只想和你愛一次: 21. 約定

數天後，當Elven正在冥想明天籃球比賽的情況時， 突然收到Rachel的MSN。
 
Rachel:「師傅你好勁呀!」
 
Elven: 「???」
 
Rachel:「佢啱啱主動搵返我喇! 仲係咁同我講sorry話唔應該發我脾氣同埋會努力改善做得唔好嘅地方，我地無事lu~」
 
Elven:「都話㗎啦， 無點你呀~」
 




Rachel:「嗯嗯! 多謝你呀! 好開心~」
 
「睇你笑得咁開心就知你有幾鍾意你男朋友啦~」就算只是文字Elven都能感受到現在的Rachel有多開心。
 
Rachel:「我都唔知呀，不過我真係想像唔到有日如果同佢分咗手會點…」
 
「傻瓜，無啦啦做咩要想像分手會點呀? 你咁好佢邊會捨得同你分手呢~」Elven笑著應道，只是當時的他並沒想過在往後的日子裏，想像得最多的會是他自己。
 
Rachel:「哈哈， 無錯無錯! 好啦， 我要去上堂喇 ，只係急不及待要同你分享哩個好消息~遲D再傾啦，byebye!」
 




見Rachel下線後，Elven又再重新陷入冥想之中。
 
轉眼間，C-Hall 的籃球比賽亦正式展開。Pool 賽第一場對手的實力並不強， C-Hall在Elven帶領下輕取對手60:28。 打中鋒的Jacky在新女朋友Annie 支持下如有神助，拿了12個籃板和16分做出double double的成績，而作為得分後衞的Elven刖取了30分和交出10個助攻，完全主導了比賽。
 
Rachel:「你今日好勁呀!」
 
Elven: 「你有嚟睇? 我都無留意添。」
 
Rachel:「徒弟仔梗係要嚟支持師傅比賽啦~ 不過因為約咗男朋友，我睇完第三節就走咗了~」
 




Elven: 「一睇就知你係有異性無人性嗰啲人啦~」
 
Rachel:「咩喎! 我係陪Annie去所以都唔知幾有人性~ 再講你地領先咁多而且你都無發現我即係唔駛我支持啦…」
 
Elven: 「終於自己講出唔係因為我先嚟喇咩? 」
Rachel:「咁講真，如果無你哩個因素就算Annie叫我我應該都唔會陪佢去嘅... 所以同你都好有關㗎!」
 
Elven: 「哈，講笑咋~ 我地Pool賽對手都唔強 ，入四強應該無咩問題嘅。」
 
Rachel:「有你同Jacky，要Champ完全無難度啦~ 放心，決賽我一定會嚟睇足全場!」
 
Elven: 「哈哈! 做咩抄我呀? 咁大家一齊努力殺入決賽啦!」
 
Rachel:「YES!」
 




 
接下來的比賽，L-Hall越夾越熟打得越來越好，雖然有驚但還是無險地殺入了決賽。不過這時因為知道入了決賽，本身去了exchange的正選 year 3 PG決定回港幫L-hall打這場決賽，她很希望可以親眼見証這隊自己努力了三年的球隊能夠奪冠的一刻。
 
只是她的回歸，卻引申了一個問題出現- 到底決賽應該用是用實力較好的她還是用一直協助球隊殺入決賽的功臣Rachel打正選? 對此，Jacky和她們暫時還沒有定案。
 
至於C-Hall方面，雖然上年成績平平，但今年卻完全脫胎換骨。Elven和Jacky這對一內一外的組合，讓其他hall忌諱非常。不過眼看就快能進入決賽的時候，Elven在四強比賽尾段一球剷籃中落地踩到對方球員的腳拗柴， 被逼在比賽最後10分鐘離場退下火線。
 
幸好因為本身已有十多分的領先優勢，再加上還有Jacky支撐大局，C-Hall最終還是能守著勝果進入決賽。只是這刻連站立也有困難的Elven到底能不能趕及一星期後的決賽前復出卻還是一個謎。
 
若果沒有Elven，不要說贏取冠軍， 就算本身要殺入決賽也根本不可能。
 
 
知道事關重大，比賽一完Jacky便背著Elven立即衝去了附近一個街市找傳說中的跌打神醫。
 
Elven: 「師傅，我下星期仲有場決賽要打，有無可能可以好得切?」




 
「你傷得都幾嚴重，不過下星期要趕比賽都唔係一定唔得，只係你要好忍得痛喎，得唔得?」神醫為Elven受傷的腳作了一輪檢查後說道。
 
「無問題! 只要趕得切，幾痛我都頂到!  如無意外，下場會係我最後一場籃球比賽了…只差一步，打唔到我會抱憾終生㗎…」Elven堅決咁講。
 
神醫: 「好啦，咁我即管盡下人事。因為我要發功用力捽散晒啲瘀血再敷藥先會好得快，所以中途你會好痛㗎。嗱，咬住佢啦，乾淨㗎~」
 
接過師傅遞給他的毛巾，Elven心知不妙，不過還是咬緊牙關強忍下來，雖然最後全診所還是能清楚聽到Elven那單憑聲音都能讓人感到痛楚和哀傷的悲鳴…
 
 
「師傅仔，你受咗傷?」回到hall 艱難地沖完涼後，Elven收到Rachel 的SMS。
 
Elven:「係呀，拗柴…你又知嘅?」
 
Rachel: 「Annie講㗎，有無事嚴唔唔重呀?」




 
「未算最差情況嘅，希望趕得切決賽可以復出啦… 嚟日日要去受刑…」Elven把神醫的說話轉述給了Rachel。
 
Rachel: 「好慘呀…淨係聽都覺得痛... 希望有用啦!」
 
Elven:「有無用要過幾日先知喇我估… 你又點呀? 聽Jacky講原本嘅正選返咗嚟打決賽喎…」
 
Rachel: 「係呀… 隊長話要睇幾課練習先決定到出邊個喎...」
 
「比心機啦，唔好認輸，記唔記得我之前同你講過啲咩呀?」感受到Rachel有少許失望Elven便鼓勵道。
 
Rachel: 「梗係記得啦! 我會比心機學晒佢啲好野再加強自己啲好野! 🔥🔥🔥」
 
Elven:「乖喇，加油!」