《我的MK妹同桌》第二季: 90

我哋習慣咗完事後都會相擁，全身赤裸咁依偎，可以感受到呀詩嘅體溫，同白滑嘅肌膚，少咁呢啲環節唔知點解就會覺得空虛。
 
我哋就算一齊攬住，都會你搞下我，我搞下你咁。
 
然後呀詩忽然認真咁望住我，佢趴係我心口，用張薄薄嘅綿被遮蓋住，露出小半張臉，昏暗嘅燈光下映照出佢迷人嘅輪廓，佢同以前一樣，無乜點變過，童顏咁款。
 
「我想同你講樣嘢啊。」佢剎有介事咁同我講。
 
「咩啊？又有啲咩古怪嘢啊？」我打趣咁問。
 




「我嚟緊想住hall啊⋯⋯我⋯我唔想係呢個屋企。」聽到之後，我係呆咗一呆。
 
我諗係我個心態仲未轉得切，我依然仲停留緊係中學嗰個時候，我想像唔到一切嚟得咁快。
 
好朋友去外國讀書，其他人都有自己啲出路，子晴亦都選擇咗retake，依家連呀詩都諗緊住hall嘅嘢。
 
我覺得自己個心仲好幼稚，好天真咁想呢啲難能可貴嘅感情可以永遠咁留係自己身邊，唔好改變。
 
「你點睇啊？」呀詩見我無反應，就探個頭出嚟問我。
 




「我⋯我頭先諗緊嘢咋嘛。」
 
「我唔會亂嚟㗎，你放心啦。」佢頓一頓，雙眼從來都無離開過我，續道：「我知你會擔心hall嗰啲唔知咩人，而且好多嗰啲淫賤嘢啊嘛。」
 
佢的確講中咗我其中一個憂慮。
 
「但係我想住hall最主要係我終於有個機會可以脫離呢個屋企，有個自己嘅地方生活下，就算得短短一年都好啊，呢個係我由細到大嘅心願，你應該好清楚㗎⋯⋯」講完，呀詩用力咁攬一攬我。
 
我都好明白，其實唔會反對呀詩去住hall嘅，只係我自己需要啲時間接受大家都真係畢業，四散啦，我都要去行自己嘅路。
 




「我唔會反對你去住hall嘅，只係覺得一切好似好快咁，眨下間大家就散曬咁，呀俊都去外國讀書，其他人都有自己條路，之後越嚟越難聚埋一齊。」
 
「我只係一時之間未接受到，我諗慢慢就會慣。」
 
「我唔會走㗎喎。」呀詩好迅速咁答我，本來我望緊其他地方，聽到呢句之後再望返呀詩，佢眼大大咁望住我，堅定到令我感動。
 
係我最唔知點嘅時候，呀詩呢一句真係好感動，熱淚盈眶咁，差少少真係喊出嚟，我好少有係呀詩面前喊嘅衝動，但呢一句有。
 
呀詩令我覺得，就算其他人走曬都有，只要有佢係我隔離就夠。