只想和你愛一次: 43. 恍然大悟

「Jacky哥，依家比個機會你報答我，有無機會搵日可以約到你同Annie一齊食餐飯呢? 我有啲嘢想請教下佢呀~」Elven立刻走到Jacky房問道。
 
「應該得掛，不過要問下佢先，咩事呀?」Jacky望了一望Elven，然後又繼續沉醉在他的電腦遊戲世界答道。
 
Elven: 「關於女人的思想領域。」
 
「…」這次Jacky連望一望Elven的動力都沒有選擇直接無視。
 
不過儘管充滿了黑人問號，Jacky還是盡了兄弟的本分，很快便安排了這個和Annie的dinner meeting。
 




整餐晚飯Annie都顯得很小鳥依人，總是倚傍在Jacky身邊和他竊竊私語，感覺她很怕醜又好像很害怕他們的說話會被Elven這外人聽見，不過外人就算格格不入都還是要進入正題。
 
Elven: 「阿嫂，其實今晚我真係有啲問題想問下你㗎。」
 
「咩問題?」聽到阿嫂這稱號，Annie終於將注意力稍為由Jacky轉移到Elven身上。
 
Elven: 「你覺得Jacky對你好唔好?」
 
突然間Elven感覺到對面產生了一股殺氣。
 




「嗯…還可以啦~」Annie臉一紅，然後細細聲地說。
 
Elven: 「咁你會唔會唔鍾意男仔對你太好?」
 
Annie望了一望旁邊的Jacky然後用較剛剛稍為大了點的聲量說: 「咁我又唔知喎… 因為未試過有人對我好好~」
 
「咁...你覺得你表姐男朋友對佢好唔好?」感受到殺氣強度突然再增強了至少3個level， 所以Elven決定直接進入主題。
 
「嘩，點解咁問先? 」一聽到Elven的問題，Annie略帶害羞的樣子瞬間便變成了八卦樣子。
 




「無呀，因為間中都會聽到佢講佢地啲拗撓嘢所以問下啫。」感受到對面殺氣瞬間消除，Elven鬆了一口氣答道。
 
「嗯… 我都唔太敢講，不過我感覺就一般囉… 唔係話差，但又唔係話好好…」Annie想了一想便答。
 
「咁佢有無講過你聽佢鍾意佢男朋友啲咩或者類似唔鍾意人對佢太好哩類說話?」Elven再問。
 
「咁私隱嘅問題問嚟做咩? 你其實係咪鍾意咗我表姐啫??」Annie雙眼這刻已經完全變成了個8字。
 
「我都唔知呀… 不過係想了解多啲佢嘅真實情況…」為表誠意，Elven沒有否認。
 
「你係幾時開始鍾意佢㗎? 我一直都覺得你地有啲奇怪㗎喇，兩個好似好熟但又神神秘秘咁...」Annie追問。
 
「我都係近排先開始發現自己對佢好似有咗少少感覺... 同佢傾偈相處真係好舒服，大家又好似好了解大家咁，或者就係因為咁不自覺比佢吸引到掛...」這刻輪到Elven略帶害羞地說。
 
Elven說完後，Annie沒有立即回應而只是一直望著Elven。




 
「Jacky成日讚你，我信你唔係衰人嚟嘅… 坦白講我對Rachel男朋友都無咩特別好感，不過我亦唔會主動幫你做啲咩，最多都係間中提供下啲實用資訊比你啦，之後就睇你自己造化喇…」過了一會Annie彷彿審查完畢終於收回她的目光道。
 
「多謝阿嫂~」看得出Annie很享受”阿嫂”這稱呼，Elven當然不會吝嗇。
 
「其實我都唔係話知好多，不過我記得佢有提過Daniel (Rachel男友) 好觸動到佢嘅神經，有時會令佢忟，有時會令佢擔心，有時又會令佢好開心。以前都有試過其他男仔對佢好好，但就感覺好乖好平淡咁，比唔到哩啲感覺佢…」Annie邊回想邊講道。
 
Elven聽完後陷入了深思，他好像感悟了甚麼，但又不能具體把它捉實。
 
「不過我都好肯定你喺佢心目中係有一定位置，我未見過佢對Daniel以外嘅男人會咁上心同埋可以對佢有咁大影響。只不過暫時據我觀察，佢對你就仍然只停留喺單純朋友之間嘅友情啦，佢真係好鍾意好著緊佢男朋友㗎。」見Elven沉默Annie又補充道。
 
「嗯…明白，多謝阿嫂~」收到的資訊算是有用，Elven由衷感激Annie。
 
(簡單講，即係依家唔通電啦，但到底要點做先觸動到佢神經同個心呢? 似乎關鍵係唔可以事事就晒佢順晒佢意，但唔順佢意得嚟又要令到佢在意…)
 




回到hall後Elven繼續思考但始終都得不到一個確實答案，他能肯定的只有一點，就是他必需作出改變，不然就只會回歸歷史。不過還有幾年時間，他相信應該還有點時間可以讓自己慢慢思考和摸索。