只想和你愛一次: 11. 去Ball與踢Ball

收到這訊息Elven固然感到開心，但同一時間他亦有點為難要如何開口告訴Rachel，不過醜婦終須見家翁，過了一會他還是給Rachel send了一個message。
 
「Rachel，sorry呀，Ada啱啱同我講佢ball嗰日返得切嚟呀，所以我邀請唔到你去喇，真係好對唔住…」
 
「唔緊要，本身就應該係你地去㗎啦~  記住玩得開心啲影多啲靚相比我睇下!」失望的Rachel裝作沒事回覆。
 
「好呀... 遲啲請你食飯補返數!」Elven還是感到很抱歉。
 
「唔駛啦傻佬~」
 




 
(所謂後備，本身就應該要有正選返嚟自己就要讓位嘅自覺㗎啦…)
 
回完message後Rachel慢慢走到衣櫃前打開了櫃門，然後望著新買的晚裝默默在想。
 
這結果對Rachel而言固然是十分失望，但更多可能是提醒和當頭棒喝。
 
 
這時，她的電話響起，是Daniel打來。
 




Daniel:「啱啱經過你樓下，有無興趣落嚟食個糖水呀?」
 
這裏作個補充，其實自從Daniel醒悟後，他便主動找多了Rachel，雙方亦慢慢回復了以前昔日的關係，現在很多時他們都會一起返教會和回家。Elven的出現和提醒，大大縮短了他們互相誤會和迴避的時間，但同時間亦可能改變了讓他們一齊的重要契機，不過那暫時是後話，現在他們的關係還是很要好的朋友，甚至因為喜歡Daniel的感覺被沖淡，Rachel對Daniel的態度更像以前朋友般的自然。
 
「你個樣好似有啲嘢咁喎? 有嘢唔開心?」在糖水鋪Daniel看見Rachel後問道。
 
「唔係呀，可能有啲累啫，做咩放完學咁夜仲唔返屋企?」Rachel否認。
 
「無呀，架車經過哩頭突然諗起你咪搵下你囉~」事情單純只是Daniel掛住Rachel所以找她。
 




「係呢，你嚟緊五號晚有咩做?」Rachel突然醒起。
 
Daniel:「嗰晚有教會足球比賽呀，做咩?」
 
Rachel:「無呀，本身諗住嗰晚約下人咋嘛。」
 
「一係你嚟睇我地比賽? 反正啲人你都識嘅， 比賽後仲可以一齊食飯添~」Daniel乘機提議。
 
Rachel:「好呀，到時睇下點先。」
 
 
到到ball 那天，Elven很早已換好老西先到機場接Ada機，再陪她回家換衫，最後才出發到ball的場地。在等Ada換衫途中，Elven想起自己暫時唯一一次見Ada著晚服，應該是中五時的謝師宴。而今次當他看見Ada換好衣服化好妝出來後簡直是漂亮得驚為天人，然後他突然意識到原來這幾年間Ada的變化真的好大，不知不覺間她已經變得越來越耀眼和自信。
 
「做咩呆晒咁嘅樣呀，我太靚?」看見Elven發呆的樣子，Ada笑著問道。
 




「真係好靚…」Elven忍不住過去抱著Ada並吻了她嘴唇一下。
 
「越嚟越口花花啦你~」Ada笑著說，但明顯很受落Elven的稱讚。
 
「真心㗎~ 同埋我發覺你原來真係變咗好多，同以前好唔同…」Elven說出心中感覺。
 
「有咩唔同?想話我以前好醜定想話我依家肥咗呀?」但在Adal耳中卻覺得這不是讚美。
 
「當然唔係…而係依家嘅你好耀眼同自信，直頭係閃閃生輝~」 Elven一方面為Ada感到驕傲，但同一時間卻又有點失落。
 
「或者去過出面嘅世界，個人睇嘅嘢真係會唔同… 其實你有無諗過將來同我一齊去外國生活?」藉著這機會，Ada提出了心入面一直想問的問題。
 
「有機會我都想感受下，不過一來屋企經濟唔許可，二來第日我都好難扔低屋企人走咗去啦…」Elven露出嚮往的眼神同時帶著無奈的神緒。
 
「咁我都明嘅…」聽到後Ada亦難掩自己的失望。




 
「將來嘅野將來再諗啦，我地出發喇~」不想再糾結這話題，Elven便帶著Ada出發。
 
在原本的世界，情況其實亦一樣，那時Ada初初亦說趕不及回來，而由於當時並沒有和Susan像現在般常常在教會接觸，那時Elven只找了一個不算太熟的大學女同學代替，當之後Ada說能趕及回來，Elven順理成章立刻就把自己的partner換回Ada。
 
「係喎，如果我本身趕唔到返嚟，你諗住搵邊個做partner?」出發途中在車上Ada突然問Elven。
 
「本身仲努力搵緊…好彩幾日前你話返得切嚟我就唔駛再搵啦~」本身Elven打算最後兩日才告訴Ada自己找了Rachel做partner，不過之後Ada說她能回來後他就沒再特別提起，現在Ada問起他不想解釋下意式便說了個謊。
 
「你唔搵Susan 或者Rachel?」Ada奸笑地問道。
 
「知你唔鍾意，未到最後關頭都唔會搵佢地啦~」洗濕了個頭Elven開始一個大話掩蓋另一個大話。
 
「車，我先無咁小氣~」Ada故作不在意，但其實暗地裏很開心Elven在意自己的感受。
 




整個ball的氣氛良好，雖然和hallmates們相識還不到一年，但日對夜對的生活還是讓大家很快已打成一片陪養出一種buddy的感情。當中有個環節是播回一些這一年在hall裏大家的生活照片和片段，亦讓Ada對Elven在hall的生活有了更多的認識，看得津津有味。最後chairman鼓勵大家共同建立更多hall的文化，讓C-Hall成為一間獨一無二的宿舍亦讓Elven產生了一些感動，不過這裏暫且不表。
 
到到跳舞環節，其實Elven這時是從沒跳過舞，所以可謂是一竅不通，只是跟據電視上看見的情節伸出手邀請Ada
 
「May I?」
 
Ada笑笑口把手搭上Elven的手心然後跟他來到舞池中間。
 
「其實...我係完全唔識跳舞㗎...」Elven略帶尷尬擦著鼻子說道。
 
「我知呀~」Ada一副早已估到的樣子。
 
「咁我地點算好?」
 
「你哩隻手放上我膊頭，另一隻手扶住我哩度，我慢慢教你。嗱，你見我哩隻腳搭前你就搭後，然後我哩隻腳搭去右邊，你頭先隻腳又跟住去右邊，之後見我哩隻腳搭後你就搭返前，另一隻腳又跟住，係喇，然後跟我數一二三，二二三，三二三。」Ada很有耐性地`教導Elven，然後很快Elven就掌握到最簡單的舞步。




 
「點解你咁叻嘅?」Elven一路跳一路衷心讚賞著Ada。
 
Ada:「喺英國間中都有哩啲活動，學校有教㗎~」
 
「咁你咪同好多鬼仔跳過...」知道自己不是Ada的第一個，Elven有點失望。
 
「放心啦，學嗰陣我都係同女仔一齊跳㗎咋~」彷彿知道Elven在想甚麼，Ada把頭靠近Elven耳邊細聲說道。
 
「真係嘅?」聽到後Elven立即變回笑容滿面。
 
「唔信就算數！」
 
「信信信~」
 
整個ball就在輕鬆愉快環境下結束。
 
 
另一邊廂，Rachel最後亦因為不想呆在家中胡思亂想而去了維園看教會的足球比賽。雖然一直知Daniel自己有踢開波，但是因自己興趣不大，而Daniel也是近年才加入教會球隊，所以這也是Rachel第一次看Daniel踢波。
 
七對七的硬地足球賽，頻率和節奏也很快，不知是不是因有Rachel支持，Daniel這日狀態大勇，連不太懂得看足球的Rachel也看得出Daniel的厲害，不自覺被他的風彩所吸引。負責中場的他助攻助守，很多時間也能看見足球在他腳下，無論是扭波，遠射還是傳球，通通吸引著觀眾的眼球，結果Daniel以兩助攻兩入球幫助球隊以4:0大勝對手。
 
「一直唔知原來你踢波咁勁㗎?」解散後Rachel走到Daniel旁邊讚賞道。
 
「由細踢到大嘛，而且今日對手比較弱啫。」Daniel像只是訴說著一件很簡單的事。
 
Rachel:「咁謙虛呀，我唔識睇都睇得出成隊係以你做重心啦~」
 
「咁不如你以後嚟睇多啲呀，有你支持我狀態好似會好啲㗎~」提早進化後的Daniel間中開始會說上些略帶曖昧的說話。
 
「哈，睇下點先啦…」Rachel這時卻感到有點不好意思。
 
Daniel:「夜喇，我地去食飯先啦，為咗答謝你專登嚟睇，我請你去銅鑼灣食茶餐廳~」
 
Rachel:「咁好?睇嚟你為咗想我嚟睇多啲真係好dum本喎~」
 
 
當兩人吃完晚飯往巴士站搭車回家途中，卻碰巧碰上了也是往同一個巴士站的Elven與Ada。
 
望著滿有氣質的Ada與俊朗的Elven挽著手並肩走著，Rachel心裏有點不舒服的同時亦不得不承認他們是很合襯的一對。
 
而當Elven望見仍略帶稚氣但靈氣逼人的Rachel與帶點瀟灑不羈的Daniel走在一起，心裏一痛的同時亦同樣覺得他們是滿合適的一對。
 
「咁啱嘅?個ball完咗嗱?」收起不舒服的感覺，Rachel帶著笑容問道。
 
「係呀，諗住搭巴士走喇，你地呢?」Elven同樣笑容滿面答道。同一時間，Ada聽到Rachel的問題則意味深長望了一望Elven。
 
「我啱啱踢完教會比賽，咁啱Rachel無嘢做咪叫佢嚟捧我地場順便一齊食咗個飯囉~ 依家都諗住一齊搭巴士返屋企咋。」Daniel答道。
 
聽到後Elven同樣意味深長笑笑口望了一望Rachel，感覺像是取笑對方因禍得福，然後說
 
「咁開心? 」
 
「無嘢做嚟支持下自己教會咋，下次你地得閒都可以嚟一齊打氣㗎。」不想Elven誤會Rachel嘗試解釋道。
 
Elven:「好呀，踢波我都啱㗎~」
 
Daniel:「係喎，唔醒起你以前好似都踢校隊㗎喎!咁下次我地練波可以叫埋你呀~」
 
「如果佢夠勁捉埋佢入教會幫手踢啦~」Rachel動機不單純地插嘴。
 
Elven:「好呀，不過要睇下夾唔夾到時間先，咦有車喇，再傾啦，我地走先喇，拜拜~」
 
「拜~」
 
 
車上
 
「點解Rachel知我地去ball嘅?你唔係話無問過佢咩?」Ada坐下後便問道。
 
「可能之前有提過下，不過無邀請佢咋嘛...」Elven略帶心虛回應。
 
「真係?」Ada不太相信的樣子。
 
「梗係真啦，你睇佢同Daniel頭先幾開心呀~」Elven裝作沒事自然說道。
 
「嗯...唔知佢地仲要拖到幾時先會一齊呢?」Ada想了想剛剛的情境便不再糾纏。
 
「睇嚟我要再鞭策下Daniel先得喇~一係我地打個賭，你估下次你返嚟嗰陣佢地一齊咗未? 我買一齊咗~」Elven提議。
 
「好呀，咁我買未一齊囉~ 不過賭咩先?」Ada沒所謂地說。
 
然後Elven在Ada耳邊說了句話。
 
「變態佬！」Ada臉紅耳赤說道。
 
 
不久後，Daniel 和Rachel同樣上了巴士。
 
Daniel:「Elven同Ada真係好襯呀~」
 
「係啦...」Rachel認同但高興不起來。
 
「不過Elven都真係一個好人，希望佢地可以克服long D啦~」Daniel想起Elven之前對他的善意提醒，不然到現在他可能還在迴避Rachel，所以心裏對Elven滿是感激。
 
「好人?點解咁講?」Rachel好奇。
 
「無呀...你唔認同咩?你睇佢平時幾錫Ada~」Daniel當然不會告訴Rachel真實原因。
 
「咁都係...」可惜他卻沒留意到自己的說話讓Rachel更悶悶不樂。