《你信唔信，真係有前世今生》: 3.4
Ken和我幾乎同一時間向窗口方向望過去。
一個大概一米高的小女孩在不遠處的一旁哭泣著。
她穿著一條很公主的粉紅色裙子，淚水不停從雙眼跑出來。她用手揉著眼睛，左顧右盼的，像在找人。
我和Ken不約而同的站起來，向著這個小女孩走過去。
「妹妹，唔好喊住先，話比哥哥知咩事。」Ken彎下腰，跟小女孩對視，用極度溫柔的語氣說道，試圖讓安撫小女孩。
「嗚嗚......媽咪話唔可以同陌生嘅男人傾計。」妹妹哭泣著嘟起嘴巴說道。
Ken一臉無奈，我忍不住偷笑了一下。Ken向我打了眼色，示意我幫忙。
我蹲下來，看著妹妹發紅的雙眼，她一下接一下的抽泣著。
「你係咪搵緊媽咪啊？係咪走失左？」我輕聲問。
「嗚.......」妹妹繼續揉眼睛，然後輕輕點頭。
「妹妹，跟姐姐過黎，坐低抖抖先，我地幫你搵媽媽，好唔好？」我問。
「唔唔。」
我托著妹妹走回接待處，被拒絕的Ken只好跟在後面。
「我去搵Samuel過黎同佢講。」Ken忽然說，我輕輕點頭。
妹妹坐在接待處的椅子上，我坐在她的旁邊，輕輕拍著她的肩膀，妹妹也開始冷靜下來。
「係呢，妹妹，你叫咩名？」
「我叫陳明思，思思。」妹妹稚嫩的聲線，楚楚可憐。
「思思，唔好喊住，講個秘密比你知。」
「唔？」
「姐姐咁啱都係叫思思啵。」
「思思姐姐。」妹妹終於停止哭泣。
「思思，你今年幾歲啊？」
「今年七歲，讀緊小學二年班。」
「哦，咁大個女囉。」我輕輕撫摸她的頭，同時觀察著場內走來走去的人，試圖找尋她的母親。
「思思，唔洗擔心，陣間我地會幫你搵翻媽媽。」我說。
「媽媽」這兩個字變得好陌生，好像好久沒有從我的嘴裡說出，我也忽然想起我遠在台灣的媽媽。
「思思姐姐，今日係啊姨帶我黎，唔係媽媽。」
「哦，係啊。」我有點詫異，打從一開始我們就假定她是跟母親失散。
「唉，啊姨陣間一定會話我周圍走，唔跟住佢。頭先我都乖乖跟住啊姨，然後啊姨聽到話嗰邊有野攞，行得好快。周圍太多人，一下子就唔見左佢。」思思雙眼又突然發紅。
「咁佢應該要睇住你，應該要拖實你。思思，你冇做錯。」
此時，Ken和Samuel一同走過來。
此時，Ken和Samuel一同走過來。
Samuel拿著咪，他再問了一次思思的名字。
「妹妹唔洗驚，我會叫你屋企人過黎。」我拖著思思的手。
「陳明思嘅屋企人麻煩到門口接待處，你嘅小朋友起度等緊你。」
Samuel接連向著咪高峰重複了三遍，禮堂傳來Samuel沉穩的聲音。
過了一分鐘，一個提著環保袋的中年婦人急步走向接待處。
「呢個衰妹，叫你跟住我啦，你又周圍走。」她氣沖沖的瞪著思思，然後伸出右手食指指罵著。
「頭先人太多人我見唔到你啊......跟住......」思思眼眶紅了，嘴唇發抖。
「你個衰妹仲駁嘴啊，如果唔係你啊媽掉低你起我度，我就唔洗拖住你周圍走。」啊姨伸出右手用力抓住思思的左手，想一手拉思思走。
思思頓時痛得面容扭曲。
「唔好咁大力......」思思低聲的哀求。
「小姐，不如你冷靜啲先。」Samuel立刻上前勸喻。
「我同個衰妹講野，關你咩事啊，你邊位啊？」阿姨伸出食指，指著Samuel的鼻子。
「我係社工，不如冷靜啲聽我講兩句......」Samuel伸出雙手，請阿姨冷靜，同時示意自己沒有惡意。
「你地都癡線嘅，我依家帶翻個衰妹走喇，你地借過啦。」啊姨意圖撞開Samuel。
「小姐，我覺得你可能需要幫助，不如坐低傾兩句。」
「借開啦，幫咩助，你係咪有錢比我啊？唔係就過主啦，滿口幫幫幫，幫乜春啊？」
「你個衰妹啊，你老母掉低比我已經夠煩，仲要自己周圍走，我翻去就打你。」阿姨低頭生氣的說道。
「我冇啊，冇周圍走啊，唔好打我......」思思低聲哭泣著，然後被阿姨拉走。
「喂，大嬸，你都幾無賴。」Ken當頭棒喝一聲。
附近的人都忍不住望過來。
「你自己睇唔緊個細路，就話個細路。你知唔知頭先思思幾驚？」
大嬸一時沒有反應過來。
Ken舉起食指，指向大嬸的眉心，一股怒氣湧上臉，臉紅了起來，然後用盡全身的力氣說著：「你唔知啊，因為你淨係諗你自己。明明自己唔啱，仲大大聲話要打個細路，你呢啲人正一人渣。」
這樣的情景就像當日他大罵我父親一樣。
「算啦，唔好講喇。」Samuel輕輕拍Ken的手臂，在他耳邊輕聲道，示意他不要再說。
大嬸抬起頭，深呼吸一口，想挺起胸膛，卻挺起了下垂的胸部。凌厲的眼神一動不動看著Ken，然後像頭獅子發狂的張口大罵：「你依家鬧我啊，你係邊位啊？我鍾意點教就點教，邊到你指指點點！」
「你理得我邊位，總之我睇唔過眼你打細路。你呢啲人根本唔識湊仔。」Ken也不禁示弱，毫不退縮的站在大嬸前面，盯著阿姨的雙眼。
「睇你得十幾歲，你宜家教我湊細路。我唔識湊唔通你識啊。我點湊關你乜事啊，宜家大聲就有道理啊？」
四周的人都看過來湊熱鬧，而大嬸見附近的人開始注視，就拉著思思走。
「思思，我地走，唔好理呢啲人。」啊姨拉著思思，向門口方向走。Ken想走上前攔住她們，卻被Samuel一手阻止。
思思回頭看了我們一眼，可憐的眼神，扁起的嘴巴，有種走上刑場的感覺，好像說道：翻去又要比阿姨鬧喇。
我有一下子衝動想衝過去，然而我們都清楚，愛莫能助。
Ken握緊拳頭，急步走了兩步，最後還是停下來。
追上去只會再開展一場沒有結果的對罵。
「唉......」看著她們倆的背影，他只好長歎一聲作結。
「算啦，對住呢啲人冇得唔算。」Samuel無奈的拍拍Ken的肩膀。
「唉，我都唔明啲人點解可以咁。點解你仲可以咁冷靜？」
「可能見得多呢啲人掛，激動都冇用。你著緊佢都唔著緊......」Samuel無奈的說道。
我們三人都不自覺的沉默起來。
「呢個時間應該冇乜人黎，不如你地都出去玩下抖下氣？」Samuel忽然提議。
「唔啦，我唔同小朋友爭野玩。」Ken一口拒絕，他好像還是對剛剛的事耿耿於懷，因激動而發紅的臉還沒有褪色。
我見Ken一副不快的樣子，Samuel不知如何是好，然後向我打眼色。
「Ken，我想出去行下抖下氣，不如你陪我？」我拉著Ken的手臂。
「唔啦。」Ken一口決絕的說。
「黎啦，陪我行下啦。」我就像小孩般拉著Ken的手，然後看著Ken生氣的臉。
「黎啦......」
「唉，好喇，好喇，怕左你。」Ken還是屈服了。
我一直拉著Ken的手臂，然後走進人群中。
身旁都是小孩和家長，好像只有我們兩個年青人，這顯得的我們格格不入。
而我，卻像個小孩般到處走，看看不同的攤位。這樣的場合對我來說很新鮮，因為自小母親獨立照顧我和我弟弟，我們從來沒有時間一家人去玩。
Ken好像不感興趣，他還是一副被逼的樣子，還拖著腳步。
「你係咪唔想玩姐？做乜出黎玩都唔開心？」我問，其實我看得出，他的氣還沒有消。
「冇啊。」他刻意擠出笑容。
「我地去玩掉彩虹，好似冇乜人。」他雀躍的說，然後急步走向彩虹攤位。