[愛情] 心連心 (粵語): 6. 第八日
今日我特別打扮，化咗少少妝，因為我發覺自己如果完全唔化妝嘅話，同我本身自己男仔個樣真係超似，所以希望化個淡妝可以增加個分別。
我特別揀咗條海水藍短裙，突顯我嘅超長腳，咁就唔會同我自己男仔個樣有任何相似啦。
我係比起同小雲約嘅時間早到咗好多，因為我想見到佢哋多啲。
去到舖頭，其實係一間中式餐廳，我阿爸係老闆兼主廚，我阿媽係前台兼收銀，而我家姐？佢另外有分工，有時夜晚會客串一陣嘅。
我一入門口，我就聽到我阿媽把聲：「小姐，幾位呀？」
我不其然咁望一望佢，雖然都係冇見十日咁上下，但係就好似好耐冇見咁。
佢依然都係盛妝出場，不失阿媽佢本身嘅姿色。
我微笑：「兩位吖，唔該。」
阿媽佢話：「好呀，兩位，小姐妳好生面口喎，應該唔係住喺哩區？」
我阿媽佢記客人好叻，差唔多大部分熟客同附近嘅人佢都記住唔少。
我真係好服佢哩樣能力：「呀，係呀，係朋友介紹我過嚟食嘅，我第一次過嚟㗎。」
阿媽佢話：「哦，咁好呀，咁妳得閒多啲嚟幫襯喇。妳跟住嗰個企枱，佢會帶妳過去坐。」
間餐廳話大唔大，話細唔細，我阿爸叻就叻在，佢嘅廚藝真係可以精心到出咗名，除咗哩間總店，仲有兩間分店。
重點係，間餐廳嘅廚房係學西式咁，用開放式俾人知道係真材實料嘅。
我望入廚房，其實我阿爸好易認，個身型好明顯，因為我成家人都好高。
見到佢一直指揮同親自落廚，佢係有一種佢獨有嘅神態。
我坐低，個企枱走咗之後，跟住我竟然見到子恩行緊埋嚟。
佢行埋嚟我度：「嘩，化埋妝嘅？返嚟舖頭唔通知聲我？」
我又奇怪，佢點會係度嘅？
佢好似知道我諗咩：「我今日有啲時間咪嚟舖頭幫手囉，你兩位呀？約咗咩人呀？」
我回佢：「妳都識嘅。」
佢諗一諗：「啫喱？小櫻？」
當我想講嘅時候，佢話：「唔會係小雲呀嘛？我好耐冇見佢啦。」
我同佢開玩笑：「要唔要我介紹佢俾妳識呀？」
佢笑：「都好呀，其實我都有好多嘢想同佢講。」
我話：「但係妳係男仔嚟喎。」
佢歎氣：「咁冇計啦，你同我好好對佢呀，佢都係我一個好重要嘅朋友。」
我話：「妳放心，其實我都可以介紹俾妳㗎，咁妳都可以同佢做朋友嘅啫。」
佢回：「算啦，我都想一心做好男仔子恩哩個身分，如果再同自己以前嘅人有交集，就好難分得出個感情應該擺喺邊。」
我都好明白佢個心態：「咁又係，但係妳都可以同佢普通朋友啫？」
佢笑：「你唔好玩我啦，我真係唔想。」
我話：「好喇，我唔玩你啦。」
佢話：「係喎，家姐今晚會返嚟舖頭。」
佢咁講啫係話我今晚可以過嚟見一見我家姐。
我話：「再講啦，我今晚再嚟好似誇張咗啲。」
佢微笑：「你鍾意啦。」
今日晏晝冇想像中咁多人，我阿爸佢有時忙完廚房係會行出嚟同啲客人傾吓偈嘅。
我見到子恩企喺我阿媽隔離，佢哋有傾有講。
我個心其實都幾葡萄㗎，因為我哩個身分，我再唔可以好似以前咁同自己原來嘅屋企一齊生活。
我個位係可以直望到門口嘅，哩個時候我見到小雲到咗。
而我都見到子恩佢嘅眼神係幾咁無耐，佢帶住小雲嚟到。
小雲一見到我：「阿恩，妳識嚟哩度食嘢嘅咩，我哩區都好少嚟。」
我見到子恩走開咗：「我上網搵到話哩間餐廳唔錯吖嘛。」
佢坐低：「咁有咩好食㗎？」
我諗咗一諗：「妳等一陣，我叫人過嚟介紹。」
我向住子恩揮手：「唔該。」
子恩停咗一停，佢眼神望咗我一眼，跟住又瞄一瞄小雲，好似猶疑緊好唔好過嚟。
我對佢再一次揮手，示意佢過嚟。
佢過嚟嗰陣係一直望住小雲，好彩小雲睇緊菜單啫，唔係就真係會嚇親小雲。
佢一過到嚟：「係，兩位小姐，我可以有咩幫到妳哋？」 小
雲望一望佢之後，佢用腳撞一撞我。 我應該估到佢想講咩，但係我都係俾佢哋機會講嘢。
我同小雲講：「妳問吓人哩度有咩好食？」
小雲對子恩問：「靚仔呀，哩度有咩好介紹呀？」
我感覺子恩好盡量掩飾自己嘅心情，佢望住小雲：「我哋哩度有好多類型嘅菜式喎，妳較為鍾意食邊類型？海鮮類有魚蝦蟹，肉類有牛羊豬雞。」
其實子恩同我都知道小雲係偏好鍾意海鮮嘅，尤其係蝦。
子恩繼續介紹：「其實今日我哋特別有嚟咗批靚嘅伊勢蝦，妳哋有冇興趣？」
小雲答：「伊勢蝦？又好喎，阿恩妳有冇意見？」
子恩聽到以為小雲問佢：「冇...」
我即刻幫手：「我冇問題。」
我見到小雲留意到子恩個反應，但係小雲冇出聲。
我同子恩講：「咁呀，唔該兩分伊勢蝦廚師版吖。」
子恩連把聲都有少少震震哋：「好吖，我同妳哋落order，多謝兩位。」
子恩緊張到仲唔記得收番個餐牌。
子恩一走開，小雲就同我講：「阿恩，妳覺唔覺得佢好似妳呀？」
我試探小雲：「係咩？睇落咪同普通男仔差唔多。」
佢望向子恩嗰方向：「唔係喎，你哋有七八成似。」
我話：「有冇咁誇張呀？」
小雲繼續：「同埋，頭先我留意到，當我問你意見嗰陣，唔知點解佢都應埋一份。」
我望住小雲：「做咩咁留意哩個男仔呀？妳鍾意嗰type？」
小雲諗咗一諗：「唔係喎，越睇佢，覺得你哋超似樣。」
我問：「做咩啫，妳想識佢咩？妳想嘅話我再嗌佢過嚟吖。」
點知我未做任何嘢，小雲竟然舉手叫子恩過嚟。
咩咁主動呀，小雲。 子恩過到嚟：「有咩幫到妳哋？」
小雲好似發現新大陸咁望住子恩，其實子恩唔係咁好意思，係冇正面望小雲嘅。
小雲其實都唔想搞到咁唔好意思：「靚仔呀，我哋個係套餐嚟個呵？」
子恩仲係度緊張：「呀，係呀，唔好意思，頭先我冇講到。個廚師版係套餐嚟，有包括前菜、餐湯、主餐，同甜品嘅。」
佢講完個眼仲瞄一瞄我，好似我唔應該嚟咁。
我再諗深一層，又係嘅，如果我係佢，其實真係唔多點想同本身生活嘅人再有交集，最驚係有咗感情之後，跟住因為男女問題會産生令本身朋友關係發生問題嘅話都係好煩。
小雲係個女仔，本身仲係子恩個閨密，而依家子恩變咗男仔，係好難做到閨密，如果結果唔好，仲有可能傷到子恩個心，始終唔係一件太好嘅事。
我同子恩講：「唔該晒你呀，唔好意思又麻煩咗你。」
子恩點一點頭就走咗。
小雲見佢走咗：「阿恩今日妳化咗妝咋，如果唔係，話你哋兩個係孖嘅都有人信。」
我笑：「妳越講越誇張。」
我哋跟住轉番自己嘅話題，直到上菜。 前菜係同個湯一齊上嘅，我其實都有一段時間冇試過阿爸嘅手勢啦。
小雲驚訝：「嘩，好精緻又好好食呀！」
對我嚟講，係一個好懷念嘅感覺。
跟住嚟嘅係主菜，其實今日嘅伊勢蝦係阿爸嘅得意拿手嘅菜式，我記得以前細個等閂舖先食飯，佢係會將啲淨貨整埋俾我哋食，而有時伊勢蝦會淨低一隻，成家人會將隻蝦讓俾我。
哩個時候，我阿爸竟然由廚房走咗出嚟，佢冇行埋我哋張枱，而係走到阿媽同子恩身邊。
小雲食咗伊勢蝦之後，佢完全係將個主菜形容好食到天上有地下無咁，佢話有機會一定返嚟食。
咁梗係啦，哩一味，係鎮店之寶，就係哩樣令到個餐廳不停咁有生意，唔係點養起我哋成頭家。
食埋個甜品，我先發現子恩已經走咗。
我同小雲好滿足咁攞住張單出去前台埋單，小雲仲話哩餐應該佢請，但係嗌佢出嚟嗰個係我，邊會俾佢埋單㗎。
喺找數嗰陣，阿媽佢望咗我幾下，笑咗笑：「阿靚女，妳同我個仔都幾似樣喎。」
我都笑咗笑，佢仲話：「咦，你哋都係咁上下高噃。」
小雲仲一邊附和：「唔知邊個高啲呢？」
我對住小雲：「梗係我高啲。」
當我哋走咗出餐廳，我聽到一把聲，係阿爸，佢離遠講咗一句嚇親我嘅一句話：「恩仔，你唔係已經走咗喇咩？」
小雲回頭：「講笑吓話，個男仔又係叫阿恩？」
我回頭對住阿爸講：「阿叔你認錯人啦。」佢仲同我揮手。
我拉一拉小雲講：「世上巧合嘅嘢咁多，無奇不有啫。」
小雲回我：「但係哩個叫阿恩嘅男仔，係仲同妳嘅相似度有好高添喎。」
我回：「妳冇聽過咩叫如有雷同，實屬巧合咩？再講，叫阿恩嘅人天下之多，男女都得。」
小雲點頭：「咁又係。」
其實嚟咗哩次，我諗我都唔會再嚟，因為我發覺，我亦都有子恩同一個心態：「唔想破壞本來嘅感覺，尤其係屋企人嘅感覺。」
今晚子恩問我幾時嚟完M，今日佢喺餐廳見到我個臉色都好正常。
我話已經第四日囉，已經差唔多完，都冇頭兩日咁誇張。
咁佢話嚟完先約啦。 最後我係嚟咗六日M。
後面兩日完全屬於M尾，係毫無痛楚。
但係我又諗，下個月又重新又嚟一次哩種往返人間同地獄嘅過程，真係會癲。 再過多兩日先約子恩啦，想好好咁唞一唞。