只想和你愛一次: 42. Ada的目的

第二天，當Elven正苦惱該怎樣和Ada交待才可把對她的傷害減至最低時，卻首先收到Ada的message。
 
「Honey，聽日星期六唔駛返工，今晚可唔可以同我去睇日出?」
 
「做咩突然咁有興致? 唔驚眼瞓?」Elven問。
 
Ada:「唔驚呀~ 突然間好想同你去睇日出…」
 
「咁好啦，今晚嚟接你。」也想留個美好回憶給大家，於是Elven爽快便答應了。
 




 
這晚零晨時分，Elven和Ada來到清水灣席地而坐等待著日出的來臨。
 
「Honey，唔經唔覺，原來我地都一齊咗10年…」倚傍在Elven膊上，Ada突然說道。
 
「係喎，原來唔經唔覺都10年，好似過咗好耐但又好似過得好快咁…」Elven有感而發。
 
Ada:「哩10年你過得開唔開心?」
 
「梗係開心啦，你咁錫我對我咁好~」Elven由衷說道。這10年間，Ada確實一直對自己很好。




 
「嘻嘻~ 哩10年我都好開心~」Ada亦甜甜地說。
 
(可惜我應該陪唔到你過多10年喇…對唔住…)  這時Elven心裏突然一痛。
 
「你知唔知點解我突然想同你睇日出? 其實係之前你約我㗎~」Ada很快又續說到。
 
「我約你? 幾時?」Elven想不起自己甚麼時候有約過Ada。
 
(你果然已經唔記得…) Ada神色突然一黯心裏想道。




 
「對唔住…」Elven看見Ada面露失望的表情後說道。
 
「沒有Ada的日子 第465日」Ada嘴裏突然說了一句。
 
聽到後Elven大吃一驚望著Ada。
 
「Ada 你…」
 
Ada用手指掩著Elven的嘴巴阻止了他說下去。
 
「你果然已經恢復咗記憶… 我知你有好多問題，不過可唔可以一心一意陪我睇埋日出先再問?」說完Ada便放開了手。
 
「好…」雖然震驚，但Elven還是尊重Ada的意願，而且經Ada提點後，Elven開始有回對這約定的印象。
 




心裏縱使有千言萬語，但二人就這樣靜靜地互相倚傍著等待日出的來臨。
 
 
「日出真係好靚…」當太陽從海岸線緩緩升起，世界由漆黑一片慢慢回復了不同的色彩，Ada感慨地說道。
 
「嗯…日出嘅陽光唔刺眼好柔和，好似喚醒緊世間萬物，話比佢地聽無論之前有幾黑暗都好，世界仍然係充滿住希望…」Elven望著橙黃色的太陽亦讚嘆道。
 
「咁包唔包括我地嘅愛情?」Ada突然問了一句。
 
「Ada…」
 
「其實我知你已經揀咗Rachel…」Ada很冷靜地說出。
 
「點解你會知?」Elven大吃一驚。
 




「因為當你有決定嗰一刻亦代表我黎哩度嘅目的已經完成…」Ada緩緩說出。
 
接著Ada把自己在尖咀海傍遇見老婆婆的事告訴了Elven (詳見第三部7. 不知道的事與軼事一則)，又描述了跟老婆婆入到實驗室後所發生的事。
 
當Ada跟老年Rachel來到秘密實驗室，她很快便看見了Elven和一個女仔分別裝在兩個玻璃容器裏。
 
「到底發生咩事? 點解佢地會喺度?」Ada走到裝著Elven的容器旁，望著Elven焦急地問道。
 
老年Rachel把整件事的前因後果，自己掌握的技術，還有Elven和Rachel各自的故事簡略地告訴了Ada。
 
「原來佢就係Rachel…」望著Rachel的容器Ada說道。
 
「知道咗佢地嘅故事後，你係咪仲想過去?」老年Rachel問道。
 
「嗯… 我都係想努力試下，睇下結局可唔可以改變。」想了一會後Ada下定了決心。




 
「咁可唔可以問下你個目的係咩?」老年Rachel問。
 
「其實我唔係一定要Elven繼續同我一齊，無論最後Elven係揀Rachel定係我都好，只要佢可以搵到自己嘅真愛，過得開心快樂就足夠喇…」Ada望著Elven充滿感情地說。
 
老年Rachel:「真係咁大方?」
 
「始終一開始係我對唔住佢先，只係睇完嗰600封信我先意識到當時Elven原來有幾咁愛我，同時亦喚醒返我好多回憶同埋感情。我都想知如果一切可以從頭嚟過，我同佢分開嘅結局會唔會可以改變。如果可以，我想有另一個世界嘅結局係我同佢可以白頭到老…
 
不過知道咗佢同Rachel之後嘅故事，我又無理由故意要去破壞佢地嘅可能性， 因為比起個人自私嘅願望，Elven搵到佢嘅幸福對我嚟講先係最重要，所以無論最後結局係我定Rachel都好，只要佢幸福就得喇…」Ada緩緩說道。
 
「我開始明白點解嗰陣Elven會咁鍾意你… 好啦，我明白喇，哩度有粒藥，食咗你就可以開始去尋找你嘅答案。」老年Rachel把藥交了給Ada。
 
「所以當我決定咗同Rachel一齊，代表你嚟嘅目的都已經達成，然後就恢復咗原本世界嘅記憶?」聽畢，Elven問道。
 




Ada:「係… 同埋既然最後結果係咁，我都決定咗會返返去原本個世界喇，過多幾日哩個世界嘅我就會忘記返上一個世界嘅嘢。」
 
「Ada，對唔住… 同埋多謝你…」Elven充滿著內疚和感激。
 
Ada:「傻啦，只係我終於明白有啲嘢錯咗timing miss out咗，無論你之後幾努力都永遠返唔到轉頭… 睇完你嗰幾百封信，我先知我令你經歷咗啲咩，亦明白Rachel對你有咩意義… 所以老土啲講句係因為之前我自己種嘅因，先會有今日自己所受嘅果，無得怨嘅~
 
而且換個角度諗，哩幾年可以重新同你一齊多咗幾年，其實已經賺咗，應該要知足。你都唔好怪今世嘅Ada嗰陣暪住你啦，因為佢未有我地之後嘅經歷，但又感受到我嘅不安先會咁啫…」
 
「放心啦，我好明白，無論點，我仍然好感激我可以遇到你同你有過咁多難忘嘅回憶同經歷，無你就唔會有今日嘅我…」Elven 把Ada緊緊抱在懷內。
 
「我都係，多謝你曾經愛過我…」Ada回抱著Elven的同時眼淚亦開始流下。
 
兩人就這樣相擁著直至太陽完全升起。
 
 
「好啦，我走喇，希望你同Rachel可以永遠幸福快樂~ 放心啦，走前哩幾日我會盡力影響原本嘅的Ada返英國過佢想過嘅生活。 」Ada推開了Elven，抹了抹臉上的眼淚說道。
 
「多謝… 我都希望你以後可以搵到一個更值得你愛同愛你嘅人，永遠幸福快樂 …」Elven同樣感觸落淚並送上真誠的祝福。
 
「我信我可以㗎~ 啊，差啲唔記得咗，嗰個老婆婆最後仲同我講咗一段說話…」Ada突然想起。
 
“最後如果你地有人決定咗唔再返嚟哩個世界，我其實仲有兩粒禁藥可以令你地將自己同另一個世界嘅靈魂完全融合，一經融合兩個靈魂嘅記憶就唔會再被封印，即係以後都會記得哩度同嗰個世界嘅所有記憶，係我個女偷偷地研究出嚟無人知㗎... 你地最後可以決定要定唔要，不過就得兩粒。如果決定想要，你地就去返尖咀海傍，不斷諗住”香港人加油!”，之後自然有人會出現將兩粒藥交比你地㗎喇。”
 
 
「竟然仲有個咁嘅option? 多謝你話我聽， 我會同Rachel傾下。不過點解係”香港人加油”咁得意?」Elven驚奇。
 
「我都有問佢，佢好傷感咁話過多十年後我地就會知，仲喃喃自語係咁講”記住千祈唔好慣，唔係就永遠返唔到轉頭㗎喇…”。」Ada回憶著當時情況說。
 
「明白…」
 
「好啦，咁我走喇，保重喇Honey…」沉默了一會，依依不捨地望了Elven最後一眼，Ada下定了最後決心講再見。
 
「你都要保重…」
 
(原來你最後都有睇晒嗰600封信… 再見喇，我永遠嘅初戀…) 望著Ada的背影，一滴淚水再次劃過Elven的臉龐。
 
 
“沒有Ada的日子 第465日 晴
 
今日零晨3點幾，突然比幾個hallmate摑醒捉咗我去睇日出，本身我完全無興趣㗎，不過受唔住佢地嘅逼迫，只可以死死地氣跟佢地一齊去。去嘅整過過程我都係昏昏欲睡，直至真係見到個咸蛋黃慢慢由地平線走出嚟嗰刻，天色由黑變紫再到金黃，嗰種震憾令我成個人即刻醒晒，真係好靚… 而且望住個太陽出嚟，周圍由黑變光再到彩色，個人真係好似即刻有返活力同希望咁!
 
嗰刻我第一個反應係如果你喺身邊就好喇… 點解我地一齊咁耐我會無同你睇過日出㗎… 我真係好失敗! 如果有日我地真係可以復合，我一定要同你去睇日出，仲要去晒香港唔同嘅地方睇! Ada，己經過咗年幾喇，我真係好掛住你… 到底仲要過多幾多個日出，你先會返嚟我身邊? 定係隨著每過多一個日出，代表嘅只係我地嘅距離都越嚟越遠?  唔會㗎… 無論依家幾黑暗都好，我信黎明都一定會嚟㗎，係咪? 我信係咁㗎!
 
睇完日出之後，我地又…”