只想和你愛一次: 43. 夢想成真

「原來Ada返黎嘅目的係咁…」這晚Elven和Rachel晚飯並把和Ada這天發生的所有事都告訴了她。
 
Elven:「嗯… 估唔到哩件事最後會以咁嘅形式解決…」
 
「咁你有咩感受呀? 知道自己之前嘅痴情原來唔係完全無作用~」感受到Elven心情沉重，Rachel故意取笑Elven。
 
「咁同Ada成個故事嘅結局好似都真係變得圓滿咗嘅… 不過其實我又覺得都係有啲 timing因素喺入面。如果唔係我嘅”死訊”，Ada就算知道啲信嘅存在可能都無咁大反應…」Elven冷靜分析道。
 
Rachel:「有啲嘢係整定嘅~ 不過無論點我相信佢對你嘅感情都係真，唔係佢最後個目的唔會可以咁灑脫…」
 




Elven:「咁哩點我從來無懷疑過… 佢一直對我都好好，真係一個好好嘅女朋友， 所以之前就算佢傷害咗我，我都無恨過佢，只可以話係大家有緣無份…」
 
Rachel:「某程度上，其實我同你嘅感情都可以話係佢同Daniel造成。無佢當日對你嘅決絕，我同你嘅相遇唔會係咁，而無Daniel對我嘅傷害，我同你嘅後續亦唔會好似依家咁… 然後最後Ada又嚟到哩個世界，影響咗成個故事發展，哩筆帳真係好奇妙…」
 
「我相信每件事發生其實都有佢嘅因由同埋影響，只係我地有無發現其中嘅奧秘咁解啫… 點都好，我相信以前嘅事可以告一段落喇，係時候要珍惜現在做返啲依家要做嘅嘢~」說完Elven向一個waiter示意，waiter便從一個屏風後拿出了一紮鮮花交給Elven。
 
「記唔記你曾經講過要我係送就有誠意啲送紮真係比你嘅你? 你睇我今次幾有誠意~ Rachel，我好想正式咁問你一次，你可唔可以做我女朋友?」Elven把花遞給Rachel，然後很真誠地問道。
 
「我有無同你講過你其中一樣最令我touching嘅嘢係咩?」接收了花，Rachel望著它們向Elven問道。
 




「無呀，係咩?」Elven一臉期待和好奇。
 
Rachel:「你好似真係永遠都會記得我講過嘅每一句說話咁… 嗰陣睇完你記低我地發生嘅事嗰本故事畫冊後我真係好震憾，好多我唔記得嘅野你都可以好清楚咁將所有細節同每一句說話寫返晒出嚟…」
 
「因為我真係好鍾意好鍾意你呀嘛， 自然會對關於你嘅所有嘢都好上心同重視~」Elven 柔聲說道。
 
Rachel:「所以嗰陣咪唔小心有少少比你感動到囉~」
 
「咁你答案係?」Elven追問。
 




Rachel:「嗯… 如果你可以應承同我做一件事我就答應你啦~」
 
Elven:「好呀，莫講係一件，就算係一萬件我都會應承你~」
 
Rachel:「唔駛咁多喇， 你為我做嘅已經夠多… 我只係想你今晚同我去睇多次日出咋~」
 
Elven:「竟然係咁!?  哈哈，無問題! 我真係好開心呀~ 」
 
Rachel:「點解咁開心? 」
 
Elven:「因為我嘅夢中情人終於會呷我醋! 」
 
「傻瓜~」被識穿了的Rachel面帶點紅說道。
 
 




在Elven和Rachel看日出的一星期後，在一個教會聚會上，Rachel再次碰上Daniel。當晚，Daniel主動whatsapp了Rachel。
 
Daniel: 「冷靜咗一星期多後，我發覺我其實仲係好鍾意你唔想同你分開… 我地可唔可以比多次機會大家努力試多次?」
 
Rachel: 「如果我話我可能要9年後先答到你，你會唔會等我?」
 
Daniel: 「點解咁問?。」
 
Rachel: 「你答咗我先啦。」
 
Daniel: 「9年我諗我唔會。」
 
Rachel猶豫了一會，然後面帶微笑覆道: 「咁我諗我都唔會了。」
 
 




 
 
同時間，在原本的世界
 
Ada緩緩打開眼睛，映入眼廉的是老婆婆的面孔。
 
「你醒嗱?」老婆婆看見Ada醒後問道。
 
「婆婆? 點解我突然訓著咗嘅?」Ada打開眼發覺自己正坐在尖咀海邊一張長椅上倚傍著老婆婆。
 
「唔知呀，頭先你同我講完故仔後就突然暈咗咁，不過我見你好似係瞓著咗仲有鼻鼾聲，咪諗住等你休息陣再睇下點囉。」婆婆說道。
 
「我瞓咗幾耐?」Ada望了一望錶問。
 
老婆婆:「都有二三十分鐘呀…」




 
「咁短? 感覺我好似發咗個好長嘅夢咁…」Ada很驚訝。
 
老婆婆:「哦? 可唔可以講下個夢係點?」
 
「我夢見返咗去同Elven一齊嘅時間，我為咗佢仲返返嚟香港讀書，我地好開心咁一齊多咗幾年，不過最後我地都係分手收場…」Ada一邊嘗試回憶一邊說道。
 
老婆婆:「咁你有無好唔開心?」
 
「少少啦… 不過我好似明白咗啲野。」Ada若有所思地答。
 
老婆婆:「明白咗啲咩?」
 
Ada:「有啲錯發生咗，無論你點努力都係改變唔到，所以只可以學識接受… 不過唔知點解我有個強烈感覺Elven正喺另一個世界好幸福咁生活緊...」
 




老婆婆:「咁你有咩打算? 我相信Elven無論喺邊都好希望你可以搵到自己嘅幸福。」
 
Ada:「懷緬完Elven，我會返返去英國喇… 婆婆多謝你陪咗我咁耐呀，瞓完啱啱嗰覺，我心情唔知點解好返好多了。」
 
「阿婆都好多謝你講咗咁多故事我聽， 出咗嚟咁耐我諗我都係時候返屋企喇…」老婆婆也有點感慨。
 
「你住邊? 駛唔駛我送你返去?」Ada好心問道。
 
「呵呵，唔駛喇，阿婆住嗰度你去唔到㗎~」老婆婆一臉神秘地說。
 
「咁特別? 咁你自己小心啲啦，我走喇，Byebye~」Ada卻以為阿婆說笑沒太在意。
 
老婆婆:「Byebye喇Ada..」
 
 
走了幾步Ada突然醒起甚麼拎轉身想再問婆婆，但發覺怎樣找都再找不到婆婆的身影。
 
(點解佢會知我叫Ada?)
 
又再走了幾步剛剛的影像與玻璃容器的影像突然在Ada腦海中重疊，Ada停了步再向後望
 
(佢係Rachel?)
 
 
 
 
10個月後，在另一世界，伴隨著一聲嬰啼娃娃落地一個嬰兒在醫院降臨人間。
 
「老婆，辛苦你喇…」
 
「唔辛苦…以後我同BB就靠你㗎喇…」
 
「放心交比我啦，我會好好照顧你地! 其實之前一段時間我曾經好後悔無聽阿媽講要做好安全措施，但見到你地哩一刻，我突然好慶幸我無咁做到…」(見第三部7. 不知道的事與軼事一則)
 
「仲好講! 第一次無事其實已經好好彩，點知第二次我地都仲唔識死… 一諗起我地父母知道後想殺咗我地嘅樣我到依家都仲驚緊呀...」
 
「哈哈 … 你唔記得我地之前成日講嘅second chance咩? 第二次對我地黎講成功率可能係特別高... 放心啦，佢地一見到個孫實笑到見牙唔見眼，你睇佢幾得意~ 不過講開second chance，我近排諗如果可以比我揀多次，當初我返黎就唔會再定嗰個目標喇。」
 
「唔想同我愛一次喇? 咁你想改做咩?」Rachel略為生氣地問。
 
「只想和你愛一世。」Elven笑著答。
 
「傻瓜…」Rachel立即怒氣全消。
 
「你get到我意思?」Elven問。
 
「咁到我地哩世完結，目的達成後就可以揀返返去原本個世界，然後再愛多一世喇…」Rachel甜甜地笑著道。
 
「另外我想叫我地個仔做”承影”…」
 
「好呀，始終我地背負著嘅其實仲有兩個”影子”嘛，我地唔可以忘記…」
 
男子溫柔地望著這個和自己同部率永遠接近一百的女子，然後緊緊抱著她和BB。這刻，他真的很感激上天和當日遇上的老婆婆，全靠她，自己早已幻滅的夢想才有機會實現。
 
 
 
第三部 完