【全劇終】《我喺街執咗個失憶嘅女仔返屋企》: 尋找希望（十一）

外面傳來敲窗聲，就同佢今朝嚟嘅時候一樣。
 
「有冇人呀？」伴隨一下下帶節奏嘅敲打，嗰個人細細聲問。
 
我用手背抹乾臉上嘅淚痕，然後打開露台嘅玻璃門。
 
高田帆以俐落動作跳咗入嚟，佢無理會我呢一刻嘅驚訝，反而注意起淚水劃過我臉上嘅痕跡：「你喊？」
 
我搖頭：「我冇喊，不過你都係快啲離開呢度好啲，唔係被其他人發現嘅話，佢地又會打得你好慘架喇。」
 




「我知，所以我先喺出面爬入嚟，為咗嚟同你講再見。」
 
紫悅話，高田帆今晚就會離開呢度，返去自己住嘅地方，我地從此唔會再見。
 
所以紫悅講得啱，有啲說話而家唔講嘅話，以後可能冇機會再講——
 
「…今日好多謝你。」
 
「多謝？邊件事？」佢漫不經心咁講。
 




「你帶我去燈塔，仲有同我一齊畫畫。」
 
但佢表情帶住疑惑：「唔？我仲以為我失敗咗。」
 
「失敗？」
 
「因為，你一樣係唔開心。」
 
佢用一雙彷彿睇穿人嘅眼睛直視我，我避開佢嘅眼神。
 




「唔係，我好開心。」
 
「開心先唔會咁嘅表情。」
 
我稍微別過臉，嘴裏碎唸：「你根本咩都唔明…。」
 
「果然，你唔開心係因為你腳上面嘅嘢。」
 
「我開唔開心根本唔重要，重要嘅係我腳上扣住呢樣嘢，媽媽同希洋就會開心；仲有，頭先喺羅凱撒嘅生日party度你唔應該同我道歉，要道歉嗰個係我先啱，唔係我擅自走咗出去，你就唔會俾人打得咁慘…。」
 
「希洋？邊個希洋？」佢問。
 
「係我哥哥。不過因為我貪玩，佢已經永遠唔會再返嚟。」一路講嘅同時，我回憶起被鎖上腳鐐嘅情形，「雖然媽媽話佢愛我先會喺我腳上扣住呢樣嘢，但我知道並唔係咁，呢樣嘢其實係一個懲罰，係我令到希洋從此消失嘅懲罰，希洋都一定係咁樣諗，佢一定係好嬲我。」
 
高田帆聽到皺起眉頭，諗咗一陣：「唔…你講啲嘢真係好難明。明明唔開心又要話好開心；明明話係愛而家又變咗懲罰；明明話希洋消失咗，但又話佢好嬲你…。」




 
「總之好多謝你，仲有對唔住。」
 
「不過，如果我有阿妹嘅話，無論發生咩事我都唔會嬲佢，我係咁樣諗。」講呢句嘅同時，佢臉上掛著一抹陽光般嘅笑容。
 
我望住佢呢個笑容，一時間唔識反應。
 
「吖，可唔可以借本字典俾我？」佢突然問。
 
「…隨便。」
 
然後佢好開心咁揭起我放喺地上嘅厚字典，揭咗一陣佢興奮叫道：「有喇！」
 
「…你搵緊啲咩？」
 




佢冇回答，只係對我講：「借支筆俾我？」
 
我照佢所講嘅做，佢喺袋入面拎咗一幅畫出嚟，用筆喺上面開始寫。
 
過咗一陣，佢將幅畫遞俾我：「寫好！送俾你！」
 
我接過細看，發現畫裏面嘅內容同佢今日喺燈塔畫嘅一樣——一個女仔同一隻龍貓。
 
反轉後面，頭先佢下筆嘅位置寫咗兩個字。
 
「…小悠。」我細聲讀出。
 
「嗯！我啱啱諗到，個女仔就叫小悠。」
 
「呢個名點解？」




 
佢聳肩道：「唔知，呢個字係喺學校學嘅，不過聽落係一個好名。」
 
我從地上拎起仍然打開嘅字典，然後望向寫咗「悠」字嗰一欄，跟住上面嘅字唸：
 
「悠然、悠悠…」
 
高田帆問：「全部都未聽過，即係點解？」
 
我望住畫裏面嘅女孩，女孩臉上掛住嘅係同高田帆一樣——好似陽光般閃耀嘅笑容。
 
「喂喂，即係點解呀？」
 
我微笑著搖頭：「係個好適合佢嘅名。」
 




一定係打從心底裏覺得幸福，個女仔臉上至會出現呢種笑容。
 
「嗯！我都話架啦！」
 
「可唔可以講多啲，佢係個點嘅女仔？」
 
「係個點嘅女仔？」高田帆諗咗一陣，「好多嘢講、最鍾意食食食同埋周圍走，跌到損手爛腳都唔知、每一日都過得開開心心…大概係咁？」
 
「聽落真係好。」同我完全相反，係個得人鍾意嘅女仔。
 
我忽然諗起高田帆喺燈塔講嘅說話：「你話過呢個女仔係對你最重要嘅人，你真係就咁送俾我？」
 
「係呀，因為你好似好鍾意休比咁，所以送俾你。」
 
「欸？」
 
佢隨即撇開視線，臉頰漲紅起來：「咳、咳！因為龍頭地鼠呢個名太有霸氣，龍貓佢可能承受唔住，所、所以就叫住佢休比先。」
 
我噗一聲笑出來：「呢個係咩理由嚟。」
 
「唔准笑…！」
 
好不容易止住笑聲，我呼一口氣：「多謝你，我會好好珍惜。」
 
佢抓一抓耳側頭髮：「嗯…。」
 
差唔多同一時間，有人聲喺樓下傳來：「帆帆！你喺邊呀？」
 
「咁我走喇。」高田帆講完，準備從露台爬出去。
 
「等陣呀，你又喺度出去？」我叫住佢。
 
「冇事架，我爬樹好叻架。」佢用靈活嘅動作跳上貼近露台嗰棵樹，然後轉身向住我，「喂喂。」
 
「嗯？」
 
「唔開心嘅時候，就望吓休比，幻想佢食牧草波波食到成嘴都係嗰個樣，就算得少少都好，如果可以令你開心啲咁就好。」
 
呢一刻，我覺得眼前嘅人比天上嘅星星還要閃耀，閃耀到甚至有一瞬間，我確信自己見到希望。