【全劇終】《我喺街執咗個失憶嘅女仔返屋企》: 終於又開學（下）

我求其同醫療室當值老師話唔舒服之後，就攤咗喺貼近窗邊嗰張床。冇幾耐，要趕去出席開學禮嘅當值老師都走埋，成間醫療室得返我一個。
 
我稍微瞓咗一陣，不過好快醒返，而且內心嘅鬱悶有增無減——腦入面仍然諗緊頭先喺A班聽到嘅嘢。
 
話我自私又好，妒忌又好。果然，要我由衷地替小悠入到A班而高興，呢一刻嘅我仲未做得到。尤其當我知道佢入咗A班之後，我地嘅差距只會愈來愈遠…
 
（唔知係幻覺定乜嘢，我隱約聽到拆包裝袋聲）
 
佢由以前連圖書館喺幾樓都唔知嘅白痴，變成校長眼中嘅公開試希望、老師眼中來自A班嘅完美模範生；而我就係A班眼中嘅垃圾渣滓。唔止咁——
 




（然後係一輪咀嚼聲）
 
聽講A班啲人有特權，可以豁免一切課後補課；相反E班就要強制性留低，即係話我同小悠嘅放學時間會錯開，想好似以前咁樣等埋一齊放學嘅機會應該都唔會再可以成日有。
 
（條友不斷喺我耳邊不遠處發出𡁻嘢食聲，我確認唔係幻覺）
 
我彈起身，向不停發出噪音嗰條友咆哮：「要食嘢死返出去——」但我隨即發現眼前嘅係小悠，佢唔知幾時坐咗喺我張床隔離張櫈，隻手拎住繽紛樂。
 
「…你幾時入咗嚟，我唔知嘅？」我馬上換返一把溫柔聲線。
 




「我嘈醒你？」
 
「冇…我本身已經醒咗，喺度諗緊嘢啫，你唔叫我？」
 
「我見你諗嘢諗得咁入神，連有人開門入嚟都唔知，咪唔叫你住囉。」講完佢又咬咗一啖繽紛樂。
 
「話說，你唔係應該喺禮堂參加開學禮架咩。」
 
「仲好講，我仲以為開學禮好好玩，點知都唔好玩。」上年小悠係開學一個星期之後先插班入嚟，所以冇經歷過開學禮呢樣嘢。
 




我笑：「係邊個話俾你知開學禮好玩…我地學校所謂嘅開學禮，年年都係A班同埋學生會拎嚟做個人騷嘅時間，其他人根本可有可無。」
 
「就係咁先得人驚…！你知唔知呀？校長叫我代表A班上台分享讀書心得，我都唔知應該講咩好…。」小悠望落仍然心有餘悸。
 
聽到小悠提起A班，我表情一沉：「喂，問你一個問題？」
 
「嗯？」
 
我猶疑咗一陣：「你喺A班開唔開心…？」
 
「嗯，開心呀。」
 
「咁就好。」我分唔清自己臉上嘅係強顏歡笑定真心嘅笑容。
 
然後，我地沉默咗幾秒，我感覺到小悠嘅目光一直向住我。




 
「阿帆。」過咗一陣，佢突然靠近。
 
我聞住佢身上嘅bb油味：「…嗯？」
 
「不如，我地偷走出去玩？」
 
「…咁突然？！」
 
「我講真架，反正呢度又冇老師睇住。」
 
「就算係…我地都開唔到學校大閘，你唔係諗住爬牆走吖嘛…。」
 
佢搖頭：「唔使爬牆，你信唔信出到去道閘就會自動開俾我地？」
 




「講到自己識超能力咁…你估你真係多啦A夢。」
 
「咁你跟我出去睇吓咪知！」講完佢夾硬拉我起身。
 
「喂…！」我就由得佢拖住我，一直跑到學校大門前先至停低。
 
「…頭先邊個話道閘會自動開。」望住分隔住我地同外面嘅大鐵閘，我問。
 
小悠只係用手蓋住我雙眼：「數三聲…1、2、3——！」然後放開手。
 
剛才依然緊閉嘅鐵閘喺呢一刻緩緩打開。
 
我難掩驚訝：「…點解會咁架！」
 
「我都話架啦！」講完之後小悠隨即轉身，向身後大嗌一句，「唔該你呀會長！！！」




 
我向佢視線嘅方向望，發現羅凱撒就坐咗喺不遠處嘅看更亭裏面，正用中指托眼鏡。
 
「…係羅凱撒開門俾我地？佢唔使去開學禮咩？」
 
小悠再度拉起我隻手就跑，我地好快穿過校門，正式離開咗學校範圍：「仲未到佢出場，所以我拜託咗佢幫我地呢個小小嘅忙。」
 
「…學生會會長居然明目張膽協助兩個學生逃學，果然呢啲係A班嘅特權。」我低聲說道。
 
「唔係特權嚟架，會長話要付出代價。」
 
「…代價？」
 
「嗯！就係返去之後，我地每人三個缺點！」捉住我隻手跑緊嘅小悠回頭，臉上掛住嘅係令人溶化嘅笑容。
 




但而家唔係應該失神嘅時候…。「咩話？！三個缺點？！！」
 
「嗯！本來仲要見家長架，不過阿帆你爸媽長期喺外地，所以應該冇事啩？」
 
話雖如此，但讀書咁耐從未試過逃學嘅我，內心嘅罪惡感忽然一下子爆出嚟。
 
我回頭，望住喺視線範圍內逐漸縮細嘅校園：「…我地而家返去嘅話，嗰三個缺點有冇得算數…。」
 
但得到嘅係小悠更雀躍嘅回應：「不過，比起留起學校，我有個更加好玩嘅地方想而家去！」
 
「…更加好玩嘅地方？邊度？」
 
佢舉到隻手高一高，指住某個方向。
 
嗰個方向，唔通係…。