【全劇終】《我喺街執咗個失憶嘅女仔返屋企》: 尋找希望（七）

我地由露台跳去隔離棵樹，再沿住棵樹爬到地上，雙腿感覺到久違嘅輕快感，但因為長時間冇運動過，我嘅動作比起以前變得唔靈活。
 
高田帆捉實我隻手，帶我一路向住燈塔方向跑。
 
自從希洋消失之後，我冇再嚟過嘅地方。
 
所有嘢睇起嚟都冇變，就同希洋仲喺度嘅時候一樣；亦都係因為咁，同嗰個落住大雨嘅夜晚都係一樣。
 
眼淚有種想要一湧而出嘅感覺，但我極力遏止住。
 




旁邊嘅高田帆望向一望無際嘅大海：「嘩，我冇估錯！呢度嘅風景果然比起大屋嗰邊睇到嘅更靚。」
 
「你都快啲嚟睇吓…！」大概係發現到我臉上嘅表情，佢收起咗剛才嘅雀躍，「你有冇事呀？」
 
我抹乾眼眶滲出嘅淚水，然後搖頭：「…冇事。」
 
佢望咗我一陣，臉上出現鬆一口氣嘅微笑：「我地嚟畫畫吖。」
 
「…畫畫？」
 




「嗯，呢度咁靚，係個好啱畫畫嘅好地方。」佢喺隨身嘅袋拎出一堆畫具，仲有幾本畫簿，然後坐咗喺地上，開始畫起上嚟。
 
聽住筆尖觸碰紙張嘅聲音，我嘅好奇心被勾起。我偷偷望向高田帆嘅畫簿，想睇吓佢會畫啲咩。
 
佢喺畫紙上面畫咗一個女孩，女孩旁邊有一隻不知名嘅小動物。
 
「你畫緊咩呀？」我忍唔住問。
 
佢嘅目光冇離開過眼前嘅畫：「對我嚟講最重要嘅人。」
 




我指住嗰隻從來未見過嘅小動物：「咁呢隻呢？又係咩嚟？」
 
「龍貓…。你唔知咩？」高田帆握住畫筆嘅手停咗。
 
我搖頭，呢個名詞我係第一次聽到。
 
「唔…」高田帆諗咗一陣，然後用手比劃，「大概咁大隻左右，最鍾意食嘅嘢係牧草波波。」
 
我望住高田帆畫嘅龍貓，想像佢食嘢個樣：「好可愛…！」
 
高田帆突然講：「你笑。」
 
「吓？」
 
「頭先，你笑。」




 
被佢咁講，我先察覺到自己正喺度笑，我趕快搵咗第二個話題：「…咁呢隻龍貓叫咩名呀？」
 
「佢叫龍貓。」
 
「…個名咁求其架。」
 
高田帆將手枕喺頭後面，視線飄向遠方：「我養佢嗰陣，都係龍貓龍貓咁樣叫佢。」
 
「你有養龍貓？」
 
「嗯，係呀。」
 
一諗到有機會見到真實嘅龍貓，我期待起來：「喺邊度？可唔可以俾我睇吓？」
 




「已經唔見咗喇。」
 
「欸…？」
 
佢點頭：「嗯，有次帶佢落街玩，之後就唔見咗。」
 
我低頭望向地下：「…連名都未有，就已經消失咗。」
 
「咁樣嘅話，」聽到高田帆把聲，我抬頭，「幫佢改個名囉，反正我相信龍貓仲喺呢個世界上，幫佢改個名嘅話，話唔定佢就會識返嚟。」
 
我笑：「聽落好似幾好！」
 
「嗯嗯，等我諗吓先…叫龍頭地鼠好唔好？」
 
「唔好，」我搖頭，然後諗咗一陣，腦海忽然閃現喺字典裏面見過嘅兩個字：「休比…不如叫佢休比吖？」




 
「吓…個名一啲都唔型。」
 
「都好過叫龍頭地鼠呢個一啲都唔得意嘅名…。」
 
「總之我係佢主人所以由我嚟決定！一於叫龍頭地鼠！」
 
「…佢一定唔會鍾意呢個名。」
 
「好煩阿你…。」
 
呢個時候，我嘅目光落喺龍貓隔離嘅身影上：「咁呢個女仔呢？佢叫咩名？」
 
「仲未有…。比起呢樣，你都應該一齊畫畫。」佢將另一本畫簿同顏色筆推向我。
 




「…我唔識畫。」
 
「我都唔識畫架，只係畫畫嗰陣，會覺得好開心。」佢瞇眼笑起嚟。
 
「…會好開心？」
 
「嗯！所以，你都一齊畫吖。」講完佢遞咗支筆俾我。
 
我諗咗一陣，就接過支筆，然後開始喺畫簿上面畫。
 
畫咗一陣，高田帆走過嚟：「今次到我問你喇，你畫緊啲咩？」
 
「同你畫嘅一樣，都係最重要嘅人。」我喺幅畫度畫咗希洋。
 
「佢喺邊度？呢兩日都唔見佢同你一齊玩嘅？」
 
「邊度都唔喺，已經消失咗。」
 
「…乜你講嘢咁老積架。」
 
「因為媽媽係咁樣同我講。」
 
「畫入面個男仔，係你重要嘅人？」
 
「嗯。」
 
「咁嘅話，佢就一定唔會消失，因為佢會喺你呢度。」佢用拇指指住自己心臟嘅位置。
 
「但我已經再見唔到佢，呢個係事實。就算喺心入面都好，就算幾唔想都好，終有一日都會消失。」
 
「所以，更加要畫低佢。」
 
我望住高田帆。
 
佢指住自己幅畫個女仔：「佢一早唔喺呢個世界上，但為咗唔好唔記得佢，我就不停畫，不停畫，你都試吓？」
 
我望住幅畫個女仔，高田帆將佢畫成笑得好開心：「…真係有用？」
 
「嗯，快啲諗起，嗰個對你好重要嘅人嘅樣…」
 
我照住高田帆講嘅咁，開始回憶起每一件關於希洋嘅事，仲有佢身上嘅每一個特徵，好快眼淚已經如泉水般湧上。
 
「喂喂，我嘅意思係叫你諗啲開心嘅嘢…！」
 
結果呢一日，我地喺燈塔裏面一直畫。
 
而且不可思議地，內心獲得一種平靜嘅感覺。