【全劇終】《我喺街執咗個失憶嘅女仔返屋企》: 終於又開學（中）

然後，小悠就再一次以新同學嘅身分來到我地班上，一切就同上年嗰陣一樣，唯一唔同嘅係今年佢用返本名。
 
將自己嘅全名寫咗喺黑板之後（順帶一提，望住黑板上嘅字，我至首次得知佢本來嘅姓氏），小悠向大家鞠躬：「所以，今年都要請大家多多指教——」
 
得到嘅回應係全班報以熱烈掌聲，當中夾雜部分支持者嘅鳩叫聲，就喺整個班房沉浸喺一片歡樂和諧氣氛之中嘅時候…
 
「咯咯咯——」「磅！」三下敲門聲+一下撞門聲，然後出現喺門外嘅係上氣不接下氣嘅夕嵐。
 
「…師母！你真係喺度！」
 




班上所有人對於夕嵐突如其來嘅出現都明顯處於狀況之外，包括小悠本人，但夕嵐好快解釋咗佢喺度嘅理由：
 
「你入錯班房…你今年應該係A班先啱…！！」都未等小悠回應，夕嵐就一手拉走咗佢。
 
「…吓？」「搞咩…？」「入錯班房…？」「A班咪即係精英中嘅精英…。」班房裏討論聲四起。
 
點止精英之中嘅精英，A班喺我地學校嚟講直頭係特權階級，全因為偉大嘅學生會會長羅凱撒就係屬於呢班。
 
而且，聽聞校長視小悠為本校唯一可以喺學業成績上與羅凱撒匹敵嘅學生，所以大概能理解點解佢地兩個會被放喺同一班（想佢地互相切磋啩），加上小悠本身同羅凱撒比較熟…綜合呢兩個理由，小悠入A班，其實係好過繼續留喺E班。
 




不過，要我由衷地為呢件事感到高興，我始終覺得有少少難。畢竟小悠搬走咗之後，我地見面嘅時間已經大幅減少，而家調埋去A班嘅話，意味住無論返學定放學，我地都唔係理所當然地可以每秒對住。
 
坐我隔離嘅張廷宇眼定定望住我，然後掩住半邊嘴笑：「睇你呢副咁微妙嘅表情，十成諗緊冇得同小悠日對夜對…。」
 
「…有咁明顯咩！！」
 
「…好喇好喇大家就忘記有新同學呢件事，準備去開學禮喇。」搣時為小悠剛才入錯班房嘅事故總結。
 
小息嗰陣，我行到A班班房所在嘅樓層，諗住搵小悠落小食部買零食。
 




雖然以前為咗同珀奈扮偶遇（珀奈都係A班），我周不時會貢上嚟揖揖揚揚，但都未試過好似而家咁，直程伸個頭入A班班房裏面。
 
但望咗三個圈，都望唔到我要搵嘅人。
 
此時Ａ班裏出現竊竊私語：「聽講今朝由E班升上嚟嗰個新同學同會長大人有段不可告人嘅秘密關係…。」「欸？點呀點呀？」「我諗都不外乎係肉體關係啦…唔係點會可以喺E班升上嚟？」「話時話佢地兩個好似唔見咗人，你話佢地會唔會…」「喺廁所聯誼緊…？」
 
我行埋去，一掌拍喺佢地枱面：「唔好亂咁講嘢。」
 
兩條友嚇到口窒窒：「…乜E班啲垃圾渣滓可以隨便出入A班課室？」
 
準備還口之際，出面有把聲叫我：「咳，高田帆。」
 
我擰轉頭，係羅凱撒，佢示意我出去。
 
一出到去我同佢講：「你應該教吓你班部下，叫佢地講嘢唔好咁難聽。」




 
佢冷笑一聲：「點解你會喺度出現？」
 
「我嚟搵小悠，不過搵唔到。」
 
「佢喺校長室見緊校長，放完小息先會返嚟。」講完佢托吓眼鏡。
 
諗起頭先嗰兩條友嘅嘴臉，啖氣仲未吞得落，我求其掉低一句：「哦，咁我返課室先。」然後頭也不回地走人。
 
明明今朝先見完校長，而家又見乜Ｌ校長啊…。
 
返到自己課室嗰陣啱啱好打鐘，最近門口嗰個——上年屬於小悠嘅座位，而家已經變咗另一個人坐，意識到呢一點嘅我突然間好似漏氣嘅氣球一樣，跟住落嚟嘅開學禮都冇心情去，就索性去醫療室瞓到放學。