【全劇終】《我喺街執咗個失憶嘅女仔返屋企》: 尋找希望（九）

返入大屋之後，我見到四圍佈置得好靚，今日嘅主角羅凱撒就坐喺客廳中央嗰部三角琴前彈奏住古典樂曲。
 
我環視整個地方一圈，都搵唔到高田帆，明明頭先睇住佢跑入嚟。
 
搵咗一陣都搵唔到，呢個時候彈完最後一個音符嘅羅凱撒向我招手：「希渝，你過嚟彈琴俾我聽好唔好呀？」
 
「…嗯。」我繼續四周圍望，但都係唔見高田帆。
 
我帶住一點失落感坐喺羅凱撒隔離，雙手開始喺琴鍵之間來回。
 




「果然，你彈琴叻過我好多。」羅凱撒輕輕打拍子，但聽住佢嘅讚美我冇任何高興嘅感覺。
 
就喺樂曲完奏嘅一刻，我感覺到羅凱撒嘅訝異目光，我跟住佢望，發現高田帆唔知幾時企咗喺部琴隔離，玩緊手上嘅遊戲機。
 
「…阿帆！」見返佢我好開心。
 
「你…你係尋日嗰個！」羅凱撒叫道。
 
「殊！你兩個唔好咁大聲！」佢對我地比安靜手勢。
 




「你頭先去咗邊…」我問到一半，突然被紫悅嘅聲音打斷——
 
「希渝望呢邊，然後笑——」
 
我望過去，見到拎住相機對準我地三個嘅紫悅。
 
我對著鏡頭微笑，然後聽到一吓喀嚓聲。
 
影完相之後，紫悅話差唔多可以切蛋糕，就帶咗羅凱撒走，得返我同高田帆喺度。
 




「你頭先去咗邊？四周圍都唔見你嘅？」我延續剛才嘅話題。
 
「殊！」佢停止手上嘅動作，然後靠前，「我頭先聽到啲大人講，話唔可以俾你再同我講嘢。」
 
「點解呀？」
 
「我地去燈塔嘅事俾大人發現咗…我阿爸阿媽頭先打咗我鑊甘嘅。」
 
「但係，都唔關你事…」係我自己跟佢偷走出去。
 
突然間，高田帆後面有把女聲：「帆帆？原來你走咗嚟呢度…」把女聲往我一瞥，然後驚慌失措向我低頭，「頭先嘅事真係好對唔住！」
 
「欸…？」
 
「帆帆快啲一齊講對唔住！」佢將高田帆個頭按低，高田帆好聽話咁道咗一句歉。




 
「點解要道歉…？」我問。
 
「我地唔知小姐你唔可以離開大屋範圍半步，帆帆佢咩都唔知先會做出啲咁嘅事，希望你可以原諒佢。」
 
「唔係咁架…我地頭先係…」我想解釋偷走嘅事唔係高田帆嘅錯，但佢媽媽好似冇耐性聽我講落去，只係匆匆忙忙推咗高田帆走：「我地去另一邊，唔好阻住小姐彈琴。」
 
所有人都走晒，得返我一個坐喺部琴前面。
 
長期繫上腳鐐嘅結果，係而家腳部傳來隱約嘅痛覺。
 
我無視腳上痛楚，胡亂按響眼前琴鍵，然後忽然明白到一個事實——
 
就算有冇腳鐐都一樣，自從希洋消失之後，我嘅世界註定局限喺呢間屋裏面，唔會再存在任何希望。