不如我們分開一年，好嗎？: 第十九章

詠琳的答案不但沒有理清我的思路，反而令我思緒更混亂。她是何時回答了我的？

可是，我實在沒法撕破面皮再問下去，只好沉默不語，努力裝作沒事發生……正如她所說的一般。

「呢兩晚我都瞓得唔好，我想休息吓先。」詠琳說罷，就把頭挨在我肩上。

她頭髮的芳香撲鼻而來，我沒辦法不去注意她。

為什麼你可以裝作沒事發生？要我把心底的愛慕壓抑着，每天若無其事地面對你……





我沒有信心做得到。

差不多到站了，她依然是沒有醒。

「落車喇。」

她悠悠地睜開眼睛。「唔該。」

下了車，詠琳碰巧遇見她的朋友，便會合他們一起上學。





連再見也沒有跟我說。

明白的。不想讓你的朋友知道我的存在嘛，明白的。

明白的。不想讓我難做，因此沒有直接拒絕我，明白的。

但是為什麼你又要繼續跟我一起上學？為什麼你又要繼續餵我吃朱古力？為什麼又要挨在我的肩膊睡覺？

其實我很明白。我很清楚自己是什麼都不明白的。





我試着求助於文謙。他說他也什麼也解讀不了。

「你個詠琳真係好難捉摸……我估唔到你單刀直入咁問佢佢都可以唔答你。」

「係咁我應該點做？應該刻意避開佢？」

「你唔覺得要刻意避開一個自己鍾意嘅人，好痛苦咩？」

「但係要繼續扮無事日日咁面對佢都好痛苦……」

「你捨得放手咪日日避開佢囉。但係你捨得咩？」

愛情真的很像毒品。明知道可能被它傷害，你還是要情不自禁地觸碰它。可能還是要弄得自己傷痕纍纍，才會迫不得已地放手。

＊＊＊





又是早上。又要見到詠琳。

「係喎，你聖誕節有冇嘢做呀？」詠琳問我。

「同屋企人過聖誕囉，同埋要溫書囉。」我照直回答。

「哦……我想搵晚同你食下飯行下街啫，如果你無時間就無辦法啦。」她略帶失望地說。

其實我不是真的這麼忙，但……我不知道應不應該答應她。

「去啦，點解唔去啫？」文謙聽到我的疑惑，反應頗大。

「我真係唔知道去唔去好……我根本就唔知點解佢要約我。」





「你可唔可以理性少少諗嘢呢？家陣詠琳係你鍾意嘅女仔，咁你都唔同佢過聖誕節？你真係唔知佢想點就更加應該去，我覺得佢無理由無緣無故約你聖誕節去街。人地都有自己嘅朋友，做乜係都要搵你？」

「係咁我都知，其實我覺得佢根本就係做緊一個女朋友做嘅嘢，只不過……佢唔係我女朋友咁解。」

「咁……或者諗下點解佢唔直接應承你，又或者……其實佢真係答咗你，不過你無發覺到？」