【全劇終】《我喺街執咗個失憶嘅女仔返屋企》: 尋找希望（八）

將近天黑嘅時候，嚟接我地嘅係卯月。
 
卯月會喺度出現即係話我偷走出大屋嘅事已經被人發現，但卯月一啲憤怒都冇，發現我地之後只係輕輕嘆一口氣：
 
「原來你地真係嚟咗呢度。」
 
慌忙之中，我將畫緊嘅畫收起，向卯月道歉：「對唔住…。」
 
卯月只係搖搖頭，然後同我仲有高田帆講：「我地要返去喇，今晚係撒仔嘅生日party。」
 




高田帆興奮到大叫：「有party？正呀！」
 
「嗯，所以快啲執好地下嘅畫具。」
 
收拾好之後，卯月拖住我同高田帆，大家開開心心咁返屋企。
 
我以為我偷走出嚟嘅事一定會激嬲卯月，我都話卯月係呢個世界上最溫柔嘅人嚟。
 
「姐姐！你知唔知呀？」路途上，高田帆對卯月講。
 




「嗯？」
 
「我地兩個，頭先一直喺度畫畫。」
 
「係呀？咁你地畫咗啲咩呀？」
 
「畫咗…」高田帆諗咗一陣，「重要嘅人。」
 
「返去可唔可以俾我睇吓？」
 




「梗係可以！」高田帆跳咗起身。
 
然後卯月轉向我呢邊問：「咁你呢？你幅畫可唔可以俾我睇？」
 
我猶豫一會：「…可以。」
 
距離大屋愈來愈近，裏面傳出熱鬧嘅人聲。
 
高田帆一聽到就甩開咗卯月隻手：「我嚟喇！！」然後自己一個跑咗入屋。
 
得返我同卯月慢慢走在路上，我望住旁邊嘅野草：「我以為你會鬧我地。」
 
隔咗一陣，卯月嘅聲音先傳來：「希渝，你今日玩得開唔開心？」
 
我望返卯月，佢正在瞇眼微笑。




 
「…開心，好耐都未試過咁開心。」我有啲心虛咁講，但呢個係我真實想法。
 
自從希洋消失以後，我冇再想像過會有咁開心嘅感覺。
 
卯月聽完鬆一口氣：「我俾條鎖匙個男仔果然係正確…。」
 
「鎖匙？…你係話我腳上面嘅？」
 
「嗯。」
 
「不過，點解…」
 
「聽到你話開心，呢個就係最好嘅答案。」
 




我掛起笑容：「卯月，咁我可唔可以去羅凱撒個party？」
 
卯月撫平我嘅頭髮：「嗯，你媽咪嗰邊我會同佢解釋，你就好好咁玩返日。」
 
「多謝卯月！」