【全劇終】《我喺街執咗個失憶嘅女仔返屋企》: 尋找希望（六）

唔知過咗幾耐，我聽到露台外面有咯咯聲，然後有人喺度講嘢：
 
「喂喂快啲開門呀。」
 
我沿住聲音嘅方向望，唔敢相信自己嘅眼睛——
 
係高田帆。佢由樹嗰邊爬咗入嚟。
 
我趕忙打開露台門。
 




「對唔住，我去咗拎啲嘢所以遲咗嚟搵你。」
 
「我仲以為你已經唔記得咗…。」
 
「點會？我講過會再搵你玩吖嘛。快啲解開呢樣嘢先。」講完之後，高田帆拎咗一把鎖匙出嚟，想解開我腳上面嗰樣嘢。
 
我下意識縮開對腳：「點解你會有呢把鎖匙？」把鎖匙應該得卯月有至係…。
 
然後我記起頭先紫悅話高田帆今日全日都喺卯月身邊轉來轉去。
 




果然，高田帆引證咗我嘅想法：「我喺其他人身上偷返嚟嘅，快啲解開佢先啦，我帶你去一個地方。」
 
「你想去邊度？」
 
佢指住外面——燈塔嘅方向：「嗰度。」
 
「我唔想去。」我別過視線，腦裏又憶起嗰個落大雨嘅夜晚。
 
「我知你講大話。」
 




「冇。」
 
「因為你成日望住嗰個地方發呆，所以你一定係講緊大話，你好想去嗰個地方。」
 
「我冇講大話。」
 
「你有。」
 
「冇！！！」我將高田帆頭先俾我嘅鎖匙用力掉落地。
 
空氣靜咗兩秒，我向佢道歉：「…對唔住。」 
 
佢搖頭：「唔唔。」
 
「不過，即使有鎖匙都冇用。」




 
「點解？」
 
「我解開咗個腳鐐嘅話，媽媽會傷心。」
 
「因為你腳上面嗰樣嘢係你尋日講嘅愛？」
 
「嗯。」
 
「唔係咁。」
 
我抬頭，望住高田帆。
 
「呢啲先唔係愛，只係單純嘅束縛。」
 




我搖頭：「唔係束縛。媽媽係因為唔想我好似希洋咁永遠消失，所以至會將呢樣嘢扣喺我腳上面。」
 
「但係喺我眼中呢樣嘢只係束縛。你臉上嘅表情就係最好嘅證據，如果呢樣嘢真係愛嘅話，你點會咁唔開心？」
 
我再搖頭：「唔係咁。」
 
「愛係喺心入面記住——阿爸阿媽係咁樣同我講。」
 
高田帆講完之後，房外突然有腳步聲由遠漸近。
 
「…係歷史老師。」
 
高田帆執起地上嘅鎖匙：「快啲將呢個嘢解開咗先！」
 
「等陣…」我嘗試反抗。




 
「我同阿媽講咗今日會同朋友去出面玩，所以唔使擔心。」佢捉住我隻腳，想用鎖匙解開我腳上嘅鎖。
 
「我都話我唔去——」
 
一下清脆響聲之後，個腳鐐解開咗。係自從佢被扣上嗰日以來嘅第一次。
 
然後，高田帆同我講：「而家束縛已經唔存在，去抑或唔去由你自己選擇。」
 
「你好，我準備入嚟喇。」房外面係歷史老師把聲。
 
與此同時，高田帆由露台爬咗出去：「快啲！冇時間喇！」
 
我嚇呆咗：「等、等陣，你想由呢度出去？」
 




「出面唔係有人入緊嚟？」
 
「雖然係…」
 
兩吓敲門聲之外，我聽到門鎖正從外面被扭開——
 
「你尋日講過，你個名嘅意思係捉唔到嘅希望，」高田帆對我伸出右手，「如果係真嘅話，如果真係捉唔到嘅話——」
 
我從地上爬起身，冇咗被腳鐐限制嘅感覺教我回想起從前同希洋偷走出大屋嘅日子。
 
然後，高田帆直視進我雙眼：「咁我地就更加唔應該放棄，要繼續去搵。」
 
「打搞晒——」歷史老師沉悶嘅腔調從門縫裏漏出。
 
「快啲捉實我！」
 
我猶疑一會，握住高田帆向我伸來嘅右手，然後兩腳一踏——