【全劇終】《我喺街執咗個失憶嘅女仔返屋企》: 故地重遊（上）

風和日麗嘅天空映襯下，係一列列冇咩人玩緊但依舊運作嘅過山車、手裏拎住一大堆氣球但明顯賣唔出，臉上表情話俾我知佢內心潛台詞係「幾時收工」嘅職員；仲有玻璃窗內嗰啲睇嚟睇去都係一成不變，但每次都會被吸引駐足嘅各式動物。
 
「…竟然係呢度。」我抬頭望向遊樂場嘅入口，耳邊傳來一陣過山車車卡與路軌摩擦時產生嘅沉悶聲響。
 
「自從上次同阿帆嚟過之後，我一直好想再嚟多次！」
 
我梗係記得，上一次為咗同小悠尋找記憶，我地趁住聯校宿營前夕嘅半日假期嚟咗遊樂場，各自分開on99咁玩咗半日，實在唔算得上係一個好好嘅體驗。
 
所以，呢個時刻我地一齊企喺遊樂場入口前，我心裏暗暗下誓今次一定要同小悠創造返一個美好回憶。
 




只不過，唯一嘅隱憂可能係作為第一次正式約會嘅地點（雖然我同小悠以前唔係未試過單獨出街，但我必須強調今次係我同佢確認關係之後首次去玩，所以我視之為第一次約會），遊樂場呢個選擇未免會老套咗少少。
 
「不過是但啦，拍拖嚟嚟去去都係呢啲地方架喇。」我低聲安撫自己。
 
「阿帆你細細聲喺度um咩呀？我地快啲入去啦！」
 
於是，我地買完入場券就入咗呢個冇乜遊人嘅地方，逃離中學生涯最後一次嘅開學日。
 
我地按住小悠嘅喜好次序去咗睇唔同嘅動物，圍繞全個園差唔多一圈之後，我望吓時間，發現唔經唔覺已經過咗幾個鐘。
 




每年開學日嘅呢個時候，置身於禮堂去聽校長同學生會廢噏彷彿變成例行公事；而今年居然可以打破呢個十幾年嚟嘅規律——企喺水族館前，內心諗住呢堆事嘅我，感覺有啲唔係好真實。
 
學校班傻仔睇怕呢個時候仲迫緊喺禮堂，聽緊羅凱撒或者駱以雪連珠發炮咁廢噏……諗到呢度我偷偷地笑。
 
但掛住笑，差啲聽唔到小悠叫我：「阿帆。」
 
「嗯？」我趕快回過神。
 
之後佢無端端喺度笑：「等我估吓先，頭先嘅阿帆一定係諗緊——學校班傻仔睇怕呢個時候仲迫緊喺禮堂，聽緊羅凱撒或者駱以雪連珠發炮咁廢噏嘞。」
 




「點解你會知？！仲要一字不漏咁全中！！」我對小悠頭先繪形繪聲嘅模仿感到佩服。
 
佢嘻嘻笑兩聲：「因為，我都係諗緊同一樣嘢。」
 
望住小悠嘅笑容，我好自然咁跟住笑埋一份。
 
不過，望進小悠眼裏同時，忽爾諗起佢曾經講過嘅一句說話。佢話過，佢討厭自己。
 
我好似被呢樣嘢提醒咗某個事實一樣：就算眼前嘅小悠望落笑得幾開心都好，我都唔能夠肯定佢內心嘅感受係相對應。尤其係我知道佢好叻，叻到連自己都可以呃埋，明明內心流緊血，都同自己講好開心；同時又好蠢，蠢到覺得自己唔值得去得到幸福。
 
之前喺燈塔裏面嗰番為咗緩和氣氛而衝口而出嘅宣言，絕對係我嘅真心說話。而呢一刻望住小悠嘅側顏，我內心更加堅定——
 
我想佢發自真心咁笑，同埋打從心底裏變得鍾意自己，就算只係比前一日多出0.001％都好。