【全劇終】《我喺街執咗個失憶嘅女仔返屋企》: 尋找希望（十）

唔知幾時，紫悅捧住塊蛋糕來到我旁邊：「撒仔嘅生日蛋糕，食嘛？」
 
我隨意點頭，然後食咗一啖。
 
「好食嘛？」
 
「嗯。」我想笑住咁講，不過提唔起嘴角。
 
「但你嘅表情話俾我聽，呢個蛋糕睇嚟唔係咁好食。」
 




我望向紫悅：「…高田帆俾人打。」
 
「高田帆…即係尋日走入你間房個男仔？」
 
「嗯，所有嘢都係我錯，如果我冇跟佢走出去嘅話，佢就唔會俾人打。」
 
「但我聽卯月講，你今日好開心？」
 
「雖然係，但我唔應該覺得開心。」
 




紫悅望咗我一陣，然後講：「吖，我記得高田帆今晚就要走！」
 
我被佢嘅說話嚇一跳：「咁快？」 
 
「生意都傾完，冇必要繼續留喺呢個地方。」
 
「咁我地以後咪冇得再見…。」我小聲說道。
 
「你講得啱呀，你同佢住嘅地方隔咗咁多公里，你地以後應該唔會再見面。」
 




雖然我知道，但聽到紫悅咁講，內心依舊一陣無名嘅失落感。
 
「所以，如果你真係覺得開心嘅話，要好好咁傳達俾高田帆知道至得！因為今晚之後，你唔會再有機會。」紫悅講完捉起我隻手就跑。
 
「…等等！」
 
紫悅帶住我行遍成個宴客廳，但只係見到其他參加派對嘅客人，見唔到高田帆。
 
「估唔到咁快走咗。」紫悅望勻四周之後講。
 
「算啦，我同佢以後都唔會再見。」雖然我好多謝佢所做嘅一切。
 
我望吓牆上嘅大鐘：「紫悅，我想返房。」 
 
「咁我陪你返去。」




 
回到冷冰冰嘅房間後，紫悅替我重新將腳鐐繫上。
 
「…對唔住，呢個係太太吩咐。」紫悅一臉歉意講。
 
我垂低頭：「我知道，麻煩你喇紫悅。」
 
喀嚓一聲，腳上嗰道熟悉嘅沉重感又返嚟。
 
紫悅離開之後，我到窗旁躺下，凝望外面嘅風景。
 
遠方嘅燈塔再次映入眼簾。
 
果然，喺度離遠望就夠。
 




頭先同高田帆一齊畫畫嘅時候，我曾經以為自己見到希望。喺剎那平靜之間，我彷彿聽到希洋同我講佢一直以嚟都冇離開過，仍然係有咩事都會陪我一齊面對。
 
但如果呢個希望要用其他人嘅痛苦換返嚟嘅話，就應該由佢幻滅。我唔想再連累任何人，嗰個帶走希洋嘅夜晚已經係我一生都要背負嘅罪孽。
 
希望呢個名詞喺我身上只會化作虛無飄渺，就同我個名一樣。
 
眼前嘅玻璃折射出倒影，淚水一顆一顆從倒影臉上滑下，彷彿對我表達同情。
 
然而下一個瞬間，臉上沾滿淚水嘅倒影消失得無影無蹤，取而代之嘅係外面一雙堅實嘅手。