【全劇終】《我喺街執咗個失憶嘅女仔返屋企》: 尋找希望（十八）
經過漫長嘅旅程，我終於踏上呢片陌生嘅土地。
我用細個儲落嘅錢搵咗個地方暫住，瞓醒之後就漫無目的咁喺條街度周圍行，有時就會亂咁上一架巴士，坐到總站就落車，繼續漫無目的地遊走。
我諗如果紫悅喺度嘅話，一定會笑我，話喺茫茫人海裏面搵一個人等於大海撈針，但我覺得咁樣嘅生活其實都唔錯，每一刻都優哉悠哉，一啲煩惱都冇，比起以往困喺大屋嘅日子實在要好太多。當然，嚟搵高田帆呢個諗法冇一秒被我放棄過，亦都係我置身喺呢片土地嘅最大原因。
雖然只係過咗兩日，我已經深深領會到紫悅喺我臨上機前所講嘅——混濁嘅空氣無處不在，每呼吸一下都好似將多餘嘅雜質吸到體內一樣，對於呢一點我仍然唔係好慣。
一架大貨車喺眼前揚塵而去，我禁不住掩著口鼻：「咳咳、咳咳…。」
咳咗一陣之後，突然有隻手輕拍我膊頭：「冇事吖嘛？」
一個拎住拐杖嘅婆婆企咗喺我眼前，我搖頭：「冇、冇事，唔該你呀。」
話音未落，個婆婆突然面容痛苦，我趕快問：「婆婆你點呀？」
佢一邊揉住後背：「冇事，只係背痛發作，係呢妹妹，你可唔可以幫我拎一拎袋橙，順便送我去附近公園休息呀？」
「冇問題！」我一手接過婆婆手上嘅兩袋橙。
一邊行嘅時候，婆婆滿臉笑容咁問我：「睇你咁生面口，喺外地嚟架？」
我點頭：「我以前從來都未嚟過呢度。」
「你係嚟旅行？要唔要婆婆介紹附近有咩景點呀？」
「比起旅行，我嚟係有更加緊要嘅嘢要做。」我眼望前方。
「緊要嘅嘢？」
「嗯，嚟搵一個人。」我對婆婆笑說。
「呵呵，對我嚟講最緊要嘅嘢就係每日同孫仔孫女玩…。」婆婆笑得好開心咁講。睇嚟同佢傾咗一陣計，佢暫時忘記咗身體嘅痛楚，所以我都鬆一口氣咁笑。
但下一秒，婆婆突然掩住胸口位置，繼而不支倒地。我從來冇遇到過呢種情況，所以花咗啲時間先搵到送婆婆去醫院嘅方法，去到醫院之後婆婆嘅家人都好快嚟咗。
喺醫院外面，伯伯同我講婆婆要即時做個大手術，但因為身上冇錢，所以希望我可以幫佢地俾住先：「我一定會還返俾你…！」
「但係…」我身上嘅錢本身都唔多，根本唔知夠唔夠幫到婆婆。
伯伯突然舉起三隻手指：「一係咁，你墊住咁多俾我地先就夠架喇，求吓你。」
「吓…？」我對伯伯所講嘅銀碼完全冇概念，不過如果可以幫到婆婆嘅話都想儘量幫，於是我將身上所有嘅錢拎出嚟，「你睇吓呢度夠唔夠？」
伯伯見到之後，表情變得好開心：「夠、夠！」
「咁你快啲去啦。」
我繼續喺醫院外面等，等伯伯返嚟同我講婆婆而家情況點，但企到太陽落山，到黑夜降臨依然見唔到伯伯。
去到凌晨嗰陣，我去問護士知唔知做緊心臟手術嗰個婆婆情況點，得到嘅答案係唔清楚，不過今日冇人被安排做心臟手術。
「咁晏晝同我一齊嗰對公公婆婆…？」
「個婆婆冇咩事，休息咗一陣就同個伯伯走咗啦，簡直係浪費救護車資源…。」
到咗呢個時候我先至後知後覺，但已經咩都做唔到。
「咁我以後點算…。」
所餘無幾之後，好快連住嘅地方都冇埋，身上值錢嘅嘢可能得返電話同手錶，我根本唔知自己仲可以去邊。
紫悅喺我臨走前講過如果遇到有咩事一定要打俾佢，無論佢喺天涯海角都會即刻趕嚟；只不過每次我想按下撥出嘅時候，我都會提醒自己嚟咗呢個地方只不過係短短幾日，如果咁短時間就要向紫悅求救，咁我之前下嘅決心又有咩意義。
仲有，我嚟嘅目的仲未達成，如果輕易放棄嘅話，同嗰個被困住喺大屋嘅自己根本冇分別。
每當諗到呢度，我都會收起部電話，然後再諗其他解決方法。
冇錢嘅話，大不了我就瞓街。
我拖住疲累嘅身軀走到去一個公園，然後瞓咗喺一張長櫈上面，為咗忘記兩日冇食嘢所累積嘅飢餓感，我淨係想快啲瞓著。
或者瞓喺長櫈同以前瞓喺房間地板嘅感覺有啲相似，好快我嘅意識就開始飄走。
入睡嘅前一秒，耳邊隱約傳來其他露宿者嘅收音機聲：「提提大家，而家正懸掛八號風球，冇咩必要記得唔好出街留喺屋企喇…」
時間唔知過咗幾耐，我感覺到有一對手喺我腰間遊走。
我即時清醒過來，見到嘅係一個陌生大叔。我想反抗嘅時候，佢塞咗幾張紙幣俾我：「我俾錢你，你幫我解決吓。」
我咩都冇講，淨係推開佢，然後跑出公園。
「喂…！！」佢喺後面叫住我，我以為出咗公園就冇事，但佢依舊對我窮追不捨。明明而家唔係好夜，但街上居然一個人都冇——我先記起原來掛緊八號風球。
嗰個人一直跟喺我後面，眼見同佢嘅距離愈縮愈短，我內心首次出現驚恐嘅感覺。我索性咩都唔理，趁住轉彎嘅時候，用餘下嘅氣力跑入一個飄散住陣陣異味嘅地方，然後匿埋喺最埋面嘅角落。
我唔敢再望外面嘅情況，過咗一陣只係聽到嗰個人大叫：「嘩老鼠阿老鼠阿老鼠阿老鼠阿…」然後係一陣腳步聲遠去。
聽到外面冇晒動靜，我偷偷地望出去，先知道自己跑咗入垃圾房。再觀察多一陣，確定嗰個人已經走遠，我至鬆一口氣。
但呢一口氣同時將我一直壓抑嘅情緒鬆綁，眼淚好似缺堤一樣，不停從眼眶裏湧出，我將頭埋喺膝蓋裏面。
好攰，好想食嘢，好掛住休比，好掛住希洋，仲有卯月。
結果，我都係嗰個咩都要依靠其他人先做到，懦弱到連自己都覺得嫌惡嘅自己。
直到眼淚流乾，我連思考之後應該點做嘅氣力都再擠唔出，只係感覺到一陣頭昏腦漲，彷彿下一秒就會成為一具冇呼吸嘅屍體。
如果我真係死喺呢度，唔知紫悅會唔會搵到我。又或者，到時我會連同呢度啲垃圾一齊被帶到唔知邊度處理，咁樣同我隔住幾千公里遠嘅媽媽應該都會好開心。啲人話一個人臨死前，諗嘅嘢都會愈來愈奇怪，意識逐漸喪失嘅我開始明白。
就喺呢個時候，一袋垃圾由外面飛咗入嚟，打中咗我，緊接天空傳來震耳欲聾嘅雷聲。因為咁，我嘅意識亦被一下子帶返現實。
我揉著被打中嘅痛處：「痛…邊個咁大力掉垃圾呀…」然後慢慢起身，爬出垃圾堆外。
「嘩！有人嘅？」頭先掉垃圾嗰個人講，聽落係一把有啲熟悉嘅男仔聲。
「對唔住，頭先唔小心掟中你…。」嗰把聲繼續講。
胸口開始響起強烈鼓動，我緩緩抬頭，去確認心裏面嘅猜想——
依舊係一頭剛過耳嘅短髮，有點顯得寬鬆嘅卡通汗衫，仲有嗰張我一輩子都唔會忘記嘅臉孔。
「…你冇嘢吖嘛？」眼前嘅男仔帶點慌張，向我踏前兩步。
要喺茫茫人海裏面搵到一個人，除非呢個世界有奇蹟。
我一直將紫悅嘅說話記喺心入面，因為即使表面唔相信，但我內心深處依然覺得要喺咁大嘅地方裏面搵到高田帆，或者真係冇咩可能。
但係望住呢個相隔十二年冇見面嘅男仔，我想同紫悅講，奇蹟正喺我眼前發生。
我用細個儲落嘅錢搵咗個地方暫住，瞓醒之後就漫無目的咁喺條街度周圍行，有時就會亂咁上一架巴士，坐到總站就落車，繼續漫無目的地遊走。
我諗如果紫悅喺度嘅話，一定會笑我，話喺茫茫人海裏面搵一個人等於大海撈針，但我覺得咁樣嘅生活其實都唔錯，每一刻都優哉悠哉，一啲煩惱都冇，比起以往困喺大屋嘅日子實在要好太多。當然，嚟搵高田帆呢個諗法冇一秒被我放棄過，亦都係我置身喺呢片土地嘅最大原因。
雖然只係過咗兩日，我已經深深領會到紫悅喺我臨上機前所講嘅——混濁嘅空氣無處不在，每呼吸一下都好似將多餘嘅雜質吸到體內一樣，對於呢一點我仍然唔係好慣。
一架大貨車喺眼前揚塵而去，我禁不住掩著口鼻：「咳咳、咳咳…。」
咳咗一陣之後，突然有隻手輕拍我膊頭：「冇事吖嘛？」
一個拎住拐杖嘅婆婆企咗喺我眼前，我搖頭：「冇、冇事，唔該你呀。」
話音未落，個婆婆突然面容痛苦，我趕快問：「婆婆你點呀？」
佢一邊揉住後背：「冇事，只係背痛發作，係呢妹妹，你可唔可以幫我拎一拎袋橙，順便送我去附近公園休息呀？」
「冇問題！」我一手接過婆婆手上嘅兩袋橙。
一邊行嘅時候，婆婆滿臉笑容咁問我：「睇你咁生面口，喺外地嚟架？」
我點頭：「我以前從來都未嚟過呢度。」
「你係嚟旅行？要唔要婆婆介紹附近有咩景點呀？」
「比起旅行，我嚟係有更加緊要嘅嘢要做。」我眼望前方。
「緊要嘅嘢？」
「嗯，嚟搵一個人。」我對婆婆笑說。
「呵呵，對我嚟講最緊要嘅嘢就係每日同孫仔孫女玩…。」婆婆笑得好開心咁講。睇嚟同佢傾咗一陣計，佢暫時忘記咗身體嘅痛楚，所以我都鬆一口氣咁笑。
但下一秒，婆婆突然掩住胸口位置，繼而不支倒地。我從來冇遇到過呢種情況，所以花咗啲時間先搵到送婆婆去醫院嘅方法，去到醫院之後婆婆嘅家人都好快嚟咗。
喺醫院外面，伯伯同我講婆婆要即時做個大手術，但因為身上冇錢，所以希望我可以幫佢地俾住先：「我一定會還返俾你…！」
「但係…」我身上嘅錢本身都唔多，根本唔知夠唔夠幫到婆婆。
伯伯突然舉起三隻手指：「一係咁，你墊住咁多俾我地先就夠架喇，求吓你。」
「吓…？」我對伯伯所講嘅銀碼完全冇概念，不過如果可以幫到婆婆嘅話都想儘量幫，於是我將身上所有嘅錢拎出嚟，「你睇吓呢度夠唔夠？」
伯伯見到之後，表情變得好開心：「夠、夠！」
「咁你快啲去啦。」
我繼續喺醫院外面等，等伯伯返嚟同我講婆婆而家情況點，但企到太陽落山，到黑夜降臨依然見唔到伯伯。
去到凌晨嗰陣，我去問護士知唔知做緊心臟手術嗰個婆婆情況點，得到嘅答案係唔清楚，不過今日冇人被安排做心臟手術。
「咁晏晝同我一齊嗰對公公婆婆…？」
「個婆婆冇咩事，休息咗一陣就同個伯伯走咗啦，簡直係浪費救護車資源…。」
到咗呢個時候我先至後知後覺，但已經咩都做唔到。
「咁我以後點算…。」
所餘無幾之後，好快連住嘅地方都冇埋，身上值錢嘅嘢可能得返電話同手錶，我根本唔知自己仲可以去邊。
紫悅喺我臨走前講過如果遇到有咩事一定要打俾佢，無論佢喺天涯海角都會即刻趕嚟；只不過每次我想按下撥出嘅時候，我都會提醒自己嚟咗呢個地方只不過係短短幾日，如果咁短時間就要向紫悅求救，咁我之前下嘅決心又有咩意義。
仲有，我嚟嘅目的仲未達成，如果輕易放棄嘅話，同嗰個被困住喺大屋嘅自己根本冇分別。
每當諗到呢度，我都會收起部電話，然後再諗其他解決方法。
冇錢嘅話，大不了我就瞓街。
我拖住疲累嘅身軀走到去一個公園，然後瞓咗喺一張長櫈上面，為咗忘記兩日冇食嘢所累積嘅飢餓感，我淨係想快啲瞓著。
或者瞓喺長櫈同以前瞓喺房間地板嘅感覺有啲相似，好快我嘅意識就開始飄走。
入睡嘅前一秒，耳邊隱約傳來其他露宿者嘅收音機聲：「提提大家，而家正懸掛八號風球，冇咩必要記得唔好出街留喺屋企喇…」
時間唔知過咗幾耐，我感覺到有一對手喺我腰間遊走。
我即時清醒過來，見到嘅係一個陌生大叔。我想反抗嘅時候，佢塞咗幾張紙幣俾我：「我俾錢你，你幫我解決吓。」
我咩都冇講，淨係推開佢，然後跑出公園。
「喂…！！」佢喺後面叫住我，我以為出咗公園就冇事，但佢依舊對我窮追不捨。明明而家唔係好夜，但街上居然一個人都冇——我先記起原來掛緊八號風球。
嗰個人一直跟喺我後面，眼見同佢嘅距離愈縮愈短，我內心首次出現驚恐嘅感覺。我索性咩都唔理，趁住轉彎嘅時候，用餘下嘅氣力跑入一個飄散住陣陣異味嘅地方，然後匿埋喺最埋面嘅角落。
我唔敢再望外面嘅情況，過咗一陣只係聽到嗰個人大叫：「嘩老鼠阿老鼠阿老鼠阿老鼠阿…」然後係一陣腳步聲遠去。
聽到外面冇晒動靜，我偷偷地望出去，先知道自己跑咗入垃圾房。再觀察多一陣，確定嗰個人已經走遠，我至鬆一口氣。
但呢一口氣同時將我一直壓抑嘅情緒鬆綁，眼淚好似缺堤一樣，不停從眼眶裏湧出，我將頭埋喺膝蓋裏面。
好攰，好想食嘢，好掛住休比，好掛住希洋，仲有卯月。
結果，我都係嗰個咩都要依靠其他人先做到，懦弱到連自己都覺得嫌惡嘅自己。
直到眼淚流乾，我連思考之後應該點做嘅氣力都再擠唔出，只係感覺到一陣頭昏腦漲，彷彿下一秒就會成為一具冇呼吸嘅屍體。
如果我真係死喺呢度，唔知紫悅會唔會搵到我。又或者，到時我會連同呢度啲垃圾一齊被帶到唔知邊度處理，咁樣同我隔住幾千公里遠嘅媽媽應該都會好開心。啲人話一個人臨死前，諗嘅嘢都會愈來愈奇怪，意識逐漸喪失嘅我開始明白。
就喺呢個時候，一袋垃圾由外面飛咗入嚟，打中咗我，緊接天空傳來震耳欲聾嘅雷聲。因為咁，我嘅意識亦被一下子帶返現實。
我揉著被打中嘅痛處：「痛…邊個咁大力掉垃圾呀…」然後慢慢起身，爬出垃圾堆外。
「嘩！有人嘅？」頭先掉垃圾嗰個人講，聽落係一把有啲熟悉嘅男仔聲。
「對唔住，頭先唔小心掟中你…。」嗰把聲繼續講。
胸口開始響起強烈鼓動，我緩緩抬頭，去確認心裏面嘅猜想——
依舊係一頭剛過耳嘅短髮，有點顯得寬鬆嘅卡通汗衫，仲有嗰張我一輩子都唔會忘記嘅臉孔。
「…你冇嘢吖嘛？」眼前嘅男仔帶點慌張，向我踏前兩步。
要喺茫茫人海裏面搵到一個人，除非呢個世界有奇蹟。
我一直將紫悅嘅說話記喺心入面，因為即使表面唔相信，但我內心深處依然覺得要喺咁大嘅地方裏面搵到高田帆，或者真係冇咩可能。
但係望住呢個相隔十二年冇見面嘅男仔，我想同紫悅講，奇蹟正喺我眼前發生。