【全劇終】《我喺街執咗個失憶嘅女仔返屋企》: ＯＫ

「點會咁架…你兩個到底喺度搞咩…。」阿妹嚇到手上嘅叉都跌埋。
 
我支支吾吾，總算簡單解釋咗我同小悠嘅情況：「…雖、雖然我講咗我鍾意佢，然後…佢都話鍾意我，但、但係，之後就仲未有下文。」
 
點知千惠一隻匙羹車埋嚟：「一定係你講得唔夠清楚啦！」
 
「…我已經講得好清楚…架喇。」我愈講愈心虛。
 
「你而家即刻send個訊息俾小悠問吓你地下文啦！垃圾！」
 




「最尾嗰兩個字係多餘嘅好唔好…！！」
 
「千惠講得啱，有時熱情過咗，就唔再係嗰回事。」阿妹說得頭頭是道，明明拖都未拍過。
 
「…真心咩。」我口裏說不，但身體依然拎咗部電話出嚟。
 
然後打開同小悠嘅對話頁，諗咗一陣都係決定打書面語：
 
不好意思 13：05
打擾你辦入學手續 13：05




 
「你send咗未呀？」來自千惠嘅催促。
 
「打緊字呀，咪嘈啦…！」
 
說起來 13：05
我們也該差不多交往了吧 13：07
 
最後附上一張比卡超賣萌貼圖，SEND！
 




一send完張貼圖，手機就俾千惠搶咗：「拎嚟睇吓？」
 
「喂喂！！」我預計小悠應該需要啲時間思考回覆，所以我要做嘅係耐心等候，同埋阻止千惠擅自再send啲咩出去火上加油…
 
「喔？小悠回咗。」千惠望住我部電話個芒講。
 
「居然係秒回！！！」
 
「點呀點呀？小悠回啲咩呀？」睇嚟阿妹對於我同小悠嘅事相當有興趣，又或者純粹八掛。
 
「佢話ok！」千惠將部電話俾返我，我接過嚟睇。
 
小悠只係回咗一張貼圖，係同我頭先send出去嗰張比卡超賣萌同系列——寫住「ok」嘅水躍魚萌動貼圖！
 
「哦，佢話ok…呀？」我點頭微笑。




 
「你呢啲乜嘢反應嚟？」俾千惠一講，我先發覺自己嘴角正不自控地往兩邊揚起，唔使照鏡都知我而家臉上應該掛住一副好嘔心嘅笑容。
 
「哥，你再唔食嘅話啲嘢食就俾我地食晒喇。」
 
「食！咩唔食呀！」我雙眼停留喺同小悠嘅對話頁面，仲有佢send嚟嗰張水躍魚貼圖；右手則拎起鐵叉拮咗兩隻雞翼落自己碟。
 
跟手回咗一張寫住よろしくお願いします（請多多指教）嘅貼圖俾小悠，send完出去嗰秒，我覺得自己係世界上最幸福嘅男高中生。
 
但來自對面嘅喀嚓喀嚓聲將我拉回現實。
 
「喂，你偷影可唔可以有啲技巧…？」望住千惠舉起部電話嘅動作，真係弱智都知道佢影緊我。
 
「我唔係偷影，我係光明正大咁影低緊你個痴漢樣俾小悠睇。」千惠講嘅時候，部電話仲係對緊我。
 




「…你就放過我啦。」
 
「出現喇，係口裏說不身體很誠實嘅表情…。」阿妹帶點驚訝地指住我。
 
「……。」到最後，我只能暗自嘆一口大氣。