【全劇終】《我喺街執咗個失憶嘅女仔返屋企》: 孤獨的越洋過海之旅（一）

本話劇情由【對話（下）】接起，敬請留意。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

意識仲飄流喺外太空嗰陣，突然有人拍我膊頭。
 
可能見我唔肯醒，嗰條友又拍多幾吓。
 
我不情不願地從睡夢中睜開雙眼，窗外嘅陌生風景提醒我而家身處羅凱撒架私人飛機裏面，眼前呢個戴住黑超，亦都係頭先拍醒我嘅人，就係羅凱撒個私人機師。
 
「…我地到嗱？」




 
機師哥哥打開機倉門，然後向我招手。我伸展一下筋骨，隨即從後跟上。
 
「…凍！」一落機，迎接我嘅係一陣又一陣刺骨寒風，我先醒起自己身上除咗小悠臨走前寫嘅信同留低嘅畫之外，乜Q都冇；身上著嘅依然係夏季校服。
 
我冷不防打咗三個乞嚏，然後視野左下方突然出現一隻強而有力嘅手臂，拎住一個手提袋。
 
我望住機師哥哥一臉誠懇嘅樣，忍唔住問：「係咪俾我架？」
 
機師哥哥點頭，隨即將手上嘅袋放到我手。




 
我打開確認裏面嘅嘢，有一件好似幾厚嘅衛衣，有啲乾糧同水，仲有個旅行浴室套裝。望住呢袋嘢，我好難想象自己唔係去參加荒島求生，內心因而閃過一絲不安。
 
不過我循例都要感激羅凱撒（呢袋嘢睇怕係佢為我準備）嘅心意：「感謝…」我喺校服外套上嗰件好似幾厚嘅衛衣，然後問一個重要問題，「但係，我之後應該去邊？」
 
雖然根據羅凱撒所講，我以前嚟過呢個我已經唔記得咗叫咩嘅小島，不過要去邊度先會搵到小悠，我完全冇頭緒。
 
機師哥哥舉起右手，指向前方一條廣闊道路。
 
「去前面？」




 
機師哥哥點頭，隨即示意我向前行。
 
我帶住半點疑惑沿住佢所指示嘅路行，行到就嚟腳跛終於見到一間被圍牆隔住嘅豪宅，圍牆嘅中間有道大閘；大屋兩邊長滿不知名樹木，其中一棵一直延伸到二樓某個房間。
 
我望住棵樹，腦內忽然回放起好耐之前嘅片段——細個有一次喺樹上面跌落嚟，然後係…
 
我行近幾步，想再望清楚啲。
 
連接露台係一道拉咗簾嘅玻璃門，正係半趟開狀態，裏面塊窗簾隨風飄動。
 
眼前呢片風景帶俾我莫名熟悉感，教人回想起曾幾何時我靠喺樹上面，畫緊一個瞓咗喺窗邊，有一雙紫色瞳孔嘅女孩。
 
「…希渝。」我吐出記憶中嗰個女仔嘅名。
 




「佢話唔定已經返咗嚟，喺間房裏面…！」我原地跳起，想要睇清楚房裏面嘅環境，但呢個距離根本咩都睇唔到。
 
於是我跑到大閘嗰邊，準備按響門鈴嘅時候，有個人影從裏面慢慢走出來。
 
但係，出現喺眼前嘅並唔係我呢一刻最想見到嘅人。
 
「你係…赤城紫悅。」我冷靜道出。
 
「嗨，又見面喇，高田帆。」
 
「你喺度嘅話，係咪即係小悠…唔係，希渝都喺屋裏面？」
 
紫悅望咗我一陣，然後攤手：「呢個撒仔，果然好多管閒事，關於希渝嘅事佢已經同你講晒？」
 
「一如既往，講啲唔講啲。」我無奈道出，「所以我先會喺呢度，因為我想親自聽到小悠…希渝嘅答案。」




 
紫悅喺度笑：「你睇吓你，連改口都未改得到。」
 
我臉頰發熱：「唔使你講我都知…！」然後撇開視線，「不過小悠又好希渝又好，對我嚟講都係同一個人…。」
 
我唔知紫悅聽唔聽得出，我嘅意思其實係就算小悠有一百個名都好，都無阻我鍾意佢呢個事實。（當然啲咁羞恥嘅說話我唔希望紫悅get到）
 
紫悅打咗一個大大聲嘅呵欠作為回應：「唔同你講喇，我啱啱落機而家想去瞓覺。」講完佢轉身。
 
我叫住佢：「喂喂…！」
 
佢秒速回頭：「你要搵嘅人仲未返嚟，你有耐性嘅話就喺度等啦。」
 
「你地唔係一齊返嚟？佢喺邊？」
 




「佢一落機就話要去揾吓邊度有繽紛樂賣，我都唔知佢幾時返。」紫悅聳肩。
 
「繽、繽紛樂？」
 
「嗯，就係咁。」
 
我無奈嘆道：「…多謝你話俾我聽，我會喺度等佢。」
 
一落機第一時間唔係返屋企，係去買零食，呢個蠢才個腦究竟諗緊啲咩…。