【全劇終】《我喺街執咗個失憶嘅女仔返屋企》: 尋找希望（一）

1. 呢一話開始會轉成希渝(小悠)視角
2. 時間線有時會跳嚟跳去, 作者儘量用分隔線表示
==========================================

救返個男仔上嚟之後，我認得佢係呢幾日喺樹上面，拎住本畫簿不停畫畫嗰個人。
 
但係太長時間冇接觸大屋以外嘅人，我退後咗一步。
 
佢冇察覺我呢個舉動，只係對我笑：「多謝你救我上嚟。」
 




我搖頭，花咗幾秒喺腦海裏尋找合適言辭：「…唔使客氣。」
 
個男仔企起身，四處張望：「呢度係你間房？好大——！」
 
「但除咗我之外，就冇其他人。」
 
佢望向我：「點解嘅？」
 
「因為媽媽唔俾其他人入嚟，除咗紫悅佢地。」
 




「紫悅？邊個紫悅？」個男仔問。
 
自我有記憶以嚟，紫悅就一直喺我身邊照顧我起居飲食，形同家人一樣嘅存在。
 
佢冇執著追問落去，表情忽然有點驚慌：「死喇，咁我係咪應該快啲返出去好啲…」
 
我搖頭：「最近媽媽心情幾好，有時會俾其他人入嚟同我一齊玩，所以我估你同羅凱撒一樣都可以留喺度。」
 
「真嘅？雖然唔知邊個羅凱撒…」佢展露出笑容，「老實講呢個地方真係好Q悶，識到你呢個新朋友我好開心。」
 




「…你話我係新朋友？」
 
「嗯！新朋友。」個男仔笑得更開朗。
 
「…明明連名都唔知。」我細細聲講。
 
「啊對唔住…一時唔記得，我叫高田帆。」
 
我噗一聲笑出嚟：「高田帆？好似日本人嘅名。」就同紫悅一樣。
 
佢搲吓頭：「乜係咩？我都唔係好知。」
 
帆…。我默唸一次，然後拎出紙同筆俾個男仔：「個帆字，可唔可以寫出嚟？」
 
「我個名入面嘅帆字？」個男仔拎起支筆，「雖然唔知你想點，不過梗係可以啦。」




 
佢喺紙上面用力刻畫每一筆，我一邊望一邊回想自己有冇見過呢個字。
 
寫完之後，佢遞俾我睇：「嗱。」
 
「我未見過呢個字，有咩意思？」
 
「吓？」佢諗咗一陣，「我估可能係帆立貝之類啩。」
 
「唔通你爸媽鍾意食帆立貝…。不過用帆立貝做名，果然好奇怪。」笑咗幾聲之後，我喺堆滿地上嘅字典裏面拎起一本，開始揾呢個男仔個名入面嘅帆字，「帆…帆…有喇！」
 
個男仔望咗一眼地上嘅一堆字典：「點解咁多字典嘅？」
 
「因為我平時鍾意睇。」
 




佢好似聽到最荒旦嘅事一樣：「吓？你喺呢間房裏面唔係睇字典就係瞓覺，唔悶嘅咩？」
 
我好快就搖頭：「雖然一開始係媽媽迫我睇嘅，但睇落去就覺得好得意。」
 
「…正一怪人。」
 
我望住字典上帆字嘅解釋：「帆，掛在船桅上，利用風力使船行駛前進的布幔…即係好似助力咁樣？」
 
「原來係咁，雖然唔係好聽得明，不過意思好似幾好。」
 
「嗯！阿帆！」
 
「欸…？呢個叫法…」
 
我回想起紫悅對我講過，關於世界上其他地方嘅事：「喺你住嗰個地方，唔係好鍾意喺人名前面加個阿字咩？」




 
「又好似係…咁你呢？你叫咩名？」唔知點解，呢個男仔講嘢嘅語氣同速度令我諗起希洋。
 
我猶疑一會，答：「…我叫希渝。」