【全劇終】《我喺街執咗個失憶嘅女仔返屋企》: 尋找希望（十七）

直到太陽近乎消失，房門被人敲響：「希渝，係我。」係紫悅嘅聲線，然後係開門聲。

我一直攤喺窗邊冇郁過，望住外面被染上橘黃色嘅天空。
 
「發生咩事…！點解你會…」大概係望到我手腳上因為掙扎而造成嘅傷痕，紫悅好驚訝。
 
我一言不發，視線半毫米都冇移動過。
 
「我去拎醫藥箱…！」
 




紫悅返嚟之後，開始幫我包紮手腳上嘅傷。
 
「我知道，今日嘅葬禮你係好想去，但係…如果因為咁而傷害到自己嘅話，實在太唔值得，」被紫悅觸碰嘅傷口傳來劇烈刺痛，但內心一啲感覺都冇。
 
紫悅表情一沉：「因為呢一件，係卯月最唔想見到嘅事。」
 
「值得…。」我輕聲細語。
 
「嗯？你講咩呀？」
 




我知道，我都知道。
 
卯月唔想再見到嗰個因為懦弱而不斷失去嘅我；我都係一樣，唔想再見到呢個殘破不堪嘅自己，所以…
 
我一手奪過紫悅手上用來裁剪紗布嘅剪刀，然後往髮上一揮——
 
「希渝…？」一束束飄落嘅髮絲，伴隨紫悅嘅驚呼散落到房間地上。
 
直到頭髮變成剛過肩嘅長度，我先願意收手。
 




「…點解你要咁樣做？」
 
「由出世到而家都未剪過短髮，想試吓咩感覺。」我對紫悅笑說。
 
我撥弄雜亂不齊嘅髮尾，後背傳來還未習慣嘅颯爽感覺。
 
「但你都唔使一次過…」
 
「紫悅，我有啲嘢想同你講。」我直望進紫悅眼裏，內心前所未有咁堅定。
 
然後，我將卯月臨走之前留俾我嘅說話，仲有呢一刻心裏嘅想法統統話晒俾紫悅聽。
 
佢聽完之後，並冇好似我預想嘅一樣去反對甚至制止，只係小心翼翼地，好似想再確認一次一樣：「你真係決定咁做？」
 
「嗯，我要去。」




 
我要去做我想做嘅事。
 
我要去高田帆所在嘅地方。
 
「你呢個決定咁突然，真係嚇我一跳…」
 
「不過，之後可能就要辛苦你。」雖然卯月講過媽媽唔會對紫悅做啲咩，但我仍然有一點擔憂。
 
紫悅只係搖搖頭：「點會？呢層你可以放心，就算就真嘅，我都識得保護自己；反而係你呢個決定，雖然令人驚訝，但我會全力支持你。」
 
我望住紫悅，傳達發自內心嘅謝意：「多謝你。」
 
喺紫悅嘅幫助下，我計劃好偷走嘅時機，仲有最重要嘅——點樣避開母親嘅耳目，喺佢唔知情嘅情況之下離開呢間大屋，仲有呢個我生活咗十幾年嘅地方。
 




或者得到卯月嘅祝福，整個過程並無半點不順利嘅地方。然後，喺臨上飛機之前，我對紫悅作最後嘅道別。
 
「你諗住去幾耐？」佢問。
 
我聳肩道：「呢一刻我未有答案，」然後笑，「或者好快就會冇晒錢，跟住返嚟。」
 
「如果係撒仔嘅話，可能知道你想搵嘅人喺邊…可惜我唔見咗佢喺嗰邊嘅聯絡方法。」
 
我搖頭：「唔使，由一開始我就決定要靠自己。」
 
「但係嗰個地方咁大，要成功搵一個人，除非呢個世界有奇蹟…。」
 
「即使係咁，我都要去。」
 
「我仲未講完，你知唔知你要去嘅係個點嘅地方？」紫悅邊講邊數起手指，「係個空氣又差，物價又貴到離譜，政治更加腐敗到令人絕望嘅城市，呢啲你都唔怕？」




 
「唔怕，一啲都唔怕。」只要諗到嗰個地方有高田帆喺度，所有對於未知嘅不安都會神奇地一掃而空。
 
佢冇辦法咁嘆一口氣：「咁我唯有祝你同休比玩得開心啲。」
 
今次嘅旅程我會帶埋休比一齊，但因為坐嘅班機唔同，佢大概會遲我一段時間至會去到目的地。
 
「唔止休比，仲有小悠！」我將嗰幅畫舉高俾紫悅睇。
 
「小悠…？都唔知你講緊乜。」
 
「嘻，你唔知都得。」我細細聲笑。
 
「我真係唔係好明，你想做嘅事究竟係咩，俾你見到嗰個高田帆又點…？」紫悅攤手說道。
 




我以笑容代替回答，然後給紫悅一個臨別嘅擁抱：「我會掛住你。」
 
「等到機會合適嘅時候，我會嚟探你。」紫悅喺我耳邊講。
 
「一定要！」我向佢伸出尾指。
 
除咗休比同必要嘅證件之外，我身上只係帶住嗰幅畫咗小悠同休比嘅畫。
 
上一次係高田帆帶我踏出以往我一直冇勇氣離開嘅房間，教我如果希望真係咁虛無飄渺嘅話，我地只需要繼續去尋找。
 
所以，今次我要唔依靠任何人，淨係帶住高田帆留低嗰幅對我最重要嘅畫，去搵屬於自己嘅希望。