只想和你愛一次: 44. 新策略

「喂~ 幾時履行你嘅諾言呀?」隔了數天Elven主動提醒Rachel。
 
「哈哈，好驚我走你數咁喎~  下星期三?」不久Rachel便給了回覆。
 
(下星期三? 咪即係同正史同一日?)
 
明知當天Rachel會因男朋友受傷而提早離開，Elven第一個反應當然不會蠢得再選擇同一日。不過這時他突然想起自己要嘗試觸動到Rachel神經，不能事事遷就她，正史裏他就是太好人從不會生Rachel氣，會不會這就是其中一個癥結所在?
 
也許他需要引証一些東西。
 




「好呀，睇XXXX好唔好?」Elven直接說出上一次他們商議好的戲名。
 
Rachel: 「好喎! 我本身都想睇哩套呀~」
 
「知你口味嘛~咁約你四點半Campus等啦。」不過這次Elven故意約遲了個半鐘。
 
 
到了當日，一切也跟正史發生的一樣，只是這個電話並不是在電影中途而是在進戲院前一刻響起。
 
「Sorry呀…我男朋友比賽整親可能要入醫院 ，我依家要去睇下佢…」聽完電話後Rachel一臉擔心又抱有歉意地對Elven說。




 
「佢無事嘛? 嚴唔嚴重? 駛唔駛同你出返去呀?」Elven緊張地回應。
 
Rachel: 「應該唔太嚴重掛… 唔駛陪我啦，買左飛唔好浪費，你照入去睇啦~真係好對唔住呀…」
 
「無事呀，好少事啫，咁你走先啦，唔駛理我㗎喇。」Elven像沒事般說道。
 
「Sorry…」再一次道歉後Rachel便急步離開了。
 
之後Elven並沒有進入戲院而是選擇搭車回hall，戲他早已看過不需要再看，現在他需要的，是凝做一個生氣的情緒。




 
 
當晚
 
「終於返到hall了，套戲好唔好睇呀?」因Elven沒有on MSN，所以Rachel SMS 了他。
 
「我最後無入戲院返咗hall呀。」Elven簡單回了一句。
 
Rachel: 「下? 點解呀? 咁可惜?」
 
Elven看完message後便放下了電話，沒有再回Rachel。
 
這天是他兩世人以來第一次已讀不回Rachel。
 
 




又隔了兩天
 
Rachel: 「Hello~」
 
Elven看完還是決定已讀不回。
 
「你係咪嬲咗我呀? Sorry呀，我請返你睇戲食飯補數呀…應承你今次無論咩事都我都唔會再放你飛機㗎!」隔了兩小時，Rachel見Elven 還是沒回覆於是再message Elven。
 
可惜Elven還是已讀不回，他很想知道自己一直這樣Rachel會有多著緊自己。
 
又過了兩小時
 
Rachel: 「你係咪有事呀? 求下你點都應下我啦?」
 
見已經差不多，Elven知再玩便過火了。




 
「我沒事呀，sorry，近排有啲忙成日唔記得覆message，你男朋友有無事呀嘛?」這樣便生氣絕對是小氣的行為，所以Elven裝作沒事回覆。 
 
「你嚇死我呀! 以為你真係嬲咗我… 佢無事呀，係拗柴要抖返兩個禮拜囉…」看見Elven的回覆Rachel如釋重負立刻回道。
 
Elven:  「哦，無事就好喇，咁咪順便抖下休息下囉~ 咁你頭先講嘅補償仲算唔算數?」
 
Rachel: 「呀… 算嘅…」
 
Elven:  「哈哈，講笑啫，想補償下個月22號嗰晚就預留比我啦，最多我請返你食飯~」
 
Rachel: 「下?」
 
Elven:  「唔好諗歪，我想邀請你陪我去hall個Joint-Hall Ball咋…」
 




Rachel: 「哦! 但... 咁會唔會唔太好惹人誤會呀?」
 
「會有咩誤會?依家咁多人知我地friend，又知你有個恩愛男朋友。 我唔理呀，你唔陪我我就真係嬲你!」這次Elven決定用較強硬的語氣不容Rachel拒絕。
 
「咁好啦，最緊要師傅大人你唔好嬲就得喇…」Rachel:果然服軟。
 
Elven:  「算你啦~」
 
經個了數年社會的洗禮，Elven已再不是從此那個黃毛小子。不能否認這次Elven對Rachel 確實使用了點機心，他知道這樣Rachel是不會拒絕自己的。一來這刻她正對Elven充滿愧疚，二來感受到她這幾天碓實因害怕Elven生氣而感到焦急，直至知道Elven沒有生氣才終於鬆了一口氣。
 
還有一點就是Elven竟然因為忙碌而忘記了覆Rachel message，這也反映了Elven對Rachel並沒有多餘想法，若然真的對Rachel有意思又怎會因忙而忘記回覆? 這讓Rachel更放心答應Elven。
 
當然這只是Elven自己的猜想，他也需要一些測試去引証，而最後的強勢也是故意不再讓對方覺得自己凡事遷就對方，有時適量的強硬可能對事情更有幫助。
 
Elven苦思良久的結論就是 如果要Rachel有機會喜歡自己，首先就是要適時讓自己不再喜歡Rachel，因為唯有自己不著緊，才有機會讓對方著緊。




 
改變的成效還需要時間才能引証，不過暫時至少Rachel繼續同意了Elven陪他參與這個滿有他們回憶的Joint-Hall ball。