只想和你愛一次: 12. 認識

如是者又過了數星期， 縱使Jacky正式做了L-Hall籃球隊的教練， 但他追求Annie的命途卻並不怎樣順利。
 
「Team Captain 救我呀!」這天Jacky又衝入了Elven房呻道。
 
「點呀， 做咩溝女溝到個樣咁慘呀?」Elven望到Jacky個頹樣就笑道。
 
「我唔知點做呀...  聊佢講嘢好似好快會end topic， 覆我又成日覆得好慢， 我又驚自己太Chur嚇走佢唔敢成日搵佢，可以點入手呀?」Jacky灰心地說。
 
「你對佢認識其實有幾深呀? 知唔知佢多啲 background或者有咩興趣? 會唔會已經有男朋友?」Elven聽完提出了幾個問題。
 




「我都唔太知呀， 同佢啲 friend唔熟，一星期又先coach得一次， 進度好緩慢… 不過聽聞佢應該無男朋友。」Jacky答道。
 
「咁可能都真係需要搵啲線人幫吓手先得， 唔係你咩都唔知亂咁嚟， 印象一差比人直接關門就好難攪...  你快啲諗計混熟佢啲 隊友先啦， 兵法有云知己知彼先百戰百勝呀。」Elven想了一會後講。
 
Jacky:「咁我再努力試下啦…」
 
這晚Elven難得沒怎樣忙， 沖完涼後便躺在床休息。 突然間他諗起Jacky， 然後又醒起Rachel。
 
(作為兄弟係咪應該幫下佢呢…)
(自己得唔到幸福， 都想兄弟得到幸福…)




(一陣佢心情差影響到佢練習表現就唔好啦， 佢嘅表現對我地好重要...)
 
Elven思考了一會後便下床打開了電腦。
 
「Hi 我係Elven呀， Susan中同， 嗰日見過你㗎呢~」從Susan處拿到Rachel的MSN， Elven很快便send了他們的第一個對話給對方。
 
 
「Oh hihi!」5分鐘後Elven收到了Rachel的reply。
 
Elven知道和Rachel不熟悉的情況下， 她不太可能會爆甚麼料給自己， 若太早打草驚蛇甚至還會害了Jacky， 所以他不可以一開始就單刀直入， 還是要和Rachel混熟一點才行，而和女仔最快混熟的方法通常也是說八卦嘢。




 
「原來我同你除咗Susan都仲有啲 common friends㗎喎~」於是他嘗試打開其他話題。
 
Rachel: 「係? 仲有邊個? Jacky?」
 
Elven:「佢固然係啦，但我有啲中同都見過你， 有時Susan會同佢啲中同互相返下大家教會， 好似Martin呀， Gigi呀，好似 都見過你㗎。」
 
Rachel: 「oh yes! 我記得佢地呀，the world is so small! Haha~」
 
Elven:「同埋我同你其實仲有一個好特別嘅關係㗎。」
 
Rachel: 「???」
 
Elven:「你知唔知我個best friend同你個best friend曾經有過一啲嘢?」
 




Rachel:「邊個? Paul?」
 
Elven:「係呀， 嗰陣佢迷戀咗你個best friend好耐， 曾經都好接近， 不過最後都係無一齊。」
 
Rachel:「我都有聽Susan講過， 係好可惜， 到底嗰陣阿Paul做咩㗎?」
 
互補完男女各方面的訊息， 整個故事總算拼回出來，只能說是命運弄人， 一個誤會讓這段正在萌芽的愛情快速步向了死亡，不過這卻讓他們的話題被打開了。
 
之後Elven又說了不少Susan在學校的趣事， 讓兩人的距離火速拉近。隨著大家開始熟絡， 對雙方的認識亦越來越深， 然後又引申出更多的話題。
 
一日復一日，慢慢地， 他們竟成為了能無所不談的朋友， 閒來無事， 大家都會互相hi吓對方傾計。

當然， Elven沒有忘記自己一開始的目的， 間中他都有不著痕跡地嘗試幫Jacky收集有用的資訊。