【全劇終】《我喺街執咗個失憶嘅女仔返屋企》: 孤獨的越洋過海之旅（三）

小悠一直追住奔跑中嘅休比；而我就追住小悠。但冇幾耐已經唔見咗佢兩個，好彩沿途都冇分岔路，只要我向住前面嘅方向，理應會追得上小悠同休比。
 
跑到咁上下，我將速度逐漸放緩，不知不覺嚟到一個充滿既視感嘅地方。
 
「…燈塔？」腳下係一條通往燈塔嘅路，路嘅兩旁係一片湛藍色嘅海。
 
沿住呢條路一直行，差唔多到燈塔嘅時候，忽然見到休比就喺路邊，正在梳理身上毛髮。
 
奇怪嘅係只有休比一個，小悠就唔知去咗邊。
 




「唔通入咗去…？」準備推開嗰道作為燈塔唯一出入口嘅拱門之前，海裏傳來冒泡嘅聲音。
 
然後，某個白痴居然從海裏爬回岸：「好凍…！！」
 
我未能理解當下嘅情況，只能眼甘甘望住小悠，兩秒後先意識到佢頭先跌咗落海：「！！…你有冇事？」
 
小悠搖頭，附送咗兩個乞嚏俾我。
 
唔通佢頭先俾我嘅告白宣言嚇親，激動到要跳海…。
 




「頭先追追吓休比嗰陣，唔小心差錯腳跌咗落水…」小悠解釋到一半，又打一個乞嚏。
 
我暗地嘆氣：「正常發揮…。總之冇事就好，快啲返去抹乾個身先。」見到小悠全身濕透嘅模樣，實在唔係問佢關於剛才告白嘅答覆嘅好時機。
 
呢個時候，一顆顆六角晶體開始從天空降落。
 
「係雪…。」小悠抬頭，伸手接住飄散嘅雪花。
 
我跟住佢抬頭，望住眼前雪花紛飛嘅情景，不禁讚嘆起上嚟，因為咁大個仔親眼睇雪嘅次數，絕對五隻手指數得晒。
 




但唔夠十秒，小悠嘅聲音就將我召回現實：「…休比！」 
 
我回過神來，只見小悠匆匆忙忙抱起休比，然後跑咗入燈塔裏面。
 
「喂喂…！」我從後趕上。
 
入到去之後，小悠坐咗喺一旁，正在掃走休比身上嘅雪花。
 
「淨係顧住休比，又唔關心吓自己…。」我低聲說道。
 
「休比佢唔可以有事，一定唔可以。」見到休比仍然眼仔碌碌，小悠好似放心下來。
 
「我知，因為休比係比親人更重要嘅存在吖嘛。」小悠喺運動會嗰陣講過嘅說話，我一直冇忘記過。
 
我喺剛才從機師哥哥手中得到嘅浴室套裝裏面，拎咗一條毛巾出嚟，蓋到小悠頭上：「但如果你病咗，休比都會唔開心。」




 
點知佢一轉手拎條毛巾嚟拭擦休比。
 
「你真係…。」我嘆息。
 
中途，小悠又打咗兩個乞嚏。正想諗辦法幫吓呢個成身濕晒，仲掛住湊龍貓嘅蠢才，卻發現頭先嗰條係手頭上唯一嘅毛巾。
 
呢種時候，或者喺度生個火會好啲，奈何呢度樹枝都冇支，更加唔好講其他生火用具。
 
面對咁嘅情況，我用youtube開咗一個火堆asmr，希望聽住啲柴枝踏啪啪啪嘅聲音，會令小悠同休比內心溫暖啲…
 
「？」小悠一臉疑惑，睇嚟唔明白我嘅用意。
 
所以我解釋：「根據非正式研究，天氣凍嗰陣喺youtube開一條火爐嘅片，會令人覺得冇咁凍。」
 




估唔到小悠聽完會喺度笑：「阿帆你諗得好體貼。」
 
「哈哈…。」我傻笑兩聲，趁住氣氛緩和之際，將身上嘅厚衛衣除咗落嚟，然後拋到小悠隔離。
 
「…欸？」佢望住嗰件直到頭先都被我著住嘅暗紅色衛衣，然後又一個乞嚏。
 
「就…」我拉扯耳側頭髮，試圖尋找合適措辭，「你著住啲濕嘅衫好容易會病，換咗佢會好啲。」