只想和你愛一次: 12. Elven與Ada的假期

襯著Ada回到香港，這天Elven和她又來到海洋公園。自從Ada知道Elven在海洋公園揹過Rachel後不時便會哦下Elven，Elven為了早日脫離這折磨這天便決定和她來到這裏希望能減低她對之前那件事的怨念。
 
「Yeah~對上一次同你嚟哩度好似已經係中三嘅事喇...算你總算有啲良心啦~」在門口Ada一臉興奮說道。
 
「係我唔啱係我唔啱，以後實帶多啲你嚟~」本著女朋友永遠是對的的精神Elven繼續認衰仔。
 
「以後你同其他女仔去過咩地方都要帶我去就差唔多~」Ada滿意地說。
 
「你做咩突然醋勁咁勁呀?」Elven從後攬著Ada笑著問道。
 




「唔得呀?你依家係咪話我呀?」Ada又變臉故作生氣。
 
「唔係唔係，你講咩都聽你話~」Elven帶點無奈道。
 
Ada:「咁我地快啲周圍去玩啦~ 我要睇熊貓同搭纜車!」
 
Elven和Ada把握時間玩盡海洋公園每一個角落，時間彷佛回到初中沒有任何煩惱和壓力的時候，他們過了很輕鬆愉快的一天。
 
「Honey我好累喇，不如你揹我去出口呀...」臨近尾聲，Ada對Elven突然作出了個要求。
 




「無問題~」雖然Elven也有點累，但知道Ada要求背後的用意，當然不敢拒絕。
 
躺在Elven寛厚的背上，Ada感到很安心亦很開心，今天她對Elven提出很多無理要求並不是有意為難Elven，而只是單純想撒嬌去感受著Elven對自己的溺愛。
 
「老公仔，今日多謝你呀~為咗獎勵你 ，如果你有辦法送我入hall，我就求阿媽比我今晚唔返屋企瞓啦~」臨到終點，Ada在Elven耳邊溫柔說道。
 
「真係?好呀!」Elven聽畢後腎上腺素急速飆升，然後覺得今天所受的苦難一切也是值得的。
 
由於C-hall是男hall，一般情況下除了每天中午12點至7點的時間外其他時間都是禁止女性進入。當然，其實只要入了宿舍後不再出來，由於沒人查房所以很多人還是能偷雞和女生在房內共渡春宵。但現在天色已晚，Elven和Ada已沒可能在7時前趕回到宿舍入面，所以Elven需要找幫手協助偷運Ada入hall的計劃。
 




「Jacky，你喺唔喺hall? 我需要你幫手！我依家係hall出面，你可唔可以諗計幫手引走門口個看更?」Elven和Ada到到hall門口前便打了給hallmate Jacky。
 
「攪咩呀?帶阿嫂返房?」Jacky淫笑問道。
 
Elven:「係呀，快啲幫手啦！」
 
「唉…我明天無錢食飯呀…」Jacky乘機敲詐。
 
「明天早午晚三餐我嘅!」莫講三餐，現在這情況就算是三十餐Elven也只能答應。
 
 
不久Elven在門外便見到Jacky驚慌失措地去到保安前不知跟他說了甚麼，然後保安便勿勿忙忙地跟著他離開了。
 
Elven把握時間立刻拖著Ada按下密碼入了hall內然後直上樓梯奔到自己房間。
 




「成功~ 不過你直至明天晏晝前都盡量唔好出房喇，沖涼要等深夜，去廁所話聲我聽等我幫你把風啦。」Elven鬆了一口氣然後帶點興奮說。
 
「好~ 終於有機會入嚟你間房喇! 講，我係咪第一個女仔入嚟先?」一回到房Ada十分雀躍。
 
「除咗我媽一開始入嚟幫過手搬嘢同清潔你梗係第一個啦~」Elven笑著答。
 
「真係? 等我去你張床度check下先~」說完Ada直接瞓在Elven床上然後撫摸著床說。
 
「床呀床，記住我呀，只有我哩個女主人先可以瞓上你度，如果有其他女性瞓上嚟你要話我聽呀~」
 
「床呀床，記住佢喇，以後佢一瞓上嚟你就變軟啲等佢瞓得舒服啲喇，若果有時我地喺你上面做運動太激烈你就張就下啦~」聽見Ada對床說話Elven亦跟著對自己的床說道。
 
Ada:「痴線佬! 我肚餓喇，你快啲落去買嘢比我食啦~」
 
Elven:「好~咁你乖乖係度自己休息下啦。」




 
Elven走後，Ada便下了床細心觀察著房內的一切，不是想偵查甚縻，只是單純想感受和記低Elven房間裏的每一個地方和佈置。
 
當他打開衣櫃，跟預期所想一樣所有衣服放得亂糟糟凌亂不堪。
 
「咁大個人都係咁，真係無你乎...」望著這情境Ada嘆了一下氣。
 
接著Ada便把衣櫃內的衣服全拿出來打算幫Elven重新執拾妥當，而當她把衣服摺好再重新放入櫃時，發覺暗角位有個銀包放在那裏。
 
「咦，點解有個DIY銀包嘅? 底角有個R字，咩意思?男裝款嚟㗎喎...」拿起了銀包，Ada抱有疑惑地說。
 
 
「有嘢食喇~」過了一會Elven拿著食物回來。
 
「唔該晒~不過我都無偷懶㗎，你快啲打開個衣櫃睇下~」Ada接過食物便說。




 
「嘩，從未試過咁整齊！都係老婆仔好~」打開衣櫃看完Elven感動地說。
 
「好心你咁大個人唔好咁”喱啡”啦，比你以前啲小fans知佢地偶像個人咁無執拾都唔知佢地點諗呀…」Ada則沒好氣地說。
 
「我點會介意佢地點諗啫~」Elven走到Ada面前攬了一攬她又錫了她額頭一下。
 
「話是話，我執嘢嗰陣見到有個DIY銀包喎，你自己整定人地送㗎?收得咁隱蔽嘅?」Ada提出心裏疑問。
 
(啊…到底應唔應該坦白照直講呢? 但好似點講都好難解釋喎...)這些考量在Elven腦海很快閃過。
 
「嗯...嚴格嚟講係人地唔要比我嘅...之前Rachel想整個銀包送比Daniel做生日禮物，我介紹咗佢去朋友度整，但佢整完後唔滿意又唔捨得扔，就塞咗比我喇，我見唔知點處理又唔會用咪求其放埋一邊囉… 」半真半假，很快Elven整理出一個自己都不知算不算合理的解釋。
 
(又係Rachel...R原來係代表Rachel)
 




「個個都唔比淨係比你?」Ada更疑惑地問。
 
「可能係我介紹比佢得我一個知掛...」Elven嘗試解釋。
 
「個銀包都幾靚呀，做咩唔滿意呀?」Ada再問。
 
Elven:「咁我又唔知喇，淨係知佢最後改咗送錶咋... 放心啦，我唔會用㗎，不過扔又好似好衰咁咪放住先囉…」
 
「嗯...好啦，我地食嘢先啦，涷喇。」雖然總覺得有點不對勁，不過Ada這刻也不想再深究下去。
 
當晚二人固然有一翻激戰，不過因為害怕隔壁聽見甚麼，雙方都故意壓低聲線，反而別有一番滋味。事後兩人相擁而睡，其實Elven冒險帶Ada回hall並不是為了性，事實是他很喜歡可以抱著Ada一起睡覺的感覺，這讓他感到很sweet很舒服。對於二人平時的聚少離多，他自然希望能製造更多並好好珍惜這些機會。
 
 
10日的假期轉眼就過，很快Ada又要回到英國。在原本的世界，這是Elven不知情下最後一次送Ada機。那一天，他們格外的不捨，份外的痴纏，彷彿早已有預感往後會發生的事。
 
到這一個時空，所有的感覺變得更加強烈。擁抱著Ada，Elven有種感覺自己一放手，Ada就會離他而去。而Ada亦同樣有種感覺有些改變她必需要做，否則和Elven的感情將會陷入一個很大的危機。
 
感受著對方的氣息和體溫，不捨的感覺讓雙方都不自覺有點眼濕濕。
 
「你記住聖誕嗰陣應承過我啲咩呀…」Elven用略帶哽咽的聲線說道。
 
「嗯… 你都記住應承過我會搵我多啲㗎…」Ada同樣半哭半說道。
 
不再說話，Elven用一個深情長吻作為回應，直至無情的時間和廣播再不容許Ada留在原地。