不如我們分開一年,好嗎?: 第二十章
詠琳真的有回答我?
我努力搜索著自己的記憶。
***
詠琳聽到後,掩著嘴巴,一臉驚訝,但又很快回復平靜,然後便一直盯著我。
你不要這樣看著我好嗎?你再不回覆我,我怕我會被嚇得心臟病發……
她向後退了兩步,然後,面上掛上了一個笑容。
「哈哈!」
便轉身離開了。
***
我很記得她當時只是哈哈了兩聲就離開。若果她是說了一大堆話,也或許真的有很隱晦的答過我;「哈哈」……我真的什麼也想不到。
而日子依然是這樣過。我們依然會早也相見,她依然是這麼主動。
「係喎,你有無諗住去ball呀?」詠琳問我。
「咁尷尬,唔去喇。」
「我諗住去呀,去識下人都好……你真係唔去?」
我聽到她說要去聖誕舞會,心裏一沉。一想到詠琳要和其他男孩有身體接觸,我便無名火起。
但是……我又能以什麼身分叫她不要去?
我只得搖搖頭。
「但係可能好好玩架喎!你真係唔去?」
我不明白為何她要問我三次。我依舊是搖搖頭。
「係咁我搵第二個去架喇……?」
「去囉。」
反而詠琳聽到我的答覆後,好像有點不開心。她真有這麼想我去舞會嗎?
「係呀,我問咗屋企人,平安夜我得閒……嗰晚一齊食飯?」
她聽到以後,又是有點驚訝,但是很快又回復平靜,然後嫣然一笑。
就好像她聽到我表白那時候一樣。
「唔好意思呀,我嗰晚係預留咗俾一個人……我諗住陣間約佢,所以而家要拒絕咗你先喇。」
「好啦,唔緊要。」我略帶失望地說。
「話說呢……」她忽然提高了聲線。「我之前咪話想聖誕節約你出嚟嘅,我預留咗平安夜俾你喇!唔知你嗰晚賞唔賞面同我去食餐飯行下街呢?頭先有個傻仔約我平安夜食飯,我拒絕咗佢架喇!」
我努力忍著不笑,但還是笑了出來。
「好呀!」
「係咁約定你架喇!唔好放我飛機喎!」
「其實呢……點解你成日講嘢都咁玄?」雖然她剛才真的把我逗得很開心,但我不明白為什麼她每次也不肯直接答應或拒絕……包括那一次。
「真係好玄咩……?其實你係咪仲未明白我個答覆?」
我點了點頭。
「但係我真係唔想親自解釋……」她神色凝重地說。「雖然我都知道我嘅答覆有啲難明,但係……如果你了解我多啲,你應該會明白架。我一路都覺得兩個人相處,一定要互相了解對方。唔知你願唔願意為咗我……而去努力解開我嘅答覆?」
她再一次沒有回答我的問題。但是她又說得不無道理,我對她的認識實在太少了,連她喜歡什麼討厭什麼也不太清楚。也許當我了解清楚過後,就能解開她的答覆?
「為咗證明我係鍾意你,我會努力明白你俾我個答覆。請你俾啲時間我,俾我用心了解你,可以嘛?」
她甜笑了。「俾多粒朱古力你食喇!」
這顆朱古力,終於不再是苦澀的。