傾嘅一齊坐，但我今日上完之後就無堂啦。」
 
係等緊Gigi嘅途中，我就係度覆緊呀詩，我正諗住問佢一陣上完堂之後去邊嘅時候，Gigi班車就啱啱好到，whatsapp度彈咗句「落車啦」，我就見到Gigi了，隨即收起部電話。
 
「就算去完ocamp，都唔覺識到咩朋友，驚入去到咩人都唔識，又唔知會唔會行錯班房，咁有人陪吓係好嘅。」