【全劇終】《我喺街執咗個失憶嘅女仔返屋企》: 孤獨的越洋過海之旅（二）

我不斷重覆原地企同埋來回踱步嘅動作，時間唔知過咗幾耐，個天就愈來愈凍。
 
連續打咗三個乞嚏之後，遠方隱約傳來「嘰嘰嘰嘰」嘅叫聲。
 
「呢把聲…。」我認得係某隻好有靈性嘅龍貓發出。
 
不出所料，下一秒到某隻好有靈性嘅龍貓嘅主人講：「休比！我地到喇，開唔開心呀？」
 
聽到呢把既熟悉又懷念（實際上只係一晚冇聽）嘅聲音，我內心慌張起來，腦裏面想對佢講嘅說話好似被炸彈一嘢炸開，散落到腦海角落，想執都執唔切。
 




「好耐冇返過嚟呢度喇…咩話？你都係？」
 
「嘰嘰嘰！」
 
情急之下，我匿埋喺附近其中一棵樹後面，等待出現時機嘅同時，重新組織吓陣間想同小悠表達嘅嘢。
 
「坐咗咁耐飛機你一定好攰喇，想唔想瞓覺？」
 
「嘰嘰！」
 




我喺樹後望出去，小悠果然慢慢行緊過嚟。當然，膊頭企咗休比。
 
「不過估唔到真係俾我搵到賣繽紛樂嘅地方…！有機會要同阿帆講至得…！」
 
我笑，又真係俾個蠢才買到繽紛樂。
 
「嘰嘰嘰嘰！」
 
「嗯！唔知阿帆而家做緊啲咩？休比你覺得？」然後係拆包裝袋嘅聲，唔使望都知小悠開始開餐。
 




「嘰嘰嘰、嘰嘰嘰！」
 
聽住小悠同休比咁自然嘅對話，我已經唔識得吐槽，雖然如此，而家衝出去打亂佢地對話嘅話，實在令我過意唔去，所以我暫時靜觀其變。
 
「休比，你做咩咁嘅樣呀？」我繼續匿喺樹後，聽住小悠對休比講。
 
「嘰、嘰、嘰。」
 
「咩話？你想食？」
 
聽到呢句，我心知不妙，探頭望吓出面嘅情況。
 
只見休比雀躍應道：「嘰嘰嘰嘰！」
 
「唔……」而小悠則陷入沉思狀態，兩秒之後餵咗啲嘢到休比嘴前，「嗯！今次就俾你啦！UM——」




 
喺休比將眼前嘅繽紛樂啪入口之前，我衝到小悠面前大聲喝止：「你個白痴有冇常識架？？？龍貓唔食得朱古力架！！！！」
 
「…阿帆？」小悠停止咗手上嘅動作，我得以睇清楚頭先佢準備餵休比嘅原來只係一粒牧草波波。
 
「欸？唔係繽紛樂？」
 
小悠貌似被我嘅出現嚇親，聲都震埋：「…點解…你會喺呢度。」
 
「點、點解我會喺度？因、因為…」內心不禁責備自己嘅眼殘，如果唔係將牧草波波睇錯成繽紛樂，我喺小悠眼前出現嘅時機應該唔會好似而家咁惡劣。
 
個腦諗到點答之前，個嘴已經擅自郁動：「因為誤打誤撞上咗羅凱撒架飛機，佢叫我…」講到呢度我停低落嚟，因為內心最清楚不過，乜嘢羅凱撒其實全部都只係藉口，我而家之所以會企喺度，100％出於自己意志。
 
於是，我乘勢向前躬身45度，兼且伸上右手：「…唔係佢叫我！係我自己要嚟搵你，目的係同你講我鍾意你…請你一直留喺我身邊——」
 




一輪嘴講完之後，我維持同一姿勢，等待小悠嘅答覆。
 
因為彎低咗身，視線只係望到小悠對鞋同地上青草，然而5秒過去，前方依然冇咩動靜。
 
「小悠…？」準備岳高頭嘅時候，伸前嘅右手忽然被某種觸感填滿。
 
係一團剛好能夠以一隻手掌覆蓋，柔軟到令人瞬間到達天堂嘅渾圓之物。
 
我就咁樣握住掌心上嘅肉團，然後一陣略帶微溫嘅濕潤感喺我手掌以及其之間擴散。
 
「嘰嘰嘰嘰！」肉團從我手心上跳落，留低嘅係一灘新鮮滾熱辣嘅代謝物。
 
「你隻死仔！！！喺我隻手瀨尿！！！」我崩潰叫。
 
「休比！！」小悠則急不及待叫住休比，因為喺我隻手跳落嚟之後，休比一支箭往大屋嘅相反方向跑走。




 
見到休比狂奔，小悠馬上緊隨其後：「你要去邊呀？？」
 
「喂喂…！」眼白白望住一人一龍貓逐漸遠去嘅我，做法自然係趕快跟上去。