【全劇終】《我喺街執咗個失憶嘅女仔返屋企》: 孤獨的越洋過海之旅（六）

之後，我地三個人+一隻龍貓就離開咗燈塔。至於我同小悠嘅關係，仍然處於未確認狀態之中。
 
沿路行到返大屋外，我正準備追問小悠有關告白嘅答覆前，被佢先一步開口：「阿帆你幫我睇住休比一陣，我有啲嘢要去做。」然後將休比同一袋牧草波波交到我手，就行咗入屋，留低滿頭問號嘅我。
 
或者見到我咁嘅表情，紫悅走埋嚟講：「希渝佢應該去見佢媽媽，呢個都係佢今次返嚟嘅最主要目的。」
 
「…原來係咁。」
 
「畢竟已經十幾年冇好好坐低傾過計，一定有好多嘢想同對方講。」
 




「咁我就喺度等，」我捧住休比，「我都要同休比好好傾吓計。」
 
「咁你慢慢。」留低呢句嘅紫悅頭也不回地返咗入屋。
 
得返我同休比之後，佢嘅表情忽然變得具警覺性。
 
仲以為運動會嗰次成功挽回同佢嘅關係，畢竟借物跑中途佢對我叫名有反應，但睇嚟休比係一隻忽冷忽熱嘅龍貓。
 
我唔理，照叫佢個名，想睇吓佢會唔會有反應：「休比！」
 




隻死仔郁都唔郁，串到。
 
唔理我點逗佢，佢都係唔多應機，就咁樣同佢糾纏咗差唔多一個鐘，最後我決定出秘密武器——
 
我從身上取出草綠色球狀物：「牧草波波——！」
 
「嘰嘰！」原本瞓咗嘅休比竟然即刻彈起身，令我更加相信發動牧草波波攻勢係正確嘅。
 
成功向休比獻媚後，疲勞感一湧而上，腳底肌肉嘅酸痛提醒我喺原地企咗超過一個鐘，於是我抱住休比走到樹蔭下坐低。
 




坐低之後，我撫摸住休比身上嘅厚毛，沒由來地開始咗某個話題：「死仔，你覺得我同小悠之後會點？」
 
我指嘅係，就算我同佢確立完彼此關係之後，我地住嘅地方隔咗十萬九千公里遠都係一個活生生嘅事實，雖然喺科技橫行嘅現今社會，會擔心呢樣嘢可能係多餘，但一諗到以後佢唔會再喺伸手可及嘅距離，心裏面果然有點寂寞。
 
「嘰嘰嘰。」
 
「仲有你…我都會好掛住你。」撇除休比成日咬我同對我瀨尿呢一點，佢的確令我諗返起第一次養龍貓嗰種單純嘅快樂。
 
「嘰嘰嘰。」
 
「話說，你主人話佢夢想係拯救龍貓係咪真架？定係連呢句都係亂噏？」
 
「嘰嘰嘰。」
 
我嘆一口氣：「你都係答唔到我架喇，我又冇可能好似你主人咁識聽得明你講嘢。」




 
「真架。」
 
「欸？？」我四圍尋找聲音來源，即使如何on9，都未至於會以為頭先嗰句係休比講嘅，理由好簡單，因為把聲係小悠嚟。
 
望勻左右兩邊都唔見人，最後我岳高頭，發現小悠唔知幾時企咗喺我身後，正低頭望住我。
 
「不過冇話一定要而家實現。」講完佢繞到我面前。
 
「突然出現俾你嚇死…。你做完你要做嘅嘢嗱？」我問。
 
「做完喇！」唔知係咪錯覺，小悠臉上嘅笑容同啱啱入大屋之前有啲唔一樣，就好似放低咗一件壓咗喺心入面好耐嘅事，鬆一口氣嘅笑。
 
我拉返去頭先個話題：「冇話一定而家實現…即係點解？」
 




「就字面意思，因為而家要專心讀書！」
 
我搲吓頭：「咁又係，我睇怕都要開始認真讀書，話晒下年都考大學試…。」
 
「嗯！我地大家都要加油！我同張廷宇會負責督促阿帆！」
 
我停止手上動作：「欸，乜你唔係要留喺度讀書…？」
 
佢搖搖頭：「我諗過喇，呢度啲繽紛樂都係冇阿帆樓下便利店買嗰啲咁好食，所以暑假之後，我地又可以繼續做同學喇。」
 
我嘆一口氣，隨即忍唔住笑。
 
「理由居然係繽紛樂…。」我笑，除咗因為眼前嘅蠢才由始至終都只係掛住繽紛樂之外，更加係因為代表我地又可以繼續見面。
 
「唔止！因為學校小食部嘅燒賣真係好好食！」




 
「…咪又係因為食。」睇嚟頭先嗰一個鐘裏面，小悠同佢阿媽真係傾咗好多。至於傾咗啲咩，得小悠先會知，但望住佢臉上嘅表情，我相信情況應該唔差得去邊。
 
小悠笑咗幾聲，然後對我伸出右手：「咁新一個學期，都要請你多多指教！」
 
我輕輕握住嗰隻向我伸來嘅手，清一吓喉嚨：「…大家咁話。」